Kaunar Manzon Allah Salallahu Alahi Wasallam

Kaunar Manzon Allah Salallahu Alahi Wasallam

Sheikh Jafar Mahmoud Adam

Bayan haka, Ya ‘Yan uwa, Hadisi ya tabbata daga Nana A'isha bint Abi Bakr (R.A), tana hakaito wani yini da Manzon Allah (s.a.w) ya tsaya a tsakanin sahabbansa yana mai basu labarin wani abu daga cikin abubuwan mamaki daga cikin abubuwa na gaibu, wanda Allah (M) ya nuna masa daga cikin abin da zai zo a gaba har abinda yake cikin Aljannah da wuta. Yana cewa :

"Babu wani abu wanda ban taba ganinsa ba, face yanzu dinnan ina ganinsa har ma abin da yake cikin wuta da Aljannah".

Wannan daya ne daga ukun manyan dalilai da hujjoji da suke tabbatar da Manzancinsa da kasancewarsa badadi na Allah, ta yanda Allah (M) ya kebance shi da sanar da shi, da sanar da shi wani ilmi na gaibu irin wanda ba a saninsa sai ta fuskar wahayi ga wani wanda Allah (M) ya kebance shi ya zabe shi. Allah (M) ya nuna masa Aljannah da wuta ya kuma nuna masa dangin ni'imomin da ke a cikin ita Aljannah din, sannan kuma ya nuna masa irin dangogi na azabobi da wahalhalu da ke a cikin wuta. Duka wannan an nuna masa ne alhali yana a farke ba a cikin barci ba wato (mafarki).

Hakika wannan mu'ujiza ce cikin mu'ujizozin da Allah ya yi masa. Manzon Allah (s.a.w) yana cewa: 

" Hakika an yi mani wahayi cewa lalle, ku, za a fitine ku a cikin kaburburanku, irin, ko kusa da fitinar masihul Dajjal".

Abin da ake nufi da fitinar kabari a nan ita ce tambayoyin da za a yi wa kowane daya daga cikinmu (mazanmu da matanmu). Ita kuwa fitinar Dajjal ba karamar fitina ba ce domin irin yadda tasa da yawa daga cikin mutane suka halaka; ta hanyar nuna musu irin abubuwan da ido bai saba da ganinsa ba; ko kuma bai taba jinsa ba. Misali kamar ya tashi idon makaho ya warke, ko ya tayar da matacce daga kabarinsa, da sanya abubuwa su faru, sannan ya yi da'awar Allantaka, wasu mutane kuma su bishi. Kuma ya zagaye duniyan nan a cikin kwanakin da ba su wuce arba'in ba, ya shiga ko wane gari in ban da Makka da Madina, wadanda Allah (M) zai kiyaye su da Mala'iku wanda suka zagaye su ( Makka da Madina). Sai dai wanda duk zai bi Dujjal zai fito wajensu domin ya bishi.

Daga Hadisin za mu iya fahimtar cewa Manzon Allah (s.a.w) yana buga misalin yawan wakanda za su fitinu a kaburbura cewa sun kai kwatankwacin yawan wadanda za su bi Dujal. Ya ci gaba da cewa za a tayar da mutum a tambaye shi cewar : Me ka sani game da wannan mutumin (Watau Manzon Allah (s.a.w) ). Amma mumini sai ya ce shi ne Muhammadu Manzon Allah (s.a.w) ya zo mana da hujjoji da shiriya, sai muka amsa, muka yi imani da shi, kuma muka yi masa biyayya". A cikin duka abin da shi mumini zai ambata akwai imani da biyayya, ko da kuwa bai taba yin kasida ko guda daya ba ga Manzon Allah (s.a.w). Abin da kawai aka bukata shi ne cika zuciya da kaunarsa ta hanyar yi masa biyayya, da ganin mutumcinsa, da girmansa fiye da dukkan wani dan Adam da aka yi a da ko za a yi a nan gaba. Saboda haka ba ya bin wasu tafarki, hanyoyi ko dariku da dokokin da basu da asali, face tafarkin shiriya ta Manzon Allah (s.a.w) a nan za mu iya fahimtar cewa imani kadai ba ya wadatarwa sai da aka yi masa biyayya. Biyayya a cikin akida, ibada, dabi'u da ma'amalolinka duka su kasance yadda ya koyar ne a cikin hadisansa ingantattu, ba irin wanda aka kirkira ba, hadisai raunana, da maudu'ai ko Isra'iliyyat ba. Dukkan nau'ukan ibadarka kamar sallah, zakkah, zikiri, istigfari su kasance irin wanda Manzon Allah (s.a.w) ya yi ne ko ya yi umarni a yi, ba irin wadanda wasu mutane suka kirkiro ba ne bayan mutuwarsa (s.a.w). Ya kasance dukkan dabi'unka, halayenka, cin abincinka, kwanciyarka, tafiya, magana da sauransu kana kwaikwayon irin na Manzon Allah ne (s.a.w). wanda duk ya kasance ya yiwa Manzon Allah (s.a.w) irin wannan son, biyayya, da imanin sai mala'iku su ce da shi:

"Kwanta (ka huta) kana salihi muna da masaniya (ta fuskar takardunka dake a wurinmu) cewa dama kai mai yakini ne da Manzon Allah (s.a.w).

Manzon Allah (s.a.w) ya ce :

"Amma munafiki ko mai shakka (mai raba kafa) sai ya ce: Ban sani ba, na ji kawai mutane suna cewa kaza sai na ce" .

Watau a nan duk abinda ya ji mutane suna yi ko cewa sai ya yi misali idan sun yi kida, ko waka, da sauransu sai ya yi ba tare da ya tsaya ya yi bincike ba ya samu wayewar kai daga Ayar Alkur'ani ko Hadisi ingantacce a kan yadda zai bi tafarki na gaskiya na Manzon Allah (s.a.w) ba. Shi dai kawai "mukalladi" ne watau mabiyi ne kawai ga malamai da shehun nai ba a kan hujja ko gaskiya ba, saboda haka ya kamata ‘yan uwa mu fahimci cewa Alkur'ani da hadisai ingantattu su ne ma'auni da ake gane akida ta gaskiya, da ibadoji, halaye da dabi'u na gari. Abin da duk ya yi daidai da su wannan shi ne shiriya, abin da duk kuwa ya saba masu shi ne bata, kuma shirme, komai girman ilmin wadanda suka yi riko da shi suna kiran mutane a kan su wajibi ne mu nisance shi.

Ya ‘yan uwa lallai Allah (M) ya zabi Manzon Allah (s.a.w) ya sanya shi ya zama shi ne karshen Annabawa, kuma karshen Manzanni. Babu wata shiriya sai wadda ya zo da ita, haka kuma babu wani alkhairi sai ga wanda ya yi riko da abin da ya zo da shi. Kuma Ubangiji ya lamuncewa wadanda suke yi masa biyayya cewa:

" Idan har ku ka yi masa da'a to za ku shiryu".

Ya ‘yan uwa! Da yawa daga cikin mutane suna tsammanin cewa tsira tana samuwa ne ga wanda kawai ya furta yana son Manzon Allah (s.a.w) wasu kuma suna tsammanin cewa za a samu matsayi da martaba a Aljannah gwargwadon baitoci na wake da mutum ya shiryawa Manzon Allah (s.a.w) da kida ko babu kida, a tsammaninsu ko da kuwa mutum bai yi riko da sunnarsa ba, ko da mutumin ya saba masa a addini, watau a ibada, dabi'u, aiki da mu'amaloli da sauransu. Alhali ita soyayya bata tabbata ta hanyar kudurtawa a zuci kawai face an gauraya ta da wasu abubuwa masu muhummanci, wadanda idan babu su to, soyayyar za ta zamo ba ta gaskiya ba ce, kuma ta shirme ce kawai. Wadannan abubuwa kuwa su ne :

1- Imani da shi (Manzon Allah (s.a.w)) da imani da manzancinsa

2- Aiki da sunnarsa tare da koyi da shi

3- Gabatar da zancensa a kan na kowa, komai girmansa, waliyantakarsa, ko malantakarsa.

4- Takaituwa ga hujjarsa. Ba zai taba yiwuwa mutum ya ce yana sunnarsa, kuma yana darikar wani shaihi ko waliyi ba. Domin duk wani wanda ya samu shi ne gwargwadon yadda ya yi riko da sunnar Manzon Allah (s.a.w) ; ba tare da garwayata da shirkoki, bidi'o'i ko al'adu ba.

5- Riko da wasiyyarsa (s.a.w) inda yake cewa : " Ku bi tafarkina da tafarkin sahabbaina". Saboda haka dole ne mu yi ko yi da abin da suka aikata, ko suka ruwaito daga Manzon Allah (s.a.w). Amma duk abin da ba su yi ba, mu kuma muka kawo shi muna kokarin sai mun mayar da shi addini, to ba komai muke yi ba, face kokarin cin gyaran ko tuhumar Annabi (s.a.w) da sahabbansa cewar ga wani abin alheri a addini wanda su suka ki yi, ko suka manta ba su yi ba.

6- Biyayya gare shi (s.a.w) da sallamawa cikakkiya ga duk wani abu, ko kaso shi ko da kuwa kana kinsa. Ya kasance hujjarka kawai ita ce shin ya inganta daga gare shi ko kuwa? Ba tare da cewar kuma wane ai yace kaza (daga shaihinnai ko waliyyai ba) domin idan ana maganar Manzon Allah (s.a.w) wane ne kuma za a yi maganarsa?

7- Sannan ya kasance kuma mutum bai samu wani kaikayi ba a zuciyarsa a yayin da ya yi da'a ko biyayya ga Manzon Allah (s.a.w). Domin fadarsa Madaukakin Sarki :

" Na rantse da Ubangijinka, ba za su yi imani ba, har sai sun sanyaka mai yin hukumci a cikinsu ga abubuwa da suka gudana tsakaninsu na sabani, sannan basu samu wani kaikayi ba ga abin da ka yanke (na hukumci) kuma su mika wuya, iyakar mika wuya".

Ya kamata mu sani cewa a duk duniya babu wanda yake da adadin masoya irin Manzon Allah (s.a.w), domin in dai so ne kawai ba tare da da'a ko biyayya ba, hatta da yawa daga cikin kafirai na duniya a yanzu da kuma a da sun so Annabi (s.a.w). Na nesa da na kusa, wanda ya ganshi da wanda bai ganshi ba. Mu sani cewa da a ce ita soyayya kadai tana wadatarwa ga shiga Aljannah (ba tare da da'a da biyayya ba) lalle da Abu Talib yana cikin wanda suke cikin wanda za su zama na farkon a shiga Aljannah, domin a tarihi da wuya ka samu wanda ya nunawa Manzon Allah (s.a.w) soyayya irinsa, har ma tare da ba shi kariya.

Hakanan da yawa daga cikin kafiran kuraishawa, wadanda domin tsananin soyayyarsu gare shi har suka sanya masa suna " Al Amin" wataun amintacce. Saboda haka ba su tabSa shakkar gaskiyarsa ba. Allah Madaukaki Sarki ya ce:

" Lalle su ba su karyataka, sai dai su, azzalumai da ayar Allah ce suke musu". Wannan ya sanya soyayyarsu kawai ta zuci ce wacce ba za ta amfanar da su ba, domin ba su garwayata da yi masa da'a da biyayya a cikin addinin ba.

Haka kuma idan muka duba cikin Alkur'ani za mu ga cewa ayoyin da suke umarni kan yin da'a ga Manzo (s.a.w) kamar :

"Kuma ku yi da'a ga Allah, kuma ku yi da'a ga ManzonSa".

"Wanda duk ya yi da'a ga Manzo (s.a.w) hakika ya yi da'a ga Allah".

" Ku yi da'a ga Allah, kuma ku yi da'a ga Manzo (s.a.w) kar ku yi jayayya".

" Wanda duk ya yi da'a ga Allah da ManzonSa, to wadannan suna tare da wadanda Allah ya yi ni'ima a gare su, daga cikin Annabawa da masu gaskatawa, da shahidai...".

Wadannan ayoyin da kuma wadanda suka yi magana a kan yin imani da bin Manzon Allah (s.a.w) misali:

" Ku bi abin da aka saukar zuwa gareku".

Wadannan ayoyi sune suka fi yawa a cikin Alkur'ani fiye da wadanda suke nuna soyayya gareshi. Dalilai kuma, idan ance da'a, biyayya da imani wasu abubuwa ne da so baya tabbata sai da su, shi ya sanya aka maida hankali wajen yin bayaninsu. Haka kuma, da an ce so ne tsuransa, sai ya kasance musulmi ya yi tarayya da kafirai ne na da da na yanzu a cikinsu, domin kuwa har yanzu akwai kafirai na duniya da suke jinjinawa Manzon (s.a.w). Misali akwai "Micheal Hart" wanda ya rubuta littafin mutane dari (100) da suka ci nasara a duniya, ya sanya Manzon Allah (s.a.w) cewar shi ne na daya, wannan ba zai sa shi ya samu aljannah ba, domin bai yi imani da shi ba ta hanyar yi masa da'a da biyayya.

Wannan abu shi ne da yawa daga cikin mutane a yau suke da bukatar a wayar musu da kai. Lalle mu fahimci cewar ko yake akwai ayoyi da hadisai da suka yi umarni da soyayya ga Manzon Allah (s.a.w) za mu iya fahimtar cewar ayoyi da hadisai wadanda suka yi umarni da yi masa da'a da biyayya a (cikin addini) sun ninninka na soyayyar sau tarin yawa. Saboda haka samun tsira yana tattare da imani biyayayya da da'a a gare shi, bayan tabbatar da kaunarsa (s.a.w). Allah ya sa mu da ce.

Wannan khuduba ce da Babban Malaminmu Sheikh Jafar Adam Kano ya gabatar a lokacin Rayuwarsa, a masallacin Juma’a na Dorayi. Allah ya jikan Mallam ya gafarta masa ya sanya al-jannar firdausi ta zama makoma a gareshi.

Yasir Ramadan Gwale

yasirramadangwale@gmail.com

http://yasirramadangwale.blogspot.com

www.facebook.com/yasirramadan.gwale

Illolin Da Suke Tattare Da Auren Dole

Illolin Da Suke Tattare Da Auren Dole

Auren dole akasar Hausa, aure ne da akeyiwa yarinya(budurwa) ba tare da tana so ba, wato atursasa mata auren wani wanda ba shi ne zabinta ba, kuma a mafi yawancin lokuta iyaye suna yiwa diyarsu auren dole ne ga wani mutum wanda shekarunsa suka jaa, kuma sau da yawa, auren dole haka yake kasancewa a tsakanin Hausawa. haka kuma, akan baiwa mutum karamar yarinya ya aura, kodai saboda mai hannu da shuni ne, ko kuma saboda wani mukami da yake dashi, ko kuma saboda wani dalili na samin abin duniya, wasu kuma suna yiwa diyarsu auren dole ne ta hanyar hadin zumunci ko kuma kulla alaka tsakanin iyaye ko kuma abokai.

Ko shakka babu iyaye sunada rawar takawa mai yawan gaske wajen fitarwa da diyarsu mijin da zata aura, domin sun fita hange da sanin yakamata, kuma addini ya basu dama, kamar yadda addini ya nuna cewa biyayya ga iyaye wajibine, don haka nema Allah yace aljannar ‘ya ‘ya tana karkashin iyayensu.

 A lokacin Manzon Allah anyi wani mutun da ake kira da suna Mughir wanda Allah ya jarrabe shi da tsananin son wata mata da ake kira da suna Barira, amma kuma cikin ikon Allah ita kuma duk duniya babu wanda bataso irinsa (Mugheer), har saida takai yana bin ta a hanya, yana kuka, yana rokonta, da ta soshi, amma ita kuma ta kekasa kasa. Wata  rana sahabbai suka ga irin halin da mughir ke ciki, suka cewa manzon Allah shin baza kashiga cikin al’amarin Mughir da Barira ba, Manzon Allah Salallahu Alaihi Wasallam, da kansa yace hakika anjarrabi Mughir da soyayyar Barira. Manzon Allah ya taka da kafarsa mai daraja, yaje wajen Barira da kansa Salallahu Alaihi Wasallam, ya ce yanzu Barira baza kiso Mughir ba! Ta ce ya Manzon Allah! kana bani umarni ne, ko kuma kana bani shawara, yace ina baki shawara ne salallahu Alaihi Wasallam, ta ce ya Manzon Allah bana sonsa, haka Manzon Allah ya taso yana mamakin irin yadda zuciyar Barira bata nutsu da Mughir ba duk kuwa da irin yadda yake nuna soyayya a gareta. Ya  ‘yan uwana da auren dole yana da muhalli a musulunci da Manzon Allah ya umarci Barira ta auri Mughir sai dai baiyi hakan ba. Wannan shi ya nuna mana cewa addinin Musulunci bai yarda da auren dole ba, domin da ana yi, da saboda yadda Manzon Allah ya tausayawa Mughir da ya umarce ta da ta aureshi amma haka ya bata cikakken ‘yancin ta salallahu alaihi wasallam.

Yaka mata iyaye su sani cewa ‘ya ‘ya suna da kimar da shariah tabasu wajen zabar mijin da zasu aura, kuma auren dole babu abin da yake haifarwa sai bacin tafarki, da kuma, dana sanin da batada amfani. Galibi auren dole ke sanya karuwanci da yawon banza, harma da wasan kwaikwayo da kananan yara mata suka tsunduma cikin harkar gadan gadan, wanda da zaka ji tabakinsu sai kaji dalilin auren dole da kuma mutuwar zuciya yasa su wannan harkar.

Ko shakka babu illolin da suke tattare da auren dole sun bayyana karara kamar wata daren sha biyar a wannan zamanin, kuma yaka mata iyaye ayi hattara. Sannan akwai wani al’amari muhimmi, shi ne tarbiyya, galibin iyaye musamman maza sunyi sakaci da al’amarin tarbiyyar ‘ya ‘yansu mata inda suka barta a hannun iyayensu mata, haka suma mazan ina ganin matukar iyaye sun baiwa diyarsu tarbiyya mai kyau babu yadda za’ayi su bata zabi ta kauce masa. Kuma sannan iyaye maza babban laifin yana kanmu domin galibi bamu fiya nunawa ‘ya ‘yanmu mata soyayya ba kamar yadda muke nunawa maza, wannan ce ta ke sanyawa da yawan ‘yan mata basu da kwarin gwiwa akan iyayensu maza, saboda suna ganin kamar babu su a cikin yadda ake dama al’amura, ba’a neman shawararsu ko jin ta bakinsu.

Zaka ga uba baitaba sayawa diyarsa kayan kwalliya ba, bai san ya ta ke da wannan janibi na larura ba, domin mata tamkar kayan Karau ne, dole sai ana kula da su kuma ana bibiyarsu, kai hattana ma irin audugar da mata ke anfani da ita wani uban bai sani ba yaya diyarsa take yi, ba’a neman shawararsu anmaidasu tamkar bayi ba ‘ya ‘ya ba. Don Allah amatsayinka na mahaifi taya ‘yarka zata fahimci kana kaunarta bayan baka kulawa da duk wani al-amari da ya shafeta ba. Amma matukar zaka kula da ita ka saya mata kayan kwalliya akai-akai, da audugar mata da janyo ta ajiki, da nuna mata muhimmancin da ta ke da shi a rayuwa, dole idan ka nuna mata hanya tabi ko da kuwa ya ci karo da muradinta, amma muddin ana samun akasin haka dole shegu suyi yawa acikin gari, da masu yawon ta zubar, da ‘yan daudu, da ‘yan gud ebini kai harma da barayi da kasha-kashe; kamar yadda wani mawakin Nijar ya ke cewa “ashe mata mu bayinsu ne, komai dansu muke”. Kuma wannan maganar tasa haka take, kusan duk wani fadi tashi da muke a rayuwa karshe wajen mata ya ke komawa, idan kuwa haka ne to bai kamata mu yi sakaci da wannan janibi ba.

Haka Kuma, suma a nasu bangaren, iya ye mata suna da tasu gudunmawar da suke badawa wajen sagewa ‘ya ‘yansu mata gwiwa, domin suma basu cika tattaunawa da ‘ya ‘yansu mata ba, suna jin matsalolinsu na rayuwa da kuma na zamantakewa, tare da basu shawarwari akan irin tunanins da kuma irin hukuncin da suke kokarin yankewa rayuwarsu, an maidasu kawai tamkar ‘yan aiki, ba su da wani amfani illa su yi wanke-wanke da shara da dora sanwa da yiwa yara wanka, dole iyaye mata su janyo su ajiki da nusar dasu yadda raywa take da nuna musu suna da muhimmanci a rayuwa, kamar yadda suma Iyaye maza wannan wajabci bai saraya akansu ba; da iyaye suna haka, da babu wasu da zakaji sun fito suna babatun ‘yancin mata wai andanne masu hakki. Kaji wai matan da suka kasa zaman aure, su ke son samowa na cikin gida ‘yanci da walwala da jin dadi, duk kuwa da cewar ana danne hakkokin mata da yawa a gidajen aure.

Sanin kowanne magidancine yanzu musamman wanda yake da mota yadda ‘yan mata ke rububinsa daga ka tsaya abakin titi sayan wani abu, sai kaga yarinya tazo ta dauka ko dan ita ka tsaya, anan ya kamata duk wani magidanci yayi karatun ta natsu shin wadan nan ‘yan mata wane dalili ya sanya su wannan harkar, shin da ‘yar kace ta ke wannan hali ya zakaji abin a ranka, akwai takaici kwarai da gaske ganin wadan nan yara mata da zaka ji ta bakinsu sai kaji auren dole za’a yimusu shi ne suka gudo, ko kuma ma anyi auren ta gudo. Allah ya shirya mana ‘ya ‘yanmu, kuma yabamu ikon yimasu adalci gwargwadon iko, sukuma Allah ya sanya tsoron sa azukatansu su fahimci cewa iyaye suna da matukar muhimmanci arayuwa.

Yasir Ramadan Gwale

yasirramadangwale@gmail.com

http://yasirramadangwale.blogspot.com

www.facebook.com/yasirramadan.gwale

Hukuncin Wanda Ya Yi Kisan Kai Bisa Ganganci: tare da Sheikh Jafar Adam

Hukuncin Wanda Ya Yi Kisan Kai Bisa Ganganci

Tare da

Shiekh Ja'far Mahmoud Adam

Ya yan uwa musulmi, yana daga cikin manufofin shari'ar musulunci tsare rayukan bil'adama tsare jinin su, don haka ne nassoshi suka zo acikin alkurani mai girma da abin da ya inganta na hadisan manzon Allah salallahu alaihi wasallam, wadan da suke nuna haramcin jinin bil'adama mu samman dan adam musulmi.

Ubangiji ta'ala ya yi wannan bayani ta hanyar salon zance da ban da ban, ta hanyar nau'ikan magana da ban da ban, Salon zan ce na farko. Ubangiji ta'ala ya wajabta kisasi (ramuwar gayya) ga dukkan wanda ya kashe musulmi da ganganci, hukuncin sa shi ne a kashe shi, dukkan wani mutum da ya kashe musulmi da ganganci ya yi amfani da wani abu wanda ya iya zare rai, ya nufi dan uwan sa musulmi ya aiwatar da wannan makamin akan sa har ya kashe shi, to shi ma akamashi a kashe shi ko shi kadai ne, ko su da yawa ne, sai dai fa idan dangin wanda aka kashe musu dan uwan su suka ce sun yafe, zasu karbi diyya, to sai a basu diyya.

To amma idan ba hakaba hukuncin su da Ubangiji Ta'ala ya nassanta shi ne kisasi, ko da mutum daya ne, ko biyu, ko uku, ko sama da haka, sukayi taron dangi suka kashe mutum daya, kuma hakan ya tabbata, ta hanyara tabbatar da laifi a addinance, a musulunce, hukuncin su shi ne akamasu a kashe su gaba dayan su; Kamar yadda aikin Umar bin Khaddab ya nuna lokacin da wani adadi na wasu mutane suka yi taron dangi suka kashe wani mutum daya su kadai, Umar ya ce a kashesu su duka, wadansu suka yi masa inkari da cewa ya ya za a yi ace a kashe rayuka da dama bayan rai daya suka kashe, Umar ya ce wallahi inda mutanan birnin san'a za su hadu su kashe rai daya to wallahi da na kashe su gaba daya.

Hikimar hakan cikin shari'ar musulunci, shi ne in da ace ana yin kisasi ne kadai idan mutum ya kashe mutum daya za'a kashe shi, sai wanda zai yi kisan ya raba goran gayyata ga abokansa, ko yan uwansa, su je, su kashe wane, don sun san insunyi baza a kashe suba, gobe kai ma idan kana jin hashin wani sai karaba goran gayyata ga wadan da zasu taya ka fada domin kuje ku kashe wane. Wannan sai ya bayu zuwa ga hasarar rayuka, amma idan mutum biyu ko uku ko sama da haka sukayi haka aka kashe su,wannan zai sa dukkan wani da da wani ya rabawa goron gayyata cewa zaka rakani in kashe wane to bazai je ba saboda yasan idan ya aikata hakan to zai bayu zuwaga akashe shi, don haka sai rayukan mutane su zauna cikin aminci. Allah ta'ala yana cewa "lallai kuna da tabbatacciyar rayuwa a cikin kisasi matukar an tabbatar da kisasi a bankasa, wanda duk ya kashe wani da ganganci da kowanne irin dalili cikin dalilai to shi ma za'a kama shi a kashe shi"  to wannan sai ya bayu zuwa ga tsare rayukan mutane, kisa ba zai yaduba a bankasa da kowanne irin dalili cikin dalilai. wannan salon magan na farko kenan.

     Salon magana na biyu, Ubangiji Ta'ala ya saukar da narkon azaba da firgitarwa da rudarwa da kidimarwa ga dukkan mutumin da ya kashe mumini da ganganci yana ji yana gani sakamakon sa wutar jahannama, zai dawwama a cikin ta ubangiji ta'ala ya yi fushi da shi, ya tsine mashi, sannan yayi masa tanadin azaba maigirma. kaji irin wannan firgici, ka ji irin wannan razani, ka ji irin wannan tsawa, da ya sauka cikin suratul Nisa'i domin aja hankalinka aja hankalina kada kayi dukkan wani yunkuri na zubar da jinin dan uwanka musulmi bisa ganganci.

    Salon magana na uku, Ubangiji Ta'ala ya nuna cewa duk wanda ya kashe mumini da ganganci, to baya cikin siffofin muminai nagari, wadan da ubangiji ta'ala ya jero siffofin su a cikin suratul furqan a inda Allah ta'ala yace "sune wadan da basa kiran wani tare da Allah, suna kiran Allah ne kadai dan jawo amfani ko dan ko dan dauke musu wata cuta, sannan ba sa kashe wata rai da Allah ya haramta kisan ta sai ta hanyar gaskiya da adalci”.  Sannan  kuma cewa mumini baya kisan kai, wannan dalili ne da yake nuna cewa idan kuna son kalmar adalci ta tabbata a kanku to kuyi iyakar kokarinku na tsare jinin yan uwan ku musulmi.

    Sannan salon magana na gaba, Ubangiji ta'ala ya danka amana ko ya bayara da iko a hannu wadan da aka kashe wa dan uwa da ganganci, dangin duk wanda aka kashe bisa ganganci. Haka ya ce ya basu iko duk wanda aka kashe bisa ganganci ya bada dama ga yan uwan sa, a hannun dangin sa ko makusantan sa, wannan iko kodai su nemi a basu diyya, ko su nemi a kashe wanda da ya kashe musu dan uwansu, Allah ya basu kowacce daya daga cikin biyun nan a matsayin zabi in suka zabi na farko ya yi in suka zabi na biyu ya yi.

     Bayan haka ubangiji subahanahu wata'ala, ya nuna tsare jinin mumini, tsare jinin musulmi, kare jinin dan uwanka musulmi, wannan daya ne daga cikin wasiyyoyi guda goma da Allah ya kebanci al-ummar manzon Allah dasu, wadan da suka zo a jere cikin "suratul An'am" Ya ‘yan uwa musulmi! Manzon  Allah sallalahu alaihi wasallam, ya labarta mana cewa dukkan wani mutum da ya kashe dan uwansa da ganganci, to za a zo dasu, ranar alkiyama sai wanda aka kashe ya rike wanda ya kashe shi, hannun sa yana kan zankonsa ya ja shi sutafi gaban Ubangiji Ta'ala ya ce ya ubangiji tambayi wane, me nayi ya kasheni? Alokacin  da zai fadi haka jijiyoyin wuyan sa suna furzar da jini domin a halartowa da makshin munin hotan abin da ya akata a gidan duniya, yace tambayi wane me nayi ya kashe ni akan wanne dalili? banbancin siyasa, ko addini, ko manufa, zai ce ya ubnagiji tambayi shi me nayi ya kashe ni. Haka hadisi ya tabbata acikin Sinanu Nisa'i wanda ya ke hadisi ne sahihi.

   Ya yan uwa musulmi, addinin musulunci a lokacin  da yake haramta kisan kai, ba wai yana haramta zubar da jinin muminai ba kadai! a a hatta daga cikin kafirai wanda shariar musulunci ta kare masu jinin su da dukiyoyinsu, to in ya zamto dokokin Allah da ya saukar ta haramta zubar da jinin wanda bai furta kalmar shahada ba, jinin wanda ya ce Allah uku ne, wanda ya ce Uzairu Binullah! To  ya ya kima da daraja da tsada ga jinin wanda ya ce ya shaida babu abin bautawa bisa cancanta da gaskiya sai Allah, kuma Annabi Muhammad Manzan Allah ne.

Haka kuma, kafiri wanda kuka yi yarjejeniyar zaman lafiya tsahon wasu shekaru kan cewa ba za ku yaki juna ba a iya wannan sheakarun na yarjejeniya, to haramunne ka kashe daya daga cikin su ko ka kwace dukiyar sa, sai wadan da kuka yi yarjejeniyar basu rushe ko wanne irin sharadi ba na yarjejeniyar, kuma  baku tallafawa wasu ko wani akan ya yake su ba. To,  irin wannan, ku tsare masu alkawarin su na tsahon lokacin da kuka yi alkawarin da su, alokacin inda zaku kashe wani kafiri to wanda yayi kisan, Manzan Allah ya ce tsakanin sa da Al-jannah tshon tafiyar shekara dari biyar, haka ya bayyana acikin hadisi sahihi, ga shi kuma arne ka kashe ba musulmi ba, to ina ga dan uwanka musulmi! Ka  dauki bindiga da kowanne irin dalili cikin dalilai ka rabashi da rayuwar sa, to kai kuma kayi me a bankasa? kuma mu duba muga "Al-mu'utamalun" wadan da yaki tsakanin ku da kasar su wanda akace inda daya da ga cikin su ya nemi izinin zuwa kasar ku, kuma ku ka bashi dama ya zo yayi iya ka kwanakin da zai yi, to wajibine ku tsare masa jinin sa da dukiyar sa har ya gama iyakar kwanakin da zaiyi, kuma ku yi masa rakiya har sai kunje inda zai ji ya amintu daga gare ku. Wannan ya na nuna kulawar shari’ar musulunci da dokokin Allah dangane da tsadar rayuwar biladama, ko da ya ki da aka shar’anta mana ba wai an halarta mana shi ne kawai don malalar da jinin kafirai ba, manufar shar’anta yaki ne idan kafirai suka furta kalmar shahada bisa ga zabin su sai a kyale musu jinin su, wannan tasa idan kafirai sukaki su furta kalmar shahada amma zasu shiga cikin "amman dinku" wato karkashin gwamnatinku, ku kyale su akan addinin su, baza ku kashe su ba. Ashe da manufar itace kisa to da idan amfito sai an kashe mutum koda ya yi kalmar shahada, sai ace ai anriga anfito lokaci ya kure me yasa yaki yi kafin a fito, da manufar itace kisa to da babu yadda za'a ce an samu wasu kafiran amana wadan da zasu zauna karkashin daular musulunci, kuma a tsare musu jinin su da dukiyar su ba tare da anribace su ba.

 To wannan ya nuna cewa addainin musulunci addini ne da yake kare rayuwa, ba na salwantar  da rayuwa bane, duk wanda dokokin addini suka ce a salwantar da rayuwarsa, to idan ka duba zaka ga babu abin da yafi dacewa sama da a salwantar da ratuwar sa, shi yasa kafirai duk kafircin su duk barnar da sukayi a bankasa, Allah ya ce idan sun tuba ta hanyar furta kalmar shahada sun bayar da zakkah, kar a kashe masu rayukansu kar a ribace su, to ina ga dan uwanka musulmi wanda ba tuba ya yi ba, dama can shi musulmi ne, bawai tuba yayi ba, yana sallah, yana zakkah, yana karatun al-qurani, da salati da istigfari gwargwadon iko, yana yi, tare da haka kace zaka rabashi da rayuwar sa da wanne dalili cikin dalilai.

Ya yan uwa dalilan da suke sanya mutane kisan kai suna da yawa, amma ga misali, yan fashi da makami wanda zasu kashe mutum don su kwace dukiyar sa sawa'un a cikin gidan sa ko akan hanya lokacin da yake tafiya a kashe shi don a kwaci dukiyar sa, to wadannan Allah ya fadi sakamakon su acikin Al-qurani hukuncin su shi ne akashe su ko a tsire su ko a yan ke musu kafar dama da hannun hagu ko kuma akore su daga kasar musulmi.  

Haka kuma, ‘yan ta’adda wadan da su ba dukiyarka suke da bukata ba, rayuwarka kawai suke son dauka, saboda kawai wata manufa ta duniya da suke fatan samu, sannan da tunanin watakila kana iya zamar musu barazana wajen samun abinda suke son samu.

Wannan dai Khudba ce da Marigayi Shiekh Jafar Adam ya gabatar a masallacin Juma’a na Dorayi a lokacin da yake raye. Muna addu’ar Allah ya kai rahama gareshi, ya kyauta makwancinsa.

Yasir Ramadan Gwale

yasirramadangwale@gmail.com

http://yasirramadangwale.blogspot.com

www.facebook.com/yasirramadan.gwale

    

Wa’azin Sheikh Jafar Mahmoud Adam Na Karshe a Duniya Kuma Ga Matasa Da ‘Yan Siyasa

Wa’azin Sheikh Jafar Mahmoud Adam Na Karshe a Duniya Kuma Ga Matasa Da ‘Yan Siyasa

Wannan Nasihar Marigayi Sheikh Jafar Mahmoud Adam Rahimahullah  ya gabatar da ita ne a ranar Alhamis 25/Rabi’ul Auwal,1428. wato dai-dai da 12th April, 2007. Ya gabatar da wannan Nasihar a daren Juma’ar da aka kashe shi, a wajen muhadarar da aka shirya a masallacin Juma’a na Usman Bin Affan dake kofar Gadon kaya. Bayan dawowar sa daga garin Bauchi.

Ita wannan muhadarar malamai uku ne suka gabatar da ita daga cikin su akwai sheikh Dr Muhammad Sani Umar R/lemu da Malam Muhammad Aminu Ibrahim Daurawa da sheikh Muhammad Nazeefi Inuwa. Wadannan sune malaman da suka gabatar da wannan muhadar, amma kasan cewar sheikh Jafar ya dawo daga tafiya ne sai aka bashi minti goma yayi ta’aliki. Ga kuma yadda ta’alikin nasa ya kasance :

Bayan Mallam ya yi godiya ga Allah, tare da yin salati ga manzon Allah salallahu alaihi wasallam,  sannan ya yace “ya yan uwa musulmi abin da zan fada a nasiha ta ta karshe ’’ Allahu akbar wato wannan jumla ita Mallam ya fara bude maganarsa da ita, kamar  yasan cewa washe gari juma’a zai riga mu gidan gaskiya, sai yaci gaba da cewa “Muji tsoran Allah,  mu duka, muda zamuyi zabe’’ wato ya yi wannan Nasihar ne ana jajiberin tsamiya na zaben gwamnoni da na ‘yan majalisar jihohi,  Sannan ya ci gaba da cewa “ muda zamuyi zabe  da kuma wadan da za’a zaba.

Asalin zaben nan malamai sunyi bayanin sa. Dukkan mutumin da zaka zaba, to ya zama cewa zaka zabe shi ne ba don maslahar ka ba kai kadai, sai don maslahar al’umma gaba daya. Akwai mutanen da suke fama da kuncin tunani, wadan da su tunanin su me zasu samu a karkashin dan takara, sannan su ce a zabe shi; ko kuma me suka rasa suce kada a zabe shi. Inda dan takara zai zo yabani naira miliyan goma ni kadai a matsayi na na Ja’afar amma ya ha’inci alummar da yake wa mulki ta hanyar sauran bukatunsu, wadan da a asusun gwamnati akwai kudaden da za’a iya wadan nan bukatu amma yaki yi, Ni kuma in kalli miliyan goman nan ince ku zabe shi. To hakika na ci amanar kaina, kuma na ci amanar ku talakawa bayin Allah, shi kuma shugaba na haince shi. Inda shugaba zai hana ni ko kwabo, amma ya zanto kudaden daya karba daga asusun gwamnatin tarayya ya aiwatar da su ta hanyar da ta dace. To wajibi na ne, in kiraye ku cewa ku zabe shi. Ba a dauki ma’aunin na ni me na samu ko me na rasa ba, masu irin wannan sune wadan da suka jahilci Addini kuma suka jahilci rayuwa. Domin wannan shi ne yakai Nigeria cikin halin ka-ka-ni-ka-yi. Ganin in amfana ni kadai ko kuma a bude mana wata kafa mu yan tsiraru shi ke nan sai muyi shiru alhali mun san abin da shugaba yake yi ha’inci ne,amma sai mu daure masa gindi,hasali ma mu dinga kuruta jama’a cewa dole ne su zabe shi, ba don komai ba sai don  abin da bai taka kara ya karya ba.

 To wannan kuntataccen tunani ne, kuma rashin hangen nesa ne rashin sanin ya kamata ne. Kullum zaka kalli me muka samu na ci gaba,  ba me ni kadai na samu ba ’’ Allahu akbar sai malam ya kara da cewa “ ina kira ga ku matasa ku lura da yadda ake amfani da ku ’’malam ya buga wani misalin abin da ya gani yayin da yake dawowa daga tafiya sai yace “ Da zu na shigo kano dab da lokacin sallar maghriba kafin zuwana nan sai naga wadan da suke kanfen (campaign) wato da alamu anyi yawo da su cikin garine za su koma gida. Naga yara matasa an ciko su akan akorukura su kusan hamsin acikin motar nan kai da ganin su babu wanda ya yi sallar azahar ballan tana la’asa kuma galibin su da alamun sun bugu mota tana ta layi dasu suna ihu suna dauke da hotuna suna sai wane sai wane kuma su wadan da suke bada kudi ayi hakan ciki babu ‘ya ‘yan su, nasu suna can, sun kai ‘ya ‘yan su mayan makarantu na cikin gida ko na waje. Wannan shi ne hakikanin cin amanar al-umma, kai wannan shi ne kakikanin rashin mutunci, ka haukata ya yan talakawa bayan ka yinwatar da su ka kuma ka jahiltar da su babu ilmin addini babu na rayuwa su kashe lokaci mai tsaho suna dauke da hotunan ka kan kana son ka tsaya zabe a wani mataki na zabe. Akan abin da za’a basu wanda bai gaza Naira dari uku ko da hamsin ba.

Sannan mallam ya cigaba da nanata maganar sa ta farko inda yace “Hakika wannan ya kamata ayi hattara, duk wanda zamu zaba, kada mu kalli me ya bamu, mu kalli dacewar sa da cancantar sa. Duk wanda zamu zaba ya kasance ya cancanta ko yabamu kudi ko bai bamu ba. Duk wanda bai cancanta ba to ko yabamu fan taba sama to mu kadashi wannan shi ne gaskiyar lamari, amma idan ku ka tsaya da jahilci da kuntatacciyar kwakwalwa ta ni an bani kaza ni naci kaza. To wannan tunani na ci bayane ba tunani ne na wanda yasan abin daya kamata ba’’.

Sai malam ya kara da cewa “Abin haushi da takaici hatta wadan su masu Magana da yawun Addini akwai masu irin wannan kuntataccen tunani ubangiji ta’ala ya yi mana gamdakatar’’.

Allahu akbar wannan it ace Nasihar da malam ya yi ta karshe ga matasa kai dama dukkan wani mutum mai hankali. Bayan an kammala wannan muhadarar da niyyar washe gari juma’a malam zai yi khudba akan zabe. Ranar juma’a da asubahi malam yana cikin sallah, ya karanta suratul Ma’arij aka samu wasu mutane miyagu azzalumai makiya Allah makiya san cigaban Addini, suka yi masa harbi da bindiga ba sau daya ba, ba sau biyu ba, kisan gilla inda suka harbe shi a kirjinsa na gefen hagu.

Anan muna rokon Allah ta’ala ya sa malam ya yi mutuwar shahada kuma ya karbi shahadar sa, Allah ya kyautata bayansa, ya sanya Albarka a cikin iyalansa da zurriyarsa. wadanda suka aikata wannan aiki na ta'addanci a’ansa, su sani wannan tafarki da Mallam Jafar ya mutu akansa, kamar wata bishiya ce da bata tsiro bata tofo har sai mun shayar da ita da jinin jikinmu, wannan abu ko kadan bazai sanyamu mu yi rauni ba akan wannan tafarki. Allah ya daukaka Musulunci da Musulmai, ya Allah kada ka baiwa azzalumai dama domin su cutar da al’umma.

Yasir Ramadan Gwale

yasirramadangwale@gmail.com

http://yasirramadangwale.blogspot.com

www.facebook.com/yasirramadan.gwale

Mallam Nasiru el-Rufai: Dangajere Kusar Yaki!

Mallam Nasiru el-Rufai: Dangajere Kusar Yaki!

Kamar yadda tsohon mataimakin Shugaban kasa Alhaji Atiku Abubakar ya taba fada a wata hira da ya yi da Jaridar This Day, cewar tsohon shugaban kasa Olushegun Obasanjo ya buka ce shi da ya zabo masa mutum mai jini a jika kuma wanda ba shi da tsoro, wanda idan ma ta kama zai iya yin akuya ga mahaifiyar obasanjon don ya bashi mukamin ministan babban birnin tarayya Abuja saboda ya dai-daitawa mutane sahu daga karkacewar da ya yi. Atiku ya shaidawa Obsanjo cewar Nasan wasu mutane guda biyu abokai da Allah bai sanya sun taba hada hanya da tsoron wani mahaluki ba a fadin tarayyar kasar nan, daya daga cikinsu kuwa shi ne Nasiru el-Rufai, wanda a lokacin shine shugaban hukumar sayar da kadarorin gwamnati ta kasa (Director General  Bureau of Public Enterprises (BPE) and the Secretary of the National Council of Privatisation).

Tabbas Mallam Nasiru el-Rufai ya nuna cewar shi ba matsoraci bane, lokacin da majalisa ta zo tantance shi a matsayin mutumin da za’a nada minister. Domin idan zamu iya tunawa anyi dauki babu dadi da el-Rufai kafin a nada shi minister, inda aka nemi ya bayar da cin-hanci shi kuma ya yi kememe ya ki bayarwa, wanda wannan ta sanya wasu da yawa daga cikin shugabannin majalisa a wancan lokacin jin kunya ciki kuwa harda Mataimakin Shugaban Majalisar Dattawa Sanata Nasir Ibrahim Mantu, inda el-Rufai ya bayyana a majalisa dauke da al-qur’ani a hannunsa ya yi rantsuwa cewar an nemi hanci daga wajensa, kuma shi Mantu ya karyata, inda el-Rufai ya bukaci Mantu shima da ya rantse da Al-qur’ani amma hakan ta gagara inda ya ce shifa bashi da tsarki duk kuwa da cewar akwai makewayi a majalisar, kusan zamu iya cewa tun a wannan lokacin el-Rufai ya nuna jarumtaka da tabbatarwa da duniya cewar shifa ba mutumin banza bane. Wannan namijin kokari da bajinta da el-Rufai ya nuna, shi ya sa jihar Georgia da ke kasar Amerika ta bashi izinin zama dan wannan jihar, wanda yanzu haka el-Rufai yana daga cikin ‘yan Najeriya da suke zuwa kasar Amerika ba tare da anyi musu binciken kwakwaf ba.

Lokacin da Mallam Nasiru el-Rufai ya zama babban ministan babban birnin tarayya ya nuna babu sani babu sabo. Domin ya kau-da duk wasu gine gine da akayi ba bisa ka’ida ba, ciki kuwa harda gidan matar shugaban kasa marigayiya Stella Obasanjo da gidan shugaban PDP na wannan lokacin Sanata Amadu Ali da wasu manya manyan kusoshin gwamnati a wancan lokacin. Haka dai el-Rufai ya ringa sanya gireda yana ma-ke duk wani gini da aka gina shi ba bisa kai’da ba a Habuja. Mallam Nasiru el-Rufai kusan shine ministan Abuja mafi dadewa a tarihin wannan birni tun daga 1999 har zuwa 2007, kuma ya yi aiki dai-dai nasa.

Tun da Marigayi Mallam Umaru Yar’Adua ya zama shugaban kasa el-Rufai ya tsallake yabar kasar nan inda ya tafi kasar Amerika ya koma makaranta, ya halarci kwasa kwasai da dama a fannoni daban daban, ciki kuwa harda katafariyar Jami’arnan ta Harvard, kadan daga Makarantun da el-Rufai ya halarta sun hada da Jami’ar Ahmadu Bello University, Zaria, Najeryia, Jami’ar London ko University of London a Burtaniya da Harvard Business School,  Arthur D. Little School of Management a birnin Massachusetts da Georgetown University da School of Foreign Services a birnin Washington dukkaninisu a kasar Amerika da kuma D.C. da John F. Kennedy School of Government da Harvard University duk dai a can Amerika. Sannan el-Rufai yana da babbar Lambar yabo ta kasa wadda ake kira  OFR (Officer of the Order of the Federal Republic of Nigeria) wadda aka bashi tun yana BFE, kuma yana da digirin girmamawa wanda Jami'ar Abuja ta Bashi a 2005 wato Doctorate Degree.

Bayan da el-Rufai ya dawo gida Najeriya, ya fada Jam’iyyar adawa ta CPC inda ya mara baya ga takarar tsohon shugaban kasa Gen. Muhammadu Buhari duk kuwa da ana kallon zai goya baya ne ga takarar babban abokinsa wato Mallam Nuhu Ribadu. A halin yanzu dai Mallam Nasiru el-Rufai shi ne babban bakaniken jam’iyyar ta CPC wadda Buharin ya dora masa wannan nauyi na dai-daita sahun jam’iyyar kamar yadda a yiwa birnin tarayya Abuja, saboda fama da matsaloli da jam’iyyar ta ke yi a kusan daukacin jihohin kasarnan.

Bayan haka kuma, el-Rufai shi ne kusan mutum daya tilo wanda tauraruwarsa ke haskawa wajen adawa da gwamnati mai ci ta Goodluck Jonathan da kuma Jam’iyyar PDP. Mallam Nasir el-Rufai ya dauki lokaci yana sharhi akan kasafin kudi na wannan shekarar ta 2012 inda ya yi kaca-kaca da wannan gwamnatin ya nuna ma basu san me suke yi ba. Hakan ta sanya el-Rufai ya dinga daukan hankalin jama’a a ciki da wajen kasarnan wajen yadda yake fashin baki a harkar tafiyar da wannan gwamnatin musamman a harkar da ta shafi tattalin arziki, wannan ta sanya jami’an SSS suka ringa sanya masa tarko suna kamashi a kusan duk lokacin da zai yi wata tafiya zuwa kasashen waje, haka nan yake tsallake irin wannan turaku da ake sanya masa.

Bahaushe ya ce al-kalami ya fi Takobi, lallai wannan magana haka ta ke, domin shakka babu wannan gwamnati mai ci babu wani alkalami da ta ke jin tsoro a kullum kamar na el-Rufai, domin sun san cewar mai ilimin gaske ne kuma masani ta fannoni da daman gaske. Mallam Nasiru el-Rufai dai idan ka ganshi irin mutanan nan ne da zaka gansu ‘yan tsirit wato ba shi da wani cika ido, wannan ce ma ta sanya abokansa suke masa lakabi da sunan GIANT wato wani babban mutum kamar dai yadda Bahaushe yake ce wa gajere malam dogo. Lallai kam ya zuwa yanzu babu wani daga cikin ‘yan Adawa wanda tauraruwarsa take haskawa kamar el-Rufai ba, kuma duk wannan ya faru ne ta sanadiyar al-kalaminsa da yake caccakar wannan gwamnati da shi. Tabbas maganar Bahaushe gaskiya ce da ya ce Alkamai ya fi takobi, domin idan da fada za’a iya da takobi watakila da farat daya za’a gama da el-Rufai amma da yake fadan na alkalami ne, babu yadda aka iya da shi sai dai a kayar da shi da hujja idan ana da ita.

Lallai Najeriya tana bukatar mutane masu gaskiya wadan da zasu iya yakar cin-hanci da rashawa da gaskiya kuma hazikai irinsu Mallam Nasiru el-Rufai.

Yasir Ramadan Gwale

yasirramadangwale@gmail.com

http://yasirramadangwale.blogspot.com

www.facebook.com/yasirramadan.gwale

CPC Ba Su Da Kwarin Gwiwar Cin-zaben 2015

CPC Ba Su Da Kwarin Gwiwar Cin-zaben 2015

“Ina fatan duk mutumin da zai yi min martani ya tabbata ya karanta abinda na rubuta har karshe.”

Bisa ga dukkan alamu wannan zaben na 2015 da yake tunkaromu Jam’iyyar Hamayya ta CPC bata shiryawa cin zaben da gaske ba. Don bayanai da rahotanni suna tabbatar da cewar kwarin gwiwar da CPC suke da shi, shi ne idan aka samu hadewa da jam’iyyar ACN, kusan mafiya yawancin ‘yan cpc wannan shi ne tunaninsu cewar idan an hade za’a iya cin zabe. Shakka babu Jam’iyyar ACN jam’iyya ce da ta ke da tsari musamman a inda tayi kakagida wato yankin Kudu maso Yamma ko ka ce yanki Yarabawa, hakika duk wanda ya kalli irin yadda suka mamaye wannan yanki dole ya tabbatar da cewar suna da kyakykyawan shiri, da tsari karkashin Jagorancin Shugabansu Asiwaju Bola Ahmwd Tinubu.

Karkashin Jagorancin shi wannan mutum Tinubu ACN ta karbe ragamar iko daga PDP a jihar Ogun, jihar da ke zaman mahaifa ga tsohon shugaban kasa Olushegun Obasanjo. Wanda wannan ba karamin aiki suka yi ba na karbe ragamar ikon wannan jihar daga hannun PDP duk kuwa da cewar Obasanjo shi ne kusan ya yi uwa ya yi makarbiya a PDP amma kuma jiharsa ta gagareshi, Wani abu da zai baka mamaki da shi wannan mutum (Tinubu) wai shin kudi yake rabawa mutanan yamma suke zaban jam’iyyarsa? Ko kuwa tsabar iya zance ne da iya siyasa? hakika wannan tambaya ta jima tana yimin zillo a raina.

Alamu sun tabbatar da cewar ACN ba burinsu su kafa gwamnati a Najeriya ba. Kawai suna bukatar kasancewar yankin yarabawa ya kasance karkashin Jam’iyyar hamayya, domin a yadda suke ganin sun fi kowa wayewa da sanin ilimin boko, kuma zaben da ya gabata na 2011 ya kara nunawa cewa basu da burin kafa gwamnatin tarayya, kuma da wahala su yarda su yi tarayya da sauran ‘yan Najeriya a cikin Jam’iyya daya, tabbas yau ko da a ce ACN zata kafa Gwamnatin tarayya, lashakka yarabawa sai sun balle sun kafa jam’iyyar hamayya ta daban, domin su sumfi gwammacewa su yi ta kasancewa ‘yan Hamayya ko Adawa, kamar yadda Hausawa muke musu kirari da cewa “Yarabawa masu kwalo-kwalo” shakka babu suna da kwalo-kwalo sosai da gaske. Kamar yadda na ce, duk wanda ya kalli zaben da ya gabata, ACN ta fi mayar da hankalinta ne akan yankin Yarabawa ya ci zabe, sabanin sauran jihohin Najeriya wanda suna ganin idan tayi ruwa rijiya idan kuma bata yi ba daman haka ake zato.

Idan muka kalli yadda ACN suka yi ruwa suka yi tsaki akan shari’ar da suka kai ta jihar Osun wanda Rauf Aregbesola yake zame musu dan takara, nu nace akan wannan shari’ah kwarai da gaske har sai da hakarsu ta cimma ruwa, amma kuma idan muka kalli zaben da ya gabata na jihar Benue shedu da bayanai sun tabbatar da cewar ACN ita ce ta samu nasara a wannan jihar, amma uwar jam’iyyar ta kasa basu maida hankali akan shari’ar wannan jihar ba  kamar yadda suka yi a jihar Osun, wannan ya kara tabbatar mana da cewar ba burinsu su mamaye Najeriya ba illa yankinsu kawai.

Idan kuma, muka sake duba Arewa muka kalli Jam’iyyar CPC da Jagoranta Gen. Muhammadu Buhari, zamu ga cewar tabbas babu wani shiri a kasa na kafa gwamnati a 2015, kullum kawai surutai ake yi a kafafen yada labarai, da tunanin waccan hadewa, babu wanda zai yi shakkar cewa CPC bata da dumbin magoya baya a Arewa, tana da su na ban mamaki kuwa, amma zaka iya kiransu da cewar taron tsintsiya ne babu shara, domin mafiya yawan ‘yan Jam’iyyar nema suke jam’iyyar ta taimaka musu, ba wai su su taimakawa jam’iyyar ba. Kusan tun kafuwar CPC ta kafu da rikici da hayaniya, domin da yawan mutane sun shiga Jam’iyyar da tunanin samun makoma, wasu na ihun sai sun zama shugabanni a Jihohi wasu a kananan hukumomi wasu a mazabu, wasu kuma suna son su zama ‘yan takara ko ta halin kaka. Wannan rikicin ya hana CPC katabus a Arewa, kuma idan ba hankali aka yi ba shine zai ci gaba da mamaye Jam’iyyar har zuwa lokacin zabe mai zuwa.

Akwai dubban mutane suna nan sun dana tarko jira suke lokaci ya yi su zo domin su shiga Rigar Buhari ko suma zasu dace da al’farmarsa domin ‘yan Najeriya su sahale musu, kuma kamar yadda ake kyautata zato ga Jagoran Jam’iyyar Gen. Buhari mutumin kirki ne, haka ya kamata mutanan da ke cikin jam’iyyar su kasance, amma kusan akasin haka ya fi faruwa, domin anyi sake da karnuka da kuraye da muzurai da aladu duk sun shiga cikin jam’iyyar sunyi kaka-gida kuma suna ta yi mata kafar ungulu tare da nuna cewar su sun shigo Jam’iyyar ne saboda Buhari, wanda a zahiri halayyar su da dabi’unsu da ayyukansu sun sha bamban da na Gen. Buhari. Saboda irin wannan kwamacala da rikita-rikitar jam’iyyar CPC ta sanya ala dole, jagoran Jam’iyyar Gen. Buhari ya dauki Jam’iyyar dungurungum ya mikata ga tsohon ministan Abuja Mallam Nasiru el-Rufai ya yi mata garambawul, saboda yakini da yake da shi cewar el-Rufai kwararre ne da zai iya saita jam’iyyar ta zauna kan turba.

Mafiya yawan ‘yan Najeriya duk zatonsu shi ne cewar jam’iyyar CPC ta Gen. Buhari ce. Sai gashi mutane irin su Sule Yahaya Hamma da Rufai Hanga suna ikirarin cewar Jam’iyyar tasu ce su suka kafa ta da sunansu su suka samarmata da ofis da sunansu aka kafa wannan jam’iyya, dan haka sai wanda suke so shi zai tsaya takara a cikin jam’iyyar, wannan ya haifar da yin jabun katin shiga jam’iyyar a nan Kano inda na fito, kai rahotanni ma sun nuna cewar har jabun katin tsayawa takara aka yi tun daga matakin unguwanni har zuwa kananan hukumomi zuwa Jiha, wanda wannan batu kusan haka ya faru a jihohin Kano da Bauchi da katsina da Neja kamar yadda muka karanta a Jaridu kuma wannan ne dalilin da ya sanya uwar jam’iyyar dakatar da zaben shugabannin jam’iyyar a wadancan johohi a ranar Asabar 11 ga watan Disambar 2010.

Kamar yadda muka sani tsarin jari hujja shine linzamin siyasar wannan lokacin. Shakka babu, duk harkokin siyasa baza su yiyuba sai da kudi, to yana daga cikin abinda CPC ta rasa shine wadan da zasu taimakawa Jam’iyyar ko da badan Allah bane. Domin dai dole ka bude ofis a kusan galibin mazabu dole a samar da abinda ake fada da yaren siyasa wato kayan aiki, dole ayi abubuwa da dama wadan da suke bukatar kayan aiki, amma manyan masu kayan aiki da suke a cikin jam’iyyar irinsu Sanata Rufai Hanga da Sule Hamma duk sun shagaltu da yiwa juna kafar ungulu da shatile kafafuwan Jam’iyyar matukar ba nasu bane suka sami takara ba, haka kuma jam’iyyar ta yi wawar asarar mutane irinsu Adamu Aleiru da Gari Mallam a jihar kebbi, da Gamaliya dan takararta na Gwamna a Jihar Taraba da sauransu da dama, ita asarar magoyin baya a siyasa ko da babu abinda yake tsinanawa matsala ce, indai har zai fita bainar jama’a ya ce yabar wannan tafiyar.

A nata bangaren ita ma Jam’iyyar PDP a shirye ta ke na kare kambunta na ci-gaba da rike madafun iko. Shakka babu PDP aiki suke yi tukuru domin samun Nasarar jam’iyyar a 2015, dan haka ne ma suke ta kokarin hadiye ‘yan CPC din. A loakcin da CPC suke ta dogon turanci da yawan mitin tsakanin kaduna zuwa Legas shin a hade tsakanin ACN da CPC ko kuwa, su kuma a nasu bangaren PDP suna nan suna raba dare suna mitin akan ya zasu samu nasara a 2015, Bahaushe ya ce shirin zaune yafi na tsaye, tabbas cpc shirin tsaye suke a yayin da PDP suke shirin zune.

Idan muka kalli zaben gwamnonin da akayi a jihohi biyar wato Sokoto da Adamawa da Kogi da Bayelsa da Cross-Rivers, ya nuna cewar PDP sun shirya tsaf domin fuskantar CPC a 2015, domin da zaben sokoto ya zo kusan ‘yan jam’iyyar musamman gwamnonin Arewa tarewa suka yi a sokoton har sai da suka ga Alu ya kai labari duk kuwa da ana kallon kamar yana takun saka tsakaninsa da shugaban kasa a wannan lokacin, kuma wani abu da zai tabbatar da yunkurin PDP na sake kafa gwamnati, kusan idan mun lura ita PDP duk danta sai ya yi mata aiki, ko da kuwa ba’a zaman lumana da shi a jam’iyyar, idan muka kalli zaben Adamawa kowa yasan akwai tsamin dangantaka tsakanin Atiku Abubakar da Murtala Nyako tun kusan zaben fitar da gwanin da aka yi tsakanin Atiku da Jonathan, amma sai da Atiku ya fito ya taya Nyako yakin neman zabe domin samun nasarar Jam’iyyar PDP.

Kamar yadda Sanata Gemade ya fada a karshen wannan makon cewar tattaunawar CPC da ACN zata sake wargajewa ne, wannan magana ce mai yuwuwa. Domin mutumne ya samu fili ya gina gida yana cikin gidansa sai abokinsa ya zo ya ce ya fita daga cikin wannan gidan nasa ya zo su kafa wani sabon gidan mai kayan alatu! Kaga abu ne da kamar wuya, to kusan haka batun CPC yake da ACN, domin ni kam bantaba zaton cewa ACN zasu saki jam’iyyar da suka sha gwagwarmayar rayata a yankin kudu maso yamma ba, rana a tsaka kuma su ce sun barta sun koma CPC wannan kam da kamar wuya, wai gurguwa da auren nesa. Ko dai shi Buhari ya yarda ya koma ACN dan ya zama dantakararsu na shugaban kasa, ko kuma a dauki dogon lokaci ana ta mitin tsakanin Legas da Abuja da Kaduna har lokaci ya kure daga karshe kuma tattaunawar ta sake karyewa. A sake komawa gidan jiya.

Idan ance za’a hade shin jam’iyya biyu za’a zaba da dantakara guda daya wanda wannan ya ci karo da tsarin hukumar zabe, ko kuwa kamar yadda na fada yarabawa ne zasu bar ACN su koma CPC ko kuwa Gen. Buhari da magoya bayansa ne zasu bar CPC su koma ACN? Lallai amsar wannan tamabayar zata nuna alkiblar inda aka dosa, hakika halin da muke ciki yanzu lokaci yana kara tafiya, kuma yana kara yiwa CPC karanci. Domin dai tsarin hukumar zabe ya ce sai dan takarar ya samu kashi 25 na kuri’ar da aka kada a jihohi 23 sannan ya iya zama shugaban kasa, mu dauki yankin Arewa maso yamma da Arewa maso gabas shakka babu CPC tana da karfi kuma zata samu fiye da wannan kashin da tsarin hukumar zabe ya yi tanadi, mu dauka ma CPC tana da goyon bayan jihohin Arewa 19 wanda ana bukatar sauran jihohi hudu kenan domin samun zabe, wanda kai tsaye wani zai ce dan jihohi hudu ai ba matsala bane, wanda gagarumin aiki ne samun wadan nan kuri’u a jihohi hudu daga kudu, domin kowa yasan cewa mafiya yawancin jihohin kudu dangwale ake yi ba zabe ba. Kuma kar mu manta a Arewa muna da jihar Plateau da Benue wanda ko ana ha-maza ana ha-mata baza su zabi Dan Arewa musulmi ba.

Kuma suma a nasu bangaren masu adawa da CPC zasu yi ta hura mata wutar rikici, su hana jam’iyyar sakat ta yadda zasu sami lagon jam’iyyar a zaben. Tabbas alamu sun nuna cewar wannan shugaban me ci wato Goodluck Jonathan yana son tsayawa wani zaben a 2015, wanda abu ne mai yuwuwa, amma PDP suna da hasashe kuma suna da zurfin tunani, domin idan suka ga cewar GEJ zai kada Jam’iyyar to shakka babu zasu fitar da dan takara daga Arewa wanda zasu marawa baya dan ganin bata bare musu ba, kamar yadda rade-radi yake bayyana cewar ana yunkurin tsayar da gwamnan Jihar Jigawa Sule Lamido da Gwamnan jihar Rivers Rotimi Ameachi, wanda a turance wannan shi ne Plan B na jam’iyyar PDP, domin da su rasa gara su dauko wanda suke ganin zai iya cin zabe ko da kuwa a wajen Jam’iyyar yake.

Yasir Ramadan Gwale

yasirramadangwale@gmail.com

http://yasirramadangwale.blogspot.com

www.facebook.com/yasirramadan.gwale

Mallam Nuhu Ribadu Waliyyi Ne

Mallam  Nuhu Ribadu Waliyyi Ne

Sunan Mallam Nuhu Ribadu ya fara bayyana ne a lokacin da ya jagoranci hukumar yaki da yiwa tattalin arzikinsa zagon kasa da kuma yakar cin-hanci da rashawa a Najeriya, wadda akafi sani da EFCC, hakika ya nuna kwazo sosai lokacin da ya shugabanci wannan hukuma, domin ya kama tare da gurfanar da mutanan da ake ganin baza su iya tabuwa ba a kasarnan, bisa zarginsuko kama su da yin almundahana da dukiyar kasa. Misali bayan da sashi na 308 na kundin tsarin mulkin kasar nan ya baiwa masu rike da mukamin shugaban kasa da mataimakinsa da gwamnoni kariya daga gurfana gaban kowane irin kwamitin bincike ko kotu, wanda wannan sashi ya taimakawa Muggan barayin gwamnoni Jidar dukiyar kasarnan suna kaiwa kasashen Turai da Amerika suna jibgewa, duk da haka Ribadu ya kafa musu tarko, shakka babu wannan ba karamin aiki ya yi ba, ko iya nan ya tsaya, kwalliya ta biya kudin Sabulu.

Bayaga damke tsohon gwamnan jihar Bayelsa DSP Aliemieghsigha, ya kuma kama takwaransa na Jihar Delta Mista Jame Ibori wanda ake ganin babu wanda ya tallafawa takarar marigayi Umaru YarAdua da kudi irinsa, Ribadun karkashin hukumarsa ya zargesu da zambar kudi kusan dubban miliyoyin daloli, rahotanni sun nuwa cewa Mista Ibori ya yi kokarin baiwa Ribadu toshiyar baki ta kusan Dala miliyan goma sha biyar ($15) kimanin Naira Biliyan Uku (N3B) amma Ribadun yaki karba. Sannan kuma ya fallasa irin adadin kudaden da gwamnoni sukayi rubdaciki da su a yayin da suke kan mukamansu, misali inda ya bayyana tsohon gwamnan Jihar Jigawa Ibrahim Saminu Turaki ya yi almundahana da kusan Naira Biliyan 36, da sauran gwamnoni da daman gaske ya yinda wasu kuma suka arce suka bar kasarnan wanda suka hada da tsohon gwamnan Jihar Edo Mista Locky Igbinideon da Adamu Mu’azu na jihar Bauchi da sauransu da dama a wancan lokacin.

Mallam Nuhu Ribadu dai shi ne mutumin da ya sa aka sauyawa Najeriya suna daga ta sahun gaba akan cin-hanci zuwa ta kasas-kasa. Wannan ce ma ta sanya majalisar dinkin duniya ta zabeshi a matsayin wanda zai binkito badakar cin-hanci da rashawa da ta mamaye gwamnatin Afghanistan. Hakika aikin da EFCC ta yi karkashin Jagorancin Ribadu na kokarin tatse mista James Ibori da mayar da abinda ya sata zuwa asusun gwamnati, aiki ne gagarumi kuma irinsa na farko a tarihin Najeriya, amma sai dai wannan yunkuri na Nuhu Ribadu ya gamu da cikas lokacin da Marigayi Umaru Musa ‘YarAdua ya zama shugaban kasa, domin zamansa shugaban kasa ke da wuya aka fara takawa Nuhu Ribadu birki sakamakon taba Ibori da ya yi, wanda a lokacin nan yake da uwa a gindin murhu. Dan shugaban kasa Umaru ‘yarAdua ya sakawa Ibori, ya nemi ya bayarda wadan da yake son a nada mukamai, inda shi James Iborin ya bayar da sunan babban yaronsa Mista Micheal Kaase Aoandoakaa a matsayin wanda za’a nada Babban Antoni Janar kuma Ministan Shari’ah domin ya binne badakar da Ribadu ya bankado ta Ibori, hakan kuwa aka yi Inda Aoandoakaa ya zama ministan Shari’ah kuma ya lalata binciken da Hukumar EFCC ta yi karkashin Ribadu, akan me gidan na Ibori.

Wannan ne dalilin da ya sa Shugaba ‘YarAdua Allah ya jikansa a wancan lokaci da Mista Ibori suka yi ta yiwa Mallam Nuhu Ribadu bita da kulli kawai dan ya ce a dawo da dukiyar da Ibori ya sata, Ribadu dai yaga takansa, domin bayan da aka ce ya koma makaranta kuma aka rage masa mukamin da yake da shi a rundunar ‘yansanda, sannan ma aka ce karatun da ya yi a Kuru dake Jos haramtacce ne, haka dai Mallam Ribadu ya samu ya sulale ya bar kasarnan domin tsira da rayuwarsa daga barazanar su Ibori da ‘YarAdua.

Sai ga shi a ‘yan watannin da suka gabata  Majalisar kasa karkashin jagorancin kwamitin Hon. Farouk Lawal ta gudanar da binciken cin-hanci mafi girma a tarihin kasarnan, inda aka kama manyan mutane da kamfanoni da ci-da gumin talakawa na kusan sama da Naira Tiriliyan daya, hakika ‘yan Najeriya sun yabawa Farouk Lawal bisa yadda ya gudanar da wannan bincike kuma ya kama mutane da yawa da ake ganin bazasu tabu ba. Kwatsam kuma sai gashi daya daga cikin mutanan da aka zarga Mista Femi Otedola yana ikirarin cewar ya baiwa Farouk Lawal din toshiyar baki ta kusan dala dubu dari shida da ashirin ($620) kimanin Naira Miliyan tasa’in da uku (M93), har kuma ya ce yana da faifan bidiyo da yake tabbatar da wannan ikirari nasa. A karshe dai ta bayyana cewar Lawal ya karbi wannan toshiyar baki, inda Jaridun Najeriya suka yi ta ya-madidi da wannan batu.

Idan har za’a ce Farouk Lawal da ya jagoranci wancan binciken cin-hanci mafi girma kuma ya karbi toshiyar baki ta Naira Miliyan 93 kacal ko $620, to Lallai zamu kwatanta Mallam Nuhu Ribadu da cewar waliyyi ne, domin kamar yadda muka fada Ibori ya baiwa Ribadu cin-hancin kimanin Naira Biliyan Uku amma Ribadun yaki karba, inda ya sanar da Babban bankin Najeriya akan wannan batu. Hakika Najeriya tana bukatar mutane irinsu Ribadu wadan da za’a basu irin wadan nan makudan kudi da sunan cin-hanci amma su tsallake.

Sai gashi a kwanakinna kuma wata sabuwa ta bulla, inda Andy Uba, yake ikirarin wadan nan kudi da aka baiwa Ribadu ya ki karba mallakarsa ne. Shi dai Andy Uba wani irin mugun uban gida ne, domin idan zamu iya tunawa shine mutumin da ya hana Jihar Anambara zama Lafiya lokacin tsohon gwamna Ingige. Inda har ya taba sanyawa aka sace gwamnan sukutun saboda yaki yarda da muguwar manufarsa ta raba kason jihar gida biyu a bashi rabi. Koma dai me ye, wannan ya tabbatar da cewar Ribadu bai ci wannan kudi ba, kuma indai Farouk Lawal zai karbi hancin Miliyan 93 kacal to tabbas Ribadu waliyyi ne idan ka kwatanta shi da farouk.

Lallai  Najeriya tana bukatar shugaba wanda zai yaki cin hanci da rashawa da gaske, irinsu Mallam Nuhu Ribadu.

Yasir Ramadan Gwale

yasirramadangwale@gmail.com

http://yasirramadangwale.blogspot.com

www.facebook.com/yasirramadan.gwale