KADA KA TABA ZATON DAN SHI'AH YANA KARANTA AL-QUR'ANI

KADA KA TABA ZATON DAN SHI'AH YANA KARANTA AL-QUR'ANI 

'Yan Shi'ah duk inda suke suna kokarin nesanta kansu daga Al-qur'ani mai tsarki, basa karanta shi, kuma basa son mai karanta shi, kai hasalima basu yarda da wannan al-qur'anin da mu Musulmi meka karantawa dare da rana ba. Manzon Allah Salallahu alaihi Wasallam shine cikamakin annabawa wanda ALLAH ya turoshi ga dukkan talikai, kuma ya bashi littafinsa (al-qur'ani) wanda yana shafe zanen dukkan wani littafi da ya gabace shi ne. Al-qu'ani zance ALLAH ne da ya turo ta hannun ManzonSa Salallahu Alaihi Wasallam. Shi kuma Manzon Allah ya karantar da al-majiransa Al-qur'ani wato sahabbai, wadannan sahabbai da wadan da suka biyo bayansu sune wadan da suka yi hidima wa al-qur'ani mai tsarki, har ya kawo garemu.

Saninmu ne cewa Shi'ah Mabiya Dan Saba'i suna matukar nuna kiyayya a bayyane ga wadannan sahabban, Kuma shi wannan Alkur’ani Sahabbai ne su ka zo da shi daga wurin Manzon ALLAH Salallahu Alaihi wasallam su kuma ba su yarda da Sahabbai ba. Daga cikin wadan da sukayi hidimar tattara al-qur'ani dan game shi waje guda musamman Usman Bin Affan shine mutum na uku da shi'ah suke kafirtawa, kuma suke matugar gaba da dukkan zurriyarsa da dangoginsu wato banu Umayya, Idan kaji Dan Shi'ah yana zagin Mu'awiyya ko Yazeed wannan kada ya dameka, domin sun sagi wadan da suka fi su Mu'awiya da yazeedu kima da daraja wato khulafu'r Rasheedun Al-mahdiyyen, haka har aka gangaro kan irinsu Sarkin Musulmi Hajjaju Bin Yusuf wanda tarihi ya tabbatar da cewar yayi matukar hidima wa al-qur'ani, domin shine ya sanya aka wasalce al-qur'ani.

Haka Kuma, a lokacin da Al-qur’aninmu ya ke da ayoyi 6236 Kulini daya daga cikin gumakan shi'ah ya ruwaito a mafi ingancin littafan shi’a daga Abu Abdullahi (Daya daga cikin ma’asumai a gurinsu) cewa Al-qur’anin da Jibrilu ya zo da shi ga Muhammad aya 17000 ne” duba (Alkafi, 2/634). Dan haka, Idan ka ji dan shi’a ya na son ya ja hankalinka ya na musanta abin da littafansu su ka fada kuwa, to, ka sani cewa yana takiyya ne, ita kuma takiyya farilla ce a cikin addininsu kamar sallar farilla (Duba littafin Alkafi na kulini 2/217 da Al’amali na Tusi shafi na 229).

A takaice dai ya zama dole a bayyana wa jama’a cewa, addinin shi’a wani addini ne na jabu wanda makiyan musulunci suka taru suka kitsa shi, sannan suka kutso da shi a cikin musulunci da nufin rusa shi, amma abinda basu sani ba Addini na ALLAH ne, kuma shine zai kare kayansa. Kuma su na jingina kansu ga Ahlul Baiti domin su yaudari jama’ar musulmi. Iyalan gidan Manzon ALLAH Salallahu Alaihi Wasallam bayan kuwa barrantattu ne daga akidun shi’a kamar yadda da dama daga cikin magabatansu suka fada.

Dan haka ya dan uwa kada ka rudu da 'yan Shi'ah basu da wata alaka ko ta kusa ko ta nesa da littafin ALLAH al-qur'ani ko addinin ALLAH. Dan ka sake gane haka bari na baka wani misali. A baya yadda masu yin maulidi suke yi, shine akan yi gadan aba'i ko Mimbari yara suna karatun al-qur'ani da karanta sirar manzo, amma yanzu da shi'ah suka silalo cikn lamarin sai suka dauke hankalin mutane daga yin karatun da suke yi a baya, inda suke zaga gari suna kide-kide da wake-wake na batsa. Kaga daga Karanta al-qur'ani ankoma kada bajujala, alhali Manzon ALLAH Al-qur'ani ya zowa da al'ummarsa da shi. To irin haka ne shi'ah suke yin amfani domin raba mutane da addini da kuma al-qur'ani.

DANGANE DA BATUN KAIWA MAIMARTABA SARKI HARI

DANGANE DA BATUN KAIWA MAIMARTABA SARKI HARI

Akwai wasu tambayoyi da dama da JTF ya kamata su bayar da amsa. Kai hari a unguwar Zoo Road ba wannan bane na farko, shin ya akayi masu aikata wannan aika-aika suke labe a zoo road aka kasa gano maboyarsu? 

Lokacin da aka kaiwa marmairataba Sarki hari rahotanni sun ce babu jimawa JTF suka zo wajen kuma suka yi musayar wuta da 'yan bindigar, shin ya akayi JTF suka bari 'yan bindigar suka sulale basi bi sawunsu ba?

Lokacin da aka kai hari kan ofishin kamfanin Airtel dake Malam Kato Square ananma rahotanni sun tabbatar da yin musayar wuta tsakanin JTF da 'yan bindiga, shin me ya sa ba'a kama ko mutum daya ba, ko kuma gano maboyarsu?

Lokacin da aka kai harin IBB way na kusa da katangar masallacin Idi na cikin gari, nanma rahotanni sunce anyi musayar wuta da JTF da 'yan bindiga, shin anya kuwa wadannan 'yan bindigar da gaske 'yan ta'adda ne, ba rigarsu ake shiga ayi aika-aika da sunansu ba?

A 'yan kwanakin da suka gabata rundunar JTF ta bayyana wasu mutum biyu da ake zargi da kai hari a cikin coci dake barikin sojoji na JAJI, abin mamaki anbayyana wani mutum mai sayar da Kifi ko Doya ina zaton, da wani yaro dan shekara 18 suka sadada suka kai wannan hari, Ina amfanin gogewar jami'an tsaron JTF idan har Yaro karami da mai tallar kifi zasu iya shiga har cikin bariki su kai hari kuma su gudu salin alin, ba a iya ganesu ko kama su ba? Lallai akwai alamar tambaya ga Rundunar JTF!(?)

Sannan a Kano muna kira ga gwamnati da ta sallami dukkan wasu jami'an tsaro dake kan hanya musamman JTF, domin babu abinda suke yi illa cutar da talakawa bayin Allah, dan kasancewarsu akan tituna bata hana 'yan fashi shiga cikin kasuwar WAPA da tsakar rana su kwashi makudan kudi su gudu ba, haka kuma, bata hana kaiwa maimartaba sarki hari da tsakar rana ba. Dan haka basu da wani amfani akan hanyoyin cikin birni.

Tabbas dakarun JTF sune matsalar tsaro yanzu, kuma muddin aka debesu daga kan tituna al'amuran tsaro zasu inganta kamar yadda Shiekh Dr. Ahmad Gumi ya taba bayar da shawara. Kuma mu a wajenmu JTF ababen tuhuma ne akan hare-haren da ake kaiwa.

ZUWA GA COMR. BILYAMINU ABDULLAHI ADANJI

ZUWA GA COMR. BILYAMINU ABDULLAHI ADANJI

Da sunan Allah mai gamammiyar rahama mai jinkai tsira da amincinSa sukara tabbata ga fiyayyen halitta Annabi Muhammad salallahu alaihi wasallam da sahabbansa da iyalan gidansa da wadan da suka bi tafarkinsa har yazuwa ranar sakamako, ina shaidawa babu abin bautawa bisa cancanta sai Allah tsarki ya tabbata a gareshi.

Lokacin da na fara kiranka a waya Comrade Bilyaminu Abdullahi Adanji baka dauka ba na sake sannan ka kashe na kuma a karo na uku ka sake kashewa, ko shakka babu Raina yayi matukar baci a wannan lokaci daga baya, nayi tunanin watakila kana cikin wani Uzuri ne da ba zai baka damar amsa waya ba, bayan wani lokaci sai ga kiranka Bilya, kamar bazan dauka ba sai dai kawai na dauka na amsa maka cikin murya mai nuna damuwa nace "MENE" abin da na fara fada sannan kace TUBA NIKE DAN MUTAN GWALE, don Allah kayi hakuri, na amsa maka da cewa babu matsala comrade, ko shakka babu munyi tattaunawa mai tsawo a wannan lokaci kuma mun fahimci juna sosai da gaske, kuma wani abu da bazan manta da shiba shi ne tun a wannan lokaci duk sanda mukayi waya Bilya ka kan kirani da "Danmutan Gwale", kusan a wajenka na fara jin wannan suna, haka kuma duk wanda ya kirani da wannan suna acikin 'yan kungiyar Muryar Talaka to yajine daga bakinka, kuma wannan sunan yabini har gidanmu.

Mun fara hada ido da juna nida kai Bilya lokacin taronmu na farko a shekarar 2010, kuma abin da Bilya ka cemin shi ne "Nice to meet you Danmutan Gwale" nima na amsa maka da "I'm Pleased to meet you my dear comrade", daga nan ka bani wayarka na saka maka ita a chaji, muka ci abinci tare sannan kuma muka shiga cikin hada-hadar al'amuran kungiya, na iya tuna bayan gari ya waye Zaidu Bala da tawagarsa sunyi wanka zasu tafi gurin taro, sun tafi da wuri domin yin shirye-shirye, ina zaune a daki sai ga Bilya ka dawo ka ce dani Danmutan Gwale don Allah ina zan samu Weeklytrust? Na amsa maka da cewa zan taho maka da ita, Bilya ya kalleni yayi murmushi yace sai ka taho danmutan Gwale.

Hakika munsami fahimtar juna sosai da Bilya domin yana turamin sakon tunasarwa kusan duk ranar Juma'a 'karta kwana' kuma nima ina tura maka, ko shakka babu zan dade ina tunawa da kai Comrade Bilyaminu Abdullahi Adanji. Bana manta ranar wata Litinin na shiga makarantar CAS Kano, sai ga Kiran Zaidu Bala a lokacin ba daga dan banji alamar wayata ta yi ruri ba, sai bayan da na fito zan hau dan acaba sai na dauko waya ta na duba lokaci, nan naga kwantaccen kiran Zaidu Bala, nan na mayar masa da kira ina mai bashi hakuri, kawai sai ji nayi Zaidu yayi salati, take gaba na ya fadi domin nasan sakon da alama na rashi ne, amma kuma ban san ko waye ba, cikin murya mai ban tausayi Zaidu Bala ya sanar da ni cewa Abokinmu Comrade Bilya! Nace me ya faru da shi? Nan muryarsa ta sake raurawa ya ce Yasir Allah ya yiwa Bilya rasuwa yana hannun mahaifiyrsa! Hakika na kadu matuka da samun wannan labari, ban mantawa acabar da na kasa hawa kenan tsawon lokaci ina ta salati tare da maida lamari ga Ubangijin talikai.

Bilya kasani wallahi baka yi gaggawa ba kuma inda ka tafi muma muna nan zamu biyoka komai tsawon zamani, ya zuwa lokacin da zamu zo nasan kazama dan gari mu kuma zamu zo a baki tunda karigayemu. Bilya ka tafi a daidai lokacin da kake begen ganin rayuwar 'yan najeriya ta kyautatu dan talaka ya ci moriyar arzikin kasarsa, Hakika ina yima bushara da cewa Allah zai cika maka burinka na ganin an sami kyautatuwar rayuwa a Najeriya. Bilya na dauki alkawarin duk lokacin da na tunaka zanyi maka Addu'ar samun Rahama a wajen mahalicci.

Bilya rahamar Allah ta yalwaci kowa, inayimaka fatan samun wannan rahama kamar yadda nake yiwa kai na fata Allah ya sadamu a Aljanna baki daya. Allah ya jikanka ya gafarta maka.

Wassalamu Alaikum.

Daga Naka Yasir Ramadan Danmutan Gwale

WA YE ZAI HANA GOODLUCK JONATHAN TSAYAWA TAKARA?

Wani zubin idan wadan da suke kiran kansu sune shugabannin 'yan Adawa suka yi magana akan siyasa sai kaga tsiraicin siyasarsu. A kwanakin da suka gabata rahotanni suka ce anga fastocin shugaban kasa a Abuja dauke da bayanan da suke nuna cewa zai sake neman zabe a 2015. Na sausari wata hira da akayi da Farouk Adamu Aliyu a BBC yana cewa su fatansu Allah ya sa shugaban kasa ya sake fitowa neman zabe . . . Ban san wanne shiri suke da shi na tunkudeshi ba. 

Amma Shakka babu babban aikin da ya kamata a dukufa haikan akansa shine ayi dukkan mai yuwuwa wajen hana wannan mutumin tsayawa takara a 2015, kamar yadda aka kashe 3rd Term na Obasanjo a kakar zaben 2007. Bahaushe ya ce "ba a iya yashe rijiya sai anshiga cikinta" ko dai ka shiga ka yaso dukkan dattin da yake cikinta, dan samun tsabtataccen ruwa, ko kuma ka tsaya daga waje kana kwarfe ruwa mai kyau amma dattin yana kasa.

Dan haka, dukkan zaratan yakin siyasa irinsu Atiku Abubakar da suka hana Obasanjo sakat, suka fatattakeshi da shi da 3rd term dinsa, irinsu muke fata su hana wannan mutumin tsayawa takara a 2015. Amma muddin muka ce zamu sake yin irin kasassabar cewa zamu iya kada shi a babban zabe maimaikon zaben fitar da gwani to lashakka Garin Zubar da Ruwan Wankan Yaro to zamu zubar da ruwan har da Yaron, mai makon a zubar da ruwan kawai.

PDP da gaske suke yi akan wannan zabe zasu iya kashe ninkin baninkin abinda suka kashe a 2011 domin samun zabe ko ta halal ko ta haram, kuma sunyi shiri akan hakan, duk wata satoka sa katse da 'yan PDP suke yi karya ce, kuma yaudara ce, domin zabe yana zuwa sai ka tarar bakinsu ya zo daya. Kowa yaga irin yadda aka bada labarin tsamin dangantaka tsakann Atiku Abubakar da Gwamnan Murtala Nyako amma da zaben Nyako ya zo Atiku sai da ya fita ya kira jama'a su zabi Nyako.

Lallai abinda zamu tambayi kawukanmu shine, Shin waye zai hana shugaban kasa sake tsayawa zabe Idan har ya nace akan haka?

BOKA SHAIDANIN AL'UMMA

Da can mukanji labarin cewa mata ne suke cin kasuwarsu a wajen bokaye. Sannan babban dalilin da yake kai mata wajen Boka galibi bai wuce wasu batutuwa guda biyu ba, wato KISHIYA da kuma MALLAKAR MIJI, mafiya yawancin mata da suke zuwa wajen boka wannan shine dalilin zuwansu. Bokaye da dama sun halakar da mata da yawa kuma sun kashe aure da yawa akan wannan batu, bayan wannan abunda suke yi, Bokaye sun shahara da FASIKANCI da matan da suke zuwa wajensu, wannan kuma zamu Iya cewa alhaki kuikuyo ne, bayan kasancewarsu Sun sabawa ALLAH da ManzonSa, Sannan sunci amanar Aure da mazajensu. Allah ne kadai yasan adadin mazajen da suka sha jike-jiken bokaye ko suka sha-ruwan tsarkin mata a cikin al'ummarmu, wasu a abinci wasu kuma a cikin abun-sha.

Matan da suke zuwa wajen Bokaye sunyi Imani da maganganunsu sosai, domin suna ganin duk abinda boka ya fada mai faruwa ne. Amma Alhamdulillah, Malamai suna ta yin wa'azi sosai da karantarwa akan hadarin da yake tattare da zuwa wajen Boko da kuma bayanin fushin ALLAH akan mai zuwa wajen Boka, domin Boko Mushiriki ne. Allah ya yafewa wadan da suka tuba suka dena.

Yanzu kuma abin ya sauya salo, Inda bayanai suke nuna cewa Adadin matan da suke zuwa wajen Boka yana raguwa, amma kuma Na mazan da suke zuwa wajen Boka yana karuwa. Yanzu dai masu neman Mulki ta kowacce hanya sune suke daurewa bokaye Gindi suke tsula tsiyarsu ganin dama, satar mutane ya karu alfasha ta karu domin duk wannan yana daga cikin Sharrin Bokaye, domin bayanai sun nuna cewa suna baiwa masu zuwa wajensu umarnin samo wasu sassan jikn dan Adam domin hadawa da su a yi Tsafi, Haka kuma, bokaye kan dora mutane akan mummunar hanyar Yin jima'i da mahaukata, sai kayi mamaki kaga Mahaukaciya da kurtsetsen ciki ita ba Aure ba kuma ita ba Hankali ba balle a tambayeta ina ta samu ciki! Sannan sukan dora mutane akan hanyar yin Luwadi, kamar yadda bayanai suke nunawa duk domin samun Mulki ko direwarsa ko kuma karuwar arziki.

Idan me zuwa wajen Boko yaje wajensa, Bokan ya gaya masa cewa zai zama Shugaban kasa ko gwamna ko shugaban karamar hukuma ko kuma zai kudance sai mutumin yayi Ammana da maganar Bokan. Amma kuma da Bokan zai gaya masa cewa bazaka zama Shugaban kasa ba, amma zaka zama SARKI nan take zai karyata Boka, dan yasan Babu yadda zai a yi ya zama Sarki. Idan da masu zuwan suna amfani da hankali da tunani ko basu san addini ba, nan take zasu karyata Boka ko me yace musu zasu zama, amma da yake Boka wakilin Shaidan ne a tsakanin mutane, kuma Shaidan yayi alkawarin Halakar da al'umma dan haka suke ta samun karin Tagomashi. 

Allah kuma yayi alkawarin cika Wuta da Duwatsu da mutane. Dan haka Bokaye da masu zuwa wajensu muddin basu tuba sun bi Allah ba, muna yi musu albishir da cewa Wutar Jahannama Itace makomar dukkan wani mushuruki. Tir da wannan makoma, muninta yayi yawa. Allah ka tsaremu ka tsare mana Imaninmu. Masu zuwa wajen Bokaye daga cikin mata da maza Allah ka shiryesu.

ME YAKE FARUWA A KANGWAYE NE?

Wata rana wani Bawan Allah da yake gina gidansa, ya gayyaceni akan na raka shi gewayar ganin gidan da yake ginawa. Haka kuwa aka yi, domin mun je a wani irin lumshi da kowa zai so ya danyi tattaki a cikinsa, ba jimawa muka zo unguwar da gidan yake, kasancewar wajen sabon wajene dukkan gidajan da suke kan layin sabbin gidaje ne da ake ginawa, wannan ta sanya muka tarar da tsibi tsibin yashi da duwatsu da kan-kura akan layin, dole ta sanya muka ajjiye mota daga nesa muka taka sayyadarmu domin karasawa gidan. 

Isarmu kofar gidan ke da wuya na kalli gidan nayiwa maigidan murna kasancewar gidan ya kasaita bayan kasancewarsa katafare harda masallaci a jikin gidan da ake ginawa tare. Mai gida ya shige cikin gidansa kai tsaye domin yaga yadda ake gini, Ni kuma na nufi dan-karamin masallacin da ke jikin gidan wanda ake ginawa, shiga cikin masallaci na hangi wani abu da na kasa gasgata ganina da yake daga nesa na hango.

Ina shiga cikin harabar masallacin ta kofar kudu kawai sai naga wani baho madaidaici dauke da wasu kananan kwalaben ruwa da wasu jike-jike a ciki. Abinda ya fara zuwa Raina shine wannan irin kayan masu tallan maganin gargajiya ne da suke shigowa cikin birni daga Panshekara, tsammanina ko na tsintuwa ne, ban damu ba na daga kaina sama daga bakin kofa ina kallon gini, can sai naji sukur-sukur alamar ana motsi, duk da haka ban kawo wani abu mara kyau na faruwa ba, kawai sai na shiga domin ganin meye yake motsi, cikin mamaki na hangi bayan mutum a inda Liman yake tsayawa, na kalli mutumin da alama yana yin wani abu cikin gaggawa, na kara matsawa sosai, sai na hangi wani mutum mai matsakaitan shekaru yana sauri yana daura tazaugen wandonsa kansa babu hula, da alamar a rikice yake, bayansa kuma wata yarinya na hanga tana kokarin gyara kayan jikinta.

Na tsaya ina mamakin abinda idona ya gani, yarinyar nan ta tashi cikin hanzari ta dauki wannan baho ta kinkima tayi waje. Banyi magana ba, wannan mutumin kuwa ya zube a gabana yana rokona dan Allah malam ka rufa min asiri kada ka gayawa Alhaji ka ganni! Nikam Ina tsaye na kasa magana. Mutumin nan da yaga ban kulashi ba, ya leka waje bai hangi kowaba, har ya fita sai ya dawo ya dauki hularsa, kafin ya dauki hular tuni ni kuma na fice daga cikin masallacin.

Na shiga cikin gidan ina mai mamakin abinda na gani, Mutumin nan hankalinsa ya tashi sosai, domin yana yimun wani irin kallo na intausaya masa. Haka dai har muka gama ganin ginin nan bashi da kuzari, yana tsoron kada na fadi abun da na gani. Hakika abinda na gani ya tunasar da ni abubuwa da yawa da na sha-ji ana fade cewa ana yin Lalata da yara 'yan talle a cikin kangwaye. Lallai acikin masu yin sana'ar gini akwai mutanan kirki kuma akwai na banza kamar yadda kowanne fannin rayuwa ake samu. Allah ya shirya ya karemu da mugun-ji da mugun-gani. 

ZA A JIMA ANA TUNAWA DA SHUGABA GOODLUCK JONATHAN A NAJERIYA

Shugaba Goodluck Jonathan shine shugaban Najeriya na goma sha biyar (15) idan muka dauki lissafi daga Firaminista Sa Abubakar Tafawa Balewa da kuma shugaba Namandi Azzukuye. Shakka babu a tarihin Najeriya nan gaba ba zai taba cika ba, idan ba'a yi maganar shugaba na goma sha biyar ba wato Goodluck Ebele Azikewe Jonathan, za'a tuna da shugaban kasane ba dan yayi abin kirki ba, sai dan a lokacin sa ne Najeriya ta samu kanta a cikin wani mawuyacin halin da bata taba samun kanta a ciki ba tundaga shekarar 1914 har kawo wannan lokaci.

A lokacin Shugaban kasa Goodluck Jonathan ne cin-hanci da rashawa ya kai magaryar tukewa, ta yadda babu wani mutum daga cikin gwamnatinsa da za'a zazzage ba'a sameshi da kashi a gindinsa ba. A lokacin shugaba Goodluck Jonathan aka taba samun manyan jami'an gwamnati da muguwar sata da ta shallake hankali da tunanin dukkan wani mai tunani, cin hanci bai tsaya iyakar jami'an gwamanti ba kadai, kusan yayiwa shugaban mugun daurin da bazai taba iya kwancewa ba. 

Shugaban kasa Goodluck Jonathan yaki bayyana abinda ya mallaka a zamanin mulkinsa kamar yadda magabacinsa Malam Umaru Musa 'YarAdua (Allah ya jikansa) yayi, domin kuwa rahotanni sun tabbatar da cewa shugaban a kwance yake akan dukiyar haram faca faca. Haka kuma ana yiwa manyan na hannun damansa zargin cin-hanci mai karfin gaske wanda ya hada da mutum mafi kusanci da shi a majalisar zartarwa wato ministar albarkatun manfetur madam Dazani Alasan Maduwake da kuma hamshakan mutane irinsu fitaccan dan kasuwannan wanda cin hanci ya dabaibaye wato cif Femi Otedila.

Haka kuma shugaban ya kanainaye kansa da miyagun barayi azzalumai irinsu wani tsohon najadu da ake kira cif Tony Anenih wanda ya taba riki mukamin shugaban kwamitin amitattun PDP kuma tsohon ministan ayyuka na gwamnatin tarayya a zamanin Obasanjo, a lokacin da mista Anineh yake rike da mukamin minista ne ya shaidawa maname labarai a ranar 6 ga watan disambar 1999 cewar babu wata kasa da zata cigaba ba tare da kyawawan hanyoyi na gwamnatin tarayya ba, dan haka ya fitar da kwangilar gyara da garambawul na manyan titunan gwamntin tarayya inda aka fitar da zunzurutun kudi Naira Biliyan 200 daga 1999 zuwa 2002, daga bisani aka nemi kudin ko sama ko kasa, kuma babu aikin titunan, wanda mujallar Tell Magazine ta 20 ga watan disambar 1999 ta tallata aikin kwangilar. Haka kuma, a ranar 25 da Oktobar 2002 sai da shugaban kasa na wannan lokacin Olushegun Obasanjo ya shaidawa manema Labarai cewar hankalinsa ya tashi matuka da irin yadda ya samu labarin halin da titunan gwamnatin tarayya suke ciki, amma abin mamakin shine ba'a nemi Mista Anenih yayi bayanin yadda aka yi da kudin aikin titunan ba. Irin wadannan muggan barayi su Tony Anenih sune wadan da Shugaban kasa yake ganin sunfi kowa tsarki wajen iya shirya sata da damfara da sunan aikin gwamnati, inda yanzu haka aka sake bashi wani muhimmin mukami na shugaban hukumar Nigerian Port Authority.

Har ila yau 'yan Najeriya zasu jima basu manta da shugaban kasa Goodluck ba kasancewar a lokacinsa ne mutane irinsu Henry Okah sukayi ikirarin dasawa da kuma tayar da Bom a lokacin bikin samun 'yancin kai, kuma suka aiwatar da wannan nufi nasu, amma saboda tsabar rashin ta ido shugaban ya fito kafafan watsa labarai yana cewa wannan hari ba su Henry Okah bane suka kaishi.

Idan muka kalli yankin kudu maso yamma da kuryar kudancin kasararnan zamu ga cewar satar mutane tare da yin garkuwa da su ta zama abun yayi, ta yadda masu wannan sana'a suke cigaba da cin karansu babu babbaka, abinda ya kai har mahaifiyar Ministar gamayyar tattalin arziki Ungozi Okwanji Iwela aka sace kuma aka nemi kudin fansa kamar yadda al'adar satar take. Haka kuma, masu fasa bututu da satar gurbataccan manfetur sun cigaba da cin kasuwarsu ta wannan aika aika, har sai da ta kai wani kwamiti da shugaban kasar ya kafa karkashin Jagorancin Malam Nuhu Ribadu ya bayyana cewar raba dai-dai ake yi tsakanin Najeriya da barayin danyan manfetur. Sannan saboda shugaban kasa ya kara gwangwaje wadannan barayi 'yan ta'adda yace shi da kansa ya nadasu masu gadin wadannan bututun mai sannan ya sanya musu wani katafarn albashi na Dalar Amurka Miliyan 350 a kowacce shekara, lallai za'a jima ana tunawa da shugaba Goodluck ta wannan janibi.

A yankin tsakiyar Najeriya kuwa anyi ta samun rikicin addini da na kabilanci babu kakkautawa a zamanin shugaba Goodluck Jonatahn a jihar Filato da kuma rikicin manoma da makiyaya a jihar Nassarawa da Bunuwai. Sannan kuma anyiwa wasu musulmi korar kare a karamar hukumar Mokwa dake jihar Neja ko wadanda aka fi sani da 'yan Darul Islam, wanda dukkan bayanai da bincike suka tabbatar da mutanan wannan gari basa wata barazana ga tsaro ko zaman lafiya.

Mutanan Arewa gaba daya kuwa zasu jima suna tunawa da shugaba Goodluck Jonathan, saboda ansamu asarar rayukan da ba'a taba samu ba a wannan yanki karkashin wannan shugaba. Haka kuma jihar Borno ta zama wata karamar Bagadaza a Najeriya musamman lokacin wannan shugaban, domin ankashe muhimman mutane da suka hada da Madu Fannami Gubio wani dan takarar gwamna a jihar ta Borno da kuma Manjo Mamman Shuwa wanda saboda sake da rashin tsaro wasu 'yan ta'adda suka haura gidansa suka kashe shi kuma suka gudu.

A kano kuwa kanawa zasu jima suna tuna ranar 20 ga watan Janairun shekarar da ta gabata domin a wannan lokacin aka samu abinda ba'a taba mafarkin samu ba na tashin bamabamai babu kakkautawa a ciki da wajen birnin kano, wanda rahotanni mabanbanta suka nuna cewa ansamu tashin bamabamai sama da guda sittin (60) a wannan rana, da asarar rayukan mutane sama da 250 duk a wannan rana.

Idan muka leka jihar Kaduna kuwa al'ummar Musulmi da suke a kudancin Kaduna zasu jima basu manta da watan Afrilun 2011 ba, domin ankashe mutane bila adadun sakamakon rikicin bayan zabe, da kisan kan-mai uwa da wabi. Haka kuma, jihohi irinsu Adamawa da Gwambe da Bauchi da Kogi da Taraba suma bazasu manta da shugaba Goodluck Jonathan ba domin kuwa a karan farko a lokacinsa wadannan al'ummomi suka san karar tashin bamabamai. Sannan kuma a lokacin wannan shugaba ne 'yan Najeriya suke karyawa duk safiya da kalmomi irisu GARKUWA DA MUTANE, BOKO HARAM, CIN-HANCI DA RASHAWA, 'YAN TA'ADDAN NEJA DALTA da sauransu. 

Shakka babu idan za'a yi bayanin abubuwan takaici da Allawadai da Alla-tsine da suka faru a Najeriya a zamanin shugaba Goodluck Jonathan za'a jima ana zayyanosu. Daga karshe muna rokon ALLAH da sunansa kyawawa kuma tsarkaka, Ya ALLAH kada ka sake Jarrabarmu da Mutum irin wannan shugaban na yanzu Goodluck Jonathan, Ya ALLAH ka jarrabemu da shugaban da zaiji-kanmu ya tausaya mana.