Ziyarar Da Na Kai Cibiyar Addinin Musulunci Ta Al'umma Dake Garin Baltimore

ZIYARAR DA NA KAI CIBIYAR ADDININ MUSULUNCI TA GARIN BALTIMORE

Daga Barack Obama

A yau, cikin ikon Allah na samu zarafin kai ziyara ga katafariyar cibiyar addinin Musulunci ta al'umma dake garin Baltimore. Naga Masallaci inda dubban Musulmi Amerikawa ke haduwa da juna da iyalai dan gudanar da Ibada kamar ko wane irin Masallaci a Amurka, cibiyar waje ne inda dangi da makwabta kan hadu tare da juna suna gudanar da ayyukan Ibada na addini, ga makaranta da yara kan koyi Ilimin addini da zamantakewa, sannan ga sashin bayar da agajin gaggawa, naga mutane da dama da suka bayar da lokacin su kyauta domin aikin hidimtawa al'umma.

Wannan ziyara tawa, wata muhimmiyar dama ce a wajena da zan ganewa ido na yadda Musulmi ke aiwatar da alamuransu na addini, sannan na karfafa musu guiwa wajen taimako da ayyukan sa-kai, sannan kuma na tuna musu cewar Musulmi da yawa sun bayar da gudunmawa mai dumbin yawa a baya domin ciyar da wannan kasar tamu gaba. Kuma wannan ne Babban dalilin da yasa kasarmu abin alfaharinmu ta daukaka a duniya, domin kowanne dan Adam yana da 'yanci da kuma ikon yin addinin sa.

Al'ummatai da dama na Musulmi musamman daga cikin Manoma da 'yan Kasuwa da masu sana'o'i da dama suka taimaka wajen gina tare da bunkasa habakar wannan kasa tamu. Su ne suka taimaka wajen ilmantar mana da 'ya 'yanmu, da yawansu daga masu aikin jiyya da likitoci sun hidimtawa al'umma a wannan kasa ta Amurka. Wasunsu da dama sun samu lambobin Yabo bisa wasu ayyuka da suka na bajinta, ciki kuwa har da karbar lambar Yabo ta zaman lafiya wato Nobel Peace Prize.

Haka kuma, dumbin matasan Musulmi Amurkawa sunyi abubuwa na bajinta da suka Shafi fasaha da kimiyya da kirkire kirkire. Wannan ce ta sanya a koda yaushe mukan hadu domin nuna jinjina da godiya ga irin wadannan matasa, daga cikinsu kuwa, akwai irinsu Mohammed Ali da Kareem Abdul-Jabbar, wanda suka sanya farin ciki da annashuwa da dama a zukatan al'ummarmu. Daga cikin Musulmi a Amurka akwai, 'yan kwana-kwana wanda suke sadaukar da rayuwarsu dan kashe duk wata gobara. Sannan ga kuma 'yan sanda mata da maza wanda suke aiki tukuru dan kasarmu.

Yanzu haka, Musulmi da dama anan Amurka na cikin zullumi da damuwar taka musu hakki ko cin zarafinsu. Iyaye da 'ya 'ya na ta karakaina cikin tsoron taka musu martaba da mutunci, to ya ku ina mai tabbatarwa da duk wani Musulmi a Amurka ba Baltimore kadai ba cewar mu duka Amurkawa ne, kuma mu al'umma daya ne, dan haka duk wanda zai kaiwa Musulmi hari anan to ya sani mu duka gaba dayanmu ya kaiwa hari.

Dan haka, duk wani tsagera ko mara kunya da zai ci zarafin Musulmi akan addinin sa to ya sani ya shirya fada da mu ne baki daya, kuma zamu tsaya kai da fata wajen ganin bamu bari anci zarafin Musulmi a Amurka ba, kawai dan sunce su Musulunci zasu yi. Haka nan kuma, zamu yi fatali da duk wani tsarin siyasa da zai cuzgunawa Musulmi, zamu yi magana da murya daya, ba tare da mun cutar da wani ko wasu al'umma ba akan addinin su. Kuma yana da kyau duknamu mu sani cewar gaba dayanmu daga Allah muke kuma gareshi zamu koma.

A saboda haka, ina amfani da wannan dama na tabbatarwa da dukkan Musulmin Amurka maza da mata cewar, kowannenmu yana da iko da 'yancin da doka ta bashi a matsayinsa na dan kasa. Ku din nan ba wai kawai Musulmi bane ko Amerikawa a'a ku Musulmin Amerika ne, kuna da cikakken 'yancin yin walwal karkashin koyarwar addinin Musulunci. Na gamsu kuma na yadda, al'ummar Musulmi a Amurka mutane ne masu zaman lafiya da fatan Adalci ga kowa.

Wannan shi ne dalilin kawo muku wannan ziyara domin na karfafa muku guiwa, ku sami yakini akan abinda kuka yi Imani da shi, babu mai cin zarafinku sabida addini mu zuba masa ido. Dan haka, idan muka cigaba da kasancewa al'umma daya, zamu sami karfi kuma rauni ba zai riskemu ba. Dole ne kuma mu mutunta bukatun juna. Na gobe, shukran.

Yasir Ramadan Gwale

04-02-2016

Daga Kalaman John Danfulani

DAGA KALAMAN JOHN DANFULANI

"A cikin al'ummar Najeriya su waye suke da yara sama Miliyan 12 da suke yawo kwararo-kwararo suna bara dan neman abinda zasu Ci? " Tambaya mai nuna kalubale!

Wannan maganar ta tsaya min a Rai. Kuma duk da zagi da cin mutunci da John Danfulani yayi mana, ya manta cewa shima dan Arewa . Idan ya ce mana Almajirai to a wajen mutanan kudu har da shi a cikin Almajiran.

A gefe daya kuma maganganun da ya fadi gaskiya, akan yawan barace barace da muke. Ya kamata mu tambayi kanmu Me yasa bama ganin mutanan Kudancin Kaduna suna yin bara? Shin ko ba su da Nakasassau da talakawa ne? Me yasa sai mu ne kawai muke bara da rokon da ?

Ya kamata, indai mun ji haushin maganganun John Danfulani muma mu kalubalance su ta hanyar mayar da martani da Alkinta rayuwar dukkan Almajirai mu maida su gaban iyaye su. Idan ba haka ba kuwa, to abinda Danfulani ya fada a kanmu haka yake, gaskiya ne; kuma bai kamata mu tada jijiyar wuya ba.

Zance na gaskiya Almajirai sunyi yawa a ko ina, mai makon abin ya ragu kullum sai ka ruwa yake. Almajirai na kwarara cikin birane kamar sun yi kwace, yaushe muke tunanin samun adalci daga na sama a lokacin da muka kasa yiwa na kasa da mu.

Har kullum abin da yake bani mamaki, idan har mutanan da muke kira "Arnan Arewa" zasu killace al'ummar su duk da talaucin su, su hana su Bara, su samar musu da abinci da sana'a, me yasa mu da muke musu tunkaho da Arziki da wadata kullum yaranmu suke yin Bara, wanda har cikin gidajen irinsu John Danfulani yaranmu ke shiga yin ?

Gaskiya dai lokaci yayi da hukumomi da kungiyoyin al'umma da Limamai da masu unguwanni da Sarakuna zasu tashi tsaye haikan a Arewa domin Yaki da yin barace barace. Almajiri ma d'a ne ya kamata yayi karatu a gaban iyayansa kamar 'ya 'yan kowa.

Lallai d'abi'ar Barace barace na daga abinda ke zubar mana da k'ima da mutunci. Ai wannan ya isa abin takaici ace Arnan Arewa ne zai kalubalance mu da cewa mu Almajirai ne. Wallahi ina jin takaicin hakan.

Ya kamata Jami'o'in da muke da su a Arewa su tashi tsaye su yi aiki tukuru wajen yin Nazari da binciken yadda za'a kawo karshen Bara a Arewacin Najeriya da kuma a tsakanin Al'ummar Arewa musamman Hausawa da Fulani da Barebari. Allah ya bamu ikon gyarawa.

Yasir Ramadan Gwale

04-02-2016

Hattara Dai Shugaban Kasa Muhammadu Buhari

HATTARA DAI SHUGABAN KASA MUHAMMADU BUHARI

Sama da mutane 86 rahotanni suka tabbatar da cewa sun rasa rayukan su a garin Dolari dake kusa da birnin Maiduguri kwana biyu da suka gabata. Wannan rasa rayuka ya faruwa ne bayan gida je sama da 300 da aka kone kurmus a garin da kuma daruruwan dabbobi da suka halaka. Wannan abu yakai a jallin da Shugaban kasa Muhammadu Buhari zai tsaida duk abinda yake gabànsa dan zuwa da kansa ya ganewa idan sa irin mummunar asarar da akai, tare da jajantawa al'ummar garin wannan masifa da ake fama da ita, daidai lokacin da ake cewar anci galabar 'yan ta'adda.

A wannan halin da mutanan garin Dolari suke ciki na juyayin da alhinin rashin da sukai, a lokacin da Shugaban kasa ke karakaina tsakanin kasashen Afurka. Kwastam sai muka ji ance Shugaban kasa ya sake daukan jakarsa zuwa kasashen Turai. Na tabbata duk muhimmancin wannan taro da Shugaban kasa zai halarta a Faransa bai kai muhimmancin Taron G20 da akai a kasar Turkiyya ba a watan nuwanba Shekarar bara, ana tsaka da fara wannan muhimmin taro wanda kasar Faransa jigo ce a cikin kasashen G20, a 13 ga watan nuwamban ranar fara wannan taro aka kai wani Hari a Faransa, wannan tasa shugaba Hollande ya bayar da sanarwar soke halartar taron G20, duk kuwa da irin muhimmancin da taron yake da shi a wajensa.

A Takaice dai Rayuwar al'ummar da Shugaban Faransa Hollande yake Shugabanta tafi duk wani taro a duniyar nan muhimmanci a wajensa. Alal hakika wannan shi ne irin Misalin shugabanci na adalci da kaunar al'umma da kishin kasa. Wannan shi ne nauyi da kuma amanar da ya kamata duk wani shugaba ya kula da ita, martabar rayukan al'umma yafi duk wani taro da za ai muhimmanci. Shugaban kasar Faransa da bai san Allah ba, bai san tsananin AzabarSa akan wadan da suka ci amanar shugabanci, bai kuma san tanadin da Allah ya yiwa shugabanni Adalci ba, yayi haka! Ina ga Shugaban da yasan Allah yasan girman AzabarSa da kuma tanadin ga shugaba Ajali?!

Amma dai mu anan gida Nigeria abin ba haka yake ba. Shugabannin mu basu cika baiwa rayuwar al'ummar su muhimmanci ba. Halartar taruka da harkokin gabansu yafi muhimmanci a wajensu. Abin mamaki hatta nan makotanmu Jamhuriyar Nijar, shugabannin kasar sun fi mutunta al'ummar su akan namu shugabannin. Misali a turmutsutsun da ya faru a hajjin da ya gabata Alhazan Nijar 34 ne kacal suka rasu a wannan ibtila'i. Duk da haka, sai da Shugaban kasar yaje har Filin Jirgin saman kasar a lokacin da Alhazan kasar zasu fara dawowa, yayi musu ta'aziyar rasuwar 'yan Nijar da suka rasu a wannan turmutsutsu. Sannan kuma a al'adar Gwamnatoci na nuna juyayin ta hanyar sassauto da tuta dan girmama rayuwar wani ko wasu da aka rasa, Shugaban kasar ya bada hutun kwana uku a duk fadin Nijar dan Jajantawa iyalan wadan da suka rasu. Sannan aka sassauto da tutar kasar kasa dan girmama wadan da suka rasu a hukumance.

A ta bangaren Nigeria kuwa, Shugaban da ake gani shi ne mafi soyuwa a zukatan al'ummatai sam bai yi haka ba. Duba da cewar sama da mutun 100 ne 'yan Nigeria suka rasa rayukansu a wannan turmutsutsu babu wani abu mai kama da nuna jajantawa a hukumance. Haka kuma, duk da irin asarar rayuka da akai a Borno da Yobe da Adamawa tun daga hawansa Mulki har ya zuwa yau Shugaban kasa bai taka da kafarsa yaje musamman domin ganewa idansa da kuma Jajantawa wadan da suka rasa yan uwansu da dukiyoyinsu ba.

Yana da kyau Shugaban kasa ya sani, alhaki duk al'ummar kasarnan na wuyan sa, wajibin sa ne, ya kare mana abubuwa guda hudu. Rayuka, Dukiya, Hankali da kuma Addini. Lallai ya zama wajibi Shugaban kasa Muhammadu Buhari ya yi hattara kuma ya maida hankali wajen yin abinda ya kamata dan kula tare da Jajantawa mutanan dan suke cikin bala'i irin wannan. Shugaban kasa Muhammadu Buhari zai kasance abin tambaya ranar gobe kiyama akan irin wannan mummunar kisan gilla da akewa al'umma babu gaira babu dalili.

Akwai takaici kwarai akan yadda shugabanninmu basu cika damuwa da abubuwa na wajibin su ba, su gwammace shiga duniya ana ta ruwa ana hirarraki. Ya Allah ka bamu ikon cin wannan jarabawa da kai mana, ka jarrabemu da shugabanninmu, ka jarrabi shugabanninmu da mu. Allah ka bamu mai kyau a duniya ka bamu mai kyau a Lahira.

Yasir Ramadan Gwale

02-02-2016

Ya Kamata Gwamnatin Nigeria Da Jihohi Suyi Doka Kan Amfani Da Amsa Kuwwa

YA KAMATA GWAMNATIN NIGERIA DA JIHOHI SU YI DOKAR AMFANI DA LASIFIKA (AMSA KUWWA)

A gaskiya d'armu yayi yawa matuk'a ta yadda muke amfani da sunan Addini Sana'a domin cutar da al'. Zance na gaskiya yadda mutane ke amfani da Amsa Kuwwa barkatai babu wata doka abin ba tsari. A tsari na zamantakewa da Addinin Musulunci ya koya mana, bai ce muyi amfani da addini ko hanyar neman abinci wajen cutar da abokan zaman mu ba.

Haka kurum da sunan neman Abinci mutum ya mak'alawa motarsa k'atuwar Amsa Kuwwa ya shigo cikin aunguwa yana tallar magani. Wani abin damuwa shi ne, galibi tallan da ake na maganin gargajiya da Amsa Kuwwa batsa ce tsagwaron ta, masu tallar ke yi. Ba shakka akwai bambancin tarbiyyar magana tsakanin garuruwanmu, maganganun mu sun bambanta, wata maganar da Bakatsine zai fad'a a garinsu ba wanda zai kalle shi, a Kano idan ya fada sai ta zama abin takaici.

Haka nan, wata maganar da Basakkwace zai fad'a a garinsu a jinjina masa, idan yazo Kano ya fad' sai kaji magana ce me nauyin gaske da bata kamata mutum mai hankali ya fad'a ba. Duk da haka yana da kyau, idan mutumin Katsina ko Sokoto zai yi talla a Kano to ya kamata ya kiyaye da Kalmomi irin na mutan Kano. Wannan na daga cikin neman ilimin yin sana'a kafin yinta.

Zaka ji takaici matuk'a a lokacin da kake zaune da iyalanka da safe ko da daddare wani mai tallar magani daga Katsina ko Sokoto yazo unguwar ku ya tsmotarsa watakila kusa da gidan, yana ta bayanin maganin karfin mazakuta. Suna maganganu gatsal babu sayawa babu sakaye, a sanya mutum jin kunya cikin yaransa.

Lallai ya kamata hukumomi su yi doka kan irin wad'annan masu tallar maganin masu yawo da katuwar Amsa Kuwwa cikin unguwanni da sunan Sana'a. Ba daidai bane dan mutum na saida magani sai ya dinga fad'a yana kwatanta yadda Al'aurar Namiji take idan yasha maganinsa, abin sam babu dad'in ji wallahi. Kuma ya kamata duk wani bako da zai shigo wa mutane unguwa yana irin wannan tallar a taka masa birki.

Ita kuma hukuma wajibi ne ta samar da dokokin da zasu baiwa mutane ikon walwala a gidajensu tare da iyalansu ba tare da wani ya cutar da jin su ba, da sunan sana'a yasa su ji abinda zai kunyata su cikin 'ya 'yansu, ko damun su a lokacin da suke bukatar hutawa cikin iyalansu.

In sha Allah, a gaba zan yi magana kan yadda ake amfani da Amsa Kuwwa da sunan Addini ana cutar da mutane. Allah ya bamu ikon kiyayewa ya bamu ikon gyarawa.

Yasir Ramadan Gwale

31-01-2016

KANO: Gwamna Ganduje Yana Ta Gyada

KANO: GWAMNA GANDUJE YANA TA GYA'DA

Irin nad'e nad'en da Gwamnan Kano Abdullahi Umar Ganduje yake yi abin yayi yawa. A daidai lokacin da tattalin arzikin Kasa ya shiga wani irin mawuyacin halin ha'ula'i, arzikin man da k'asarnan ta Dogara gare shi kullum komawa baya yake yi. Farashin manfetur ya karye ya zube kasa warwas, kasuwanci ya durkushe, harkokin masanata'antu kullum suna komawa baya a guje. Kuma alumma na kara yawaita. Amma Gwamna ba ruwansa, sai bayar da muk'amai yake yi barkatai kamar kayan gadon gidansu, kullum ana karawa Laftawa Gwamnati hanyoyin zurarewar kud'i ba gaira babu dalili.

Ya kamata Gwamna ya maida hankali wajen ayyukan da ya gada wajen gwamnatocin da suka shud'e wajen yaga ya kammala su, ba kara dorawa Gwamnati nauyi ba. A makotanmu, Kaduna, Gwamna Nassir el-Rufai har ya zuwa yanzu nad'e nad'en SA da yayi basu kai goma ba. Amma mu Kano sabida watakila kirarinmu na cewa ko da me kazo mun fika, sai barna da ta'adi Gwamna yake yi da dukiyar al'ummah da sunan mukamin SA. Ya kamata Gwamna ya san ina gabas take, ya tsaya ya fuskanci kalubalen da yake kansa na tattalin arziki dan ciyar da Kano gaba, ba irin wannan nad'e nad'e marasa kan gado ba.

Ina amfanin Gwamnati ta tursasa mutane biyan haraji, daga karshe kuma ta rabawa SA's a matsayin Albashi da Alawus? Bama yiwa duk wanda Gwamnati ta baiwa muk'ami Hassada kan abinda aka bashi, hasalima muna fatan ayi mulki lafiya. Amma ba daidai bane, lokacin da ya bayyana karara cewar Gwamnatin kasarnan na fama da matsalar kud'i, amma Gwamna ba ruwansa, sai kirkiro hanyoyin kashe kudi yake da ba zasu amfanawa al'umma komai ba, domin da wadannan mukamai da babu su za ai Gwamnati ba tare da wata matsala ba, kamar yadda muke gani a Kaduna.

A dan haka, ya kamata Gwamna ya samu nutsuwa ya maida hankali wajen ganin yabi sahihan hanyoyin da zai ciyar da Kano gaba, ba rabon mukamai barkatai ba. Abin kunyar ma da yawan wadan da ake nadawa ko sunan mukamin da aka basu basa iya rubutawa daidai. Ace Gwamna ya dinga diban tantagaryar jahilai ana basu mukamai ba gaira ba dalili. Wannan wace irin Gwamnati ce haka? Ya kamata Gwamna ya sani yanzu karni na Ashirin da d'aya muke, aikin mutum goma mutum daya tak zai iya yi kuma a samu Nasara. Wannan lokaci ne da duniya ke samun koma baya ta fuskar tattalin arziki. Kullum Gwamnatocin da suka san me suke suna tsuke bakin aljihun Gwamnati ne ba wargaje shi ga mutane haka kurum ba.

Yasir Ramadan Gwale 

22-01-2016

A Gaban Khadimul Islam Ake Barna Da Kudi?

A GABAN KHADIMUL ISLAM AKE BARNA DA KUDI?

Jiya Gwamnatin Kano karkashin Jagorancin Gwamna Abdullahi Ganduje ta shirya bakin sabuwar shekara inda mawaka suka sha ruwan Nerori. A irin wannan lokacin da ake cewa tattalin arzikin kasa ya shiga mawuyacin hali, Gwamnatin tarayya da na jihohi na ta batun tsuke bakin aljihu, amma abin mamaki a gaban Gwamna wasu mutane suka dinga yiwa mawaka da makada ruwan kudi, wannan abin takaici ne kwarai da gaske. Domin bayan tozarta ita kanta dukiya sam bai kamata a ce a gaban Gwamna ana irin wannan dabdalar yana gani bai tsawatar ba.

Yana da kyau mutanan da Allah ya baiwa arziki su nuna godiya ga Allah ta hanyar taimakawa mabukata da yin Zakkah akan kari domin ragewa al'umma radadin talauci. Zan ce na gaskiya naji takaici matuka ace har yanzu irin wannan cibayan ta'ada tana tare da al'ummar mu har yanzu ta yin liki da kudi a bainar Jama'ah. Yana da kyau Gwamnan da ake kira da Hadimi ga Addinin Islama a same shi da kwatanta bin addini a lamuransa, hakkin Gwamna ne ya tsawatar a lokacin da mutane suka tozarta dukiya irin haka. Allah ya kyauta.

Yasir Ramadan Gwale 

01-01-2016

Hattara Jama'ah

HATTARA JAMA'A MUSAMMAN  MASU ABABEN HAWA!

Dazu dan uwa Tijjani Ahmad yake bamu labarin wata fitina da ta kunno kai a cikin wasu unguwannin cikin Birnin Kano. An wayi gari wasu mutane marasa tsoron Allah masu fama da cutar bakar Hassada da mugunta da Kyashi da munanawa Allah zato suna bi unguwanni suna Bankawa motocin mutane wuta babu gaira babu dalili a lokacin da Sahu ya dauke, abin ya faru a unguwar Gwammaja da Tal'udu da kuma Titin Aminu Kano. Dan haka, jama’a musamman wadan da suke da motoci kuma ba suda garejin aje mota suke barin su a waje suna kwana, ya zama dole a sanya ido. 

Mutanen da suke aje motocin su a makarantu ko wani filin unguwa da su lura kuma su sanya ido sosai, a samu masu gadi san kare dukiya. Ba shakka duk wanda zai sanya motar mutane wuta ta kone kurmus dan kawai Hassada da Kyashi to wannan ya kai matukar mutum mara tsoron Allah. Ana bi ana kashe mutane babu ji babu gani, ba tare da wani hakki ba. Yanzu kuma abin ya koma kan dukiyoyin mutane lallai lokaci yayi da mutane zasu tashi dan baiwa unguwannin su da dukiyoyinsu kariya. Ya Allah ka kare mu da karuwar ka, masu wannan mugun nufi Allah ka tona asirinsu. Ya Allah ka tsare mu ka tsare mana dukiyoyinmu. 

Yasir Ramadan Gwale 

28-12-2015