Budaddiyar Wasika Zuwa Ga Shugaban Kiristocin Najeriya Pasto Ayo Oritsejafor

Budaddiyar Wasika Zuwa Ga Shugaban Kungiyar Kiristocin Najeriya Pasto Ayo Oritsejafor

Kamar yadda mai girma Pasto ya gabatar da takarda a gaban kwamitin kula da lafiya da ‘yancin dan Adam da ke kula da kasashen Afurka na majalisar dokokin kasar Amerika, Ya Pasto, ka gabatar da takarda mai taken Nigeria: west Africa’s Trouble Titan ranar 10 ga watan Yuli na wannan shekarar ta 2012. Kamar yadda ka yi bayani a gaban wannan kwamiti, ka yi bayani ne da sunan kiristocin Najeriya wadan da ka ke shugabanta, shakka babu daman babu wanda ya aikeka kayi bayani da yawun ‘yan Najeriya, don haka bamu yi mamakin irin salon da kabi ba wajen gabatar da wannan takarda ba, kuma daman babu wani musulmi da zai yi tsammanin zaka yi Magana da yawun musulmin Najeriya.

Na tabbata da Musulmi ne zai gabatar da wannan jawabi da kayi a gaban wannan kwamiti, to tabbas da zai yi bayanin asalin rikicin addini da samuwar Boko Haram a Najeriya, tundaga shekarar 1983 da aka fara samun rikicin addini a kudancin jihar Kaduna da rikicen rikicen zangon kataf da Tafawa Balewa a Jihar Bauchi da sauran fadace-fadace da suka faru kusan a mafiya yawa daga cikin jihohin Arewa kama daga Kaduna, Taraba, Adamawa, Bauchi, Gombe da kuma wanda yake faruwa yanzu haka kuma yaki ci yaki cinyewa na Jihar Plateau. Duk wannan al’amari da ya faru lokuta masu tsawo tarihi ya rike, kuma asalin rikicin addini a Najeriya babu inda musulmi suka taba takalar kirista da neman fitina.

Tunda muke a Najeriya babu inda aka taba rawaito cewar ga wani Musulmi ya zagi Annabi Isa ko Jesus ko kuma, ace ga Musulmi ya wulakanta littafin Linjila ko Baibul. Amma kiristocin da aka rawaito sun zagi manzon Allah ko sun wulakanta al-qurani a Najeriya bazasu lissafu ba.Ya mai girma pasto, ko kana da masaniyar daruruwan Musulmi da ‘yan sanda Najeriya wanda galibinsu kiristoci ne suka yiwa Musulmi kisan gilla a ciki da wajen Maiduguri da sunan farautar ‘yan Boko Haram a tsakanin watannin Yuni da Yuli na shekarar 2009, idan Pasto bai sani ba, kiristocin da yake jagoranata suka aikata wannan mummunan aikin ta’addanci, sannan kuma suka kashe shugaban Kungiyar ta Boko Haram wanda a tsarin Mulkin Najeriya aka kira da Extra Judicial Killing wanda wannan ta sanya mininstan Shari’a na wannan lokaci kuma Antoni Janar na shari’a na Najeriya Mista Micheal Kaase Aondoakaa ya tafi har kotun duniya ya bayar da hakuri akan cewa kisan da akayiwa shugaban kungiyar da kuke neman a sanyata cikin sahun kungiyoyin ‘yan ta’adda na duniya a matsayin cewa ankasheshi ba ta hanyar shar’ah ba, kuma yace wannan babban laifi ne da Najeriya take neman gafar kotun Duniya akansa.

Ya maigirma Pasto, ko kasan cewa jaridun Najeriya sun rawaito cewa kiristoci sun kashe sama da Musulmi 630 a kauyen Yalwa a karamar Hukumar Shandam a jihar Plateau a shekarar 2004, kuma suka yiwa dubban matan Musulmi fyade kafin su kashe su, baya ga kuma daruruwan yaran Musulmi da aka sace bayan ankashe iyayansu, aka maida su bayi a kasarsu ta haihuwa, wasu kuma aka yi musu zane a fusakarsu domin batar musu da kamanni, duk wannan ya faru a Najeriya kuma kiristocin da Oritsejafor ka ke jagoranta su suka aikata wannan ta’addanci. Bayan haka kuma masallatan Musulmi da kiristoci suka rusa su har kasa a jihar Plateau da Kaduna bazasu kirgu ba.

Sannan a shekarar da ta gabata kiristoci suka farwa Musulmi da harbi da sara da suka suna kisa babu ji babu gani a Jos yayin da Musulmi suka fito sallar idi, duk wannan kiristoci ne wadan da Oritsefor ka ke jagoranta suka aikata, wa kuka tuhuma da laifin aikata wannan harin na Ta’addanci?  Amma da ka gabatar da wannan takarda sai kayi Magana da sunan Kiristoci kawai, wannan bai bamu mamaki ba, kuma ba matsala bace. Kamar yadda ka ke fada a cikin takardar da ka gabatar kana cewa “ kiristoci suna bukatar ‘yanci a Najeriya, suna bukatar ‘yancin yin addini” to nima ina fada maka da babbar murya cewar Musulmi suna da bukatar ‘yanci kuma, suna bukatar ‘yancin yin addini kamar yadda dokar kasa ta baiwa kowa damar yin addinin da ya zaba.

Nayi mamakin irin yadda pasto ka ke cewar kiristoci suna bukatar ‘yancin yin addini a Najeriya. Shin akwai wanda ya hana kirista yin addininsa? shin shugaban kasar Najeriya ba kirista bane? Shin shugaban Majalisar Dattawa ba kirista bane? Shin wane irin ‘yancin addini ka ke kira ya kai wannan Pasto? A baiwa kiristoci dama su ringa kashe musulmi babu ji babu gani, su ringa fyade wa matan Musulmi ko kuwa su ringa sace ‘ya ‘yan Musulmi suna yi musu zane a fuska suna mayar da su kiristoci!

Idan mai girma Pasto ya koma baya ya kalli tarihi da kyau, zai ga cewar Turawan Mulkin Mallaka da suka shigo kasashen musulmi, shin ba yada addinin kirista suka zo yi ba? kuma suka kwashi bakaken fata da nufin kaisu kasashen turai domin suyi aikin Bauta. Ko Pasto ya manta da mutanan kasar Aborigines (Australia) kusan mutum Miliyan 20 da turawan Mulkin Mallaka suka mayar kiristoci, ko Pasto ya manta da Kusan mutum miliyan 150 daga cikin Indiyawan daji da aka mayar kiristoci ta karfi da yaji a kudanci da Arewacin Amerika(North and South America), duka wadan nan fa iya yan gidanka da ka ke neman tanyonsu da agajinsu suka aikata wannan da sunan addininka na Kirista.

Idan pasto ya sake komawa ba a tarihi, kusan Mutum miliyan 180 aka dauka daga cikin Musulmi da maguzawa a Arewacin Afurka da yammaci da gabashi da sunan aikin bauta kuma aka tilastamusu komawa addinin kirista ta karfi da yaji wanda bayanai suka tabbatar da cewar kusan kashi 80 yanka su akayi aka zuba a cikin tekun Atalantika, wannan ta sanya har sai da ruwan teku ya sauya launi zuwa launin jini daga nan aka samu Red Sea. Kashi 12 a cikin waccan lambar aka dauka zuwa turai domin aikin bauta bayan antilasta musu komawa kiristanci ta karfi da yaji.

Yakin duniya na farko da akayi a shakarar 1930 idan na tuna dai dai da kuma yakin duniya na biyu da akayi a shekarar 1945 duk su waye suka jagorance shi? Shin ba kiristocin da Oritsejafor yake neman agajinsu bane, kisan Yahudawa sama da miliyan shida (6m) da Hitler ya yi shin ba da sunan kiristanci ya aikata abinda ya aikata ba? Ya maigirma Pasto, kasar da ka ke ganin kamar itace ubangijinku, idan tace abu ya kasance zai kasance wato Amerika, ba it ace ta Harba Makaman Nukiliya masu guba ba ya yankin Hiroshima da Negasazki a kasar Japan? duk wannan ba aikin ta’addanci bane da kiristoci ‘yan uwanka suke aikatawa mutanan da bau san hawa ba basu san sauka ba? Kamar yadda ya zo a cikin littafin Mattew a sabon alkawari, idan aka mari kirista a kuncin dama to ya mika na hagun a sake mari, shin kiristoci kun gasgata wannan sura da ta yi wannan bayanin kuwa?

Ita dai wannan kasar Amerika da ka ke kiran da ta kawo muku agaji a Najeriya, shin ba sune suka aikata kisan kishayi a kasar Vietnam ba, suka yi amfani da makamai masu guba akan talakawa bayin Allah, wannan ya sanya har yanzu a irin wadan nan kasashe ake haifar yara masu larura tunta gubar da kakaninnsu suka shaka, take binsu har yanzu? Missoloni ba kirista bane musulmi nawa ya kashe a kasar Libiya da basu jiba ba su gani ba?

Ya kai wannan Pasto, shin su waye suke aikata kisan kiyashi ga Musulmin gabas ta tsakiya da Afghanistan? duk lokacin da sojan Amerika ya aikata kisan gilla wannan sai kuce kuskure ne, amma kuma duk lokacin da aka sami kuskure wani Musulmi ya maida martini wannan shi ne dan ta’adda a wajenku shin wannan shi ne abinda iyayanku suka karantar da ku ken an, ko kuwa kuna son ku nuna mana cewa wannan it ace koyarwar addinin kirista?.

Idan muka dawo gida Najeriya, shin Musulmi nawa ne suka gamu da ajalinsu akan hanyar zuwa Jos a hannun kiristoci ‘yan kabilar Berom a jihar Plateau? Ko duk wannan Pasto bai san da shi ba, haka kuma, Musulmi nawa ne suka rasu a hannun tsagerun kiristoci a hanyar Kaduna zuwa Abuja a dai-dai kauyen Gonin Gora? Ko wannan shima Pasto bashi da Labari, duk fa wadan nan kiristoci ne suke aikatawa.

Kuma ita wannan kungiya ta Boko Haram da Pasto ya nace sai ansanyata a sahun kungiyoyin ‘yan ta’adda na duniya, shin kiristoci kadai suke kaiwa hari? Bayanai sun tabbatar da cewar duk wanda aka kama da sunan Boko Haram idan banda Kabiru Sokoto duk kiristoci ne, da Lucy Dangana da aka kama da safarar Makamai a kan iyakar Adamawa da Kamaru da kiristocin da aka kama bila adadun da yunkurin tarwatsa coci-coci da nufin gogawa musulmi kashin kaji, a ina Pasto yake duk wadan nan abubuwa suke faruwa? Me kuma ya yi akan wadannan al’amura da suka faru?

Mutum nawa sojojin JTF wanda galibinsu kiristoci ne suka kashe da sunan farautar Boko Haram, a Yobe da Maiduguri da Kano, su shiga gidan mutane suyiwa matan musulmi Fyade a gaban ‘ya ‘yansu a gaban mazajensu, kuma sannan su kashe mazan bayan sun kamala aikata badala da iyalansu, duk fa wannan ba wani boyayyan al’amari bane. Kuma ita wannan kungiya ta BH mu muslmi muna zargin tana da alaka da ku kiristocin Najeriya, domin a baya rahotannin sun nuna cewa magabacinka Jerry Gana ya taba yin belin tsohon shugaban BH da aka taba kamawa, shin babu alaka tsakaninku da wannan kungiya? Idan babu rami me ya kawo batun rami, lallai biri ya yi kama da mutum!

Ya kai wannan Pasto, muna tabbatar maka cewa mu Musulmi wallahi ba matsorata bane, kuma bamu taba yin nadamar kasancewarmu Musulmi ba, duk da wuya da tsanani da tashin hankalin da muke gani, wannan babu abinda yake kara mana illa kaimi da kara samun nutsuwa akan wannan addini namu, mun shaida cewa Allah mahaliccinmu yana nan kuma yana kallon duk abinda ke faruwa, Mun shaida cewa Manzon Allah annabin Allah ne, kuma mun shaida cewa Lahira gaskiya ce, aljanna gaskiya ce, wutar jahannama gaskiya ce, Ya mai girma Pasto muna tabbatar maka da babban baki da wasali cewa mu musulmi bazamu taba zama karakshin inuwar kiristanci ba a Najeriya, zamu cigaba da kasancewa mutane masu ‘yancin yin addininsu a duk inda muka tsinci kanmu.

Yasir Ramadan Gwale

yasirramadangwale@gmail.com

http://yasirramadangwale.blogspot.com

www.facebook.com/yasirramadan.gwale

Gwamnan Jihar Plateau Jonah Jang Ya Aikata Laifukan Yaki Da Ya Cancanci Hukuncin Kisa

Gwamnan Jihar Plateau Jonah Jang Ya Aikata Laifukan Yaki Da Ya Cancanci Hukuncin Kisa

Rahotannin baya bayan nan da suke fitowa daga jihar Pilato suna nuna irin yadda al’amuran tsaro ke kara dagulewa. Rahotannin sun bayyana cewar sojojin JTF da suke aikin samar da tsaro a jihar Pilato kusan yanzu sune babbar matsalar wannan jihar domin sun hada kai da kabilar Berom, irin yadda bayanai suka nuna cewa sojojin sun shiga garuruwan Fulani dake karamar hukumar Barikin Ladi da Riyom suna cinnawa ardon Fulani wuta babu gaira babu dalili, saboda kawai su dadadawa ‘yan kabilar Berom da gwamna jang. A lokacin da yake zantawa da  sashen Hausa na Gidan Radiyon BBC sakataren Miyatti Allah na Barikin Ladi Mallam Ado Muhamma ya kara da cewa “yanzu haka da nake Magana da kai sojoji suna kunnawa gidajen mutane wuta a song II da wuro Bello da Gure Dangere da Dyola da Rakweng da Sharu da kuzeng da Luggel da Rachi Matse” ance sun kona sama da gidaje 160, abin mamaki a lokacin da yake maida martini kakakin rundunar JTF ta jihar pilato sai yake shaidawa BBC Hausa cewar ba sojoji bane suke aikin sanyawa gidajen mutane wuta. Abin tambaya anan shi ne a ina sojojin JTF suke har wasu suka zo suke kona gidajen mutane babu ji babu gani?

Kamar yadda rahotanni suka nunar cewar an kashe wani jami’in ‘yan sandan kwantar da tarzoma kuma akayi awon gaba da bindigarsa. Wanda rahotanni sun tabbatar da cewar shi wannan jami’in tsaro da aka kashe, dauko gawarsa akayi zuwa unguwannin Fulani domin a gogamusu kashin kaji. Wannan ta sanya sojoji karkashin jagorancin Sabon kwamandan rundunar JTF Major Henry Ayoola suka yiwa garuruwan da ke Bangwai a karamar hukumar barikin Ladi inda babu wani bincike aka afkamusu tasa da ta kasa ana harbi da manyan makamai da kuma rowan bomabomai ta sama. Abin tambaya a nan me ya sa yanzu abin ya sauya salo Berom ne kawai ke kashe Hausa-Fulani? Shin Berom ne kawai kabilar da ta ke zaune a Jihar Pilato? Shin me ya sa wannan fada ya takaita ga yankunan da Berom suke da rinjaye? Me ya sa JTF suke hana Fulani komawa gidajensu da aka kona?

Sannan kuma, duk wannan abinda yake faruwa a Jihar Pilato na kashe talakawa bayin Allah, bai ja hankalin gwamnati ba sai da aka bayar da rahotannin mutuwar Sanata da shugaban masu rinjaye na jihar pilato dukkansu ‘yan kabilar Berom, abin tambaya akwai wani rai da yafi wani rai ne? duk wadan da ake kashewa basu damu gwamnati ba sai yanzu aka taba mutane ko? Irin yadda Berom ke kokarin shafe Hausa-Fulani daga yankunan Sabon Gidan danyaya da Dorawar Babuje da Barikin Ladi duk bai ja hankalin hukumomi ba, wannan fa shi ne irin tsabar rashin adalcin da hukumominmu suke yi a jihar pilato ta hanyar fifita kabilar Berom sama da kowacce kabila dake wannan jihar. Kamar yadda General Jeremieh Useni ya shaidawa sashen Hausa na BBC cewar Gwamna Jang shi ne kanwa uwar gamin a duk wadan nan abubuwan da ke faruwa, kuma bad a gaske yake son kawo karshen wadan nan tashe-tashen hankula ba.

Tarihi ya nuna cewa fiye da shekaru 400 Hausawa da Fulani makiyaya suke zaune da dabbobinsu lafiya lau da sauran kabilun da ke zaune a wannan jiha ta pilato suna kiwo tare da samar da arziki ga wannan yanki, domin babu wanda zai iya kididdige shanun Fulani da madarar su da Berom suka ci ko suka sha a iya tsawon wadan nan shekaru, sai gashi yanzu Jang yana son ya sauya akalar tarihi; haka kuma, Jonah Jang da kansa yake fada cewar asalin rayuwarsa ya taso a hannun Fulani ne, sune suka sanya shi makarantar firamare kamar yadda shima mai martaba Gbong Gwom Jos Da Jocub Gyang Buba ya taba fadar cewar Fulani sunyi masa komai a rayuwarsa don haka ne ma yake amfani da sunan Fulani a cikin sunansa wato “buba”.

Wannan rikici da tashin hankali da ake fama da shi a jihar pilato kusan ya samo asali ne tun shekarar 2001 da kuma 2004, lokacin da tsohon gwamna Joshua Chibi Dariye ya so ya shafe al’ummar musulmi daga karamar hukumar  Yalwan Shandam da Langtang da Wase da sauransu, a wannan lokaci abin ya yi kazantar da har sai da gwamnatin tarayya karkashin Obasanjo ta sanya dokar ta baci a jihar, inda gwamnan ya kau daga karagar mulki har na tsawon wata shida kafin daga bisani ya koma karagar mulki kamar yadda doka ta tanada. Tun bayan wannan lokaci ne ake ta samun takun saka tsakanin Hausa-Fulani da kabilar Berom.

Lokacin da wannan gwamnan mai ci a yanzu Jonah Jang ya zama gwamna bayan karewar wa’adin Dariye, al’amuran tsaro sun dan kyautata a wannan jihar wadan da suka gudu sun dawo, harkar kasuwanci ta fara komawa dai-dai, kafin daga bisani su kacame, bayan da Jang ya gama zama daram a kujerar gwamna kuma ya gama fahimtar al’amura, sai suka shirya manakisar zaben karamar hukumar Jos ta Arewa inda nan ne fadar gwamnatin jihar Pilato, kuma Hausa-Fulani suke da rinjaye a wannan karamar hukuma, duk kuwa da hukumomin tsaro a wannan lokacin sun gargadi gwamnati kan gudanar da wannan zabe, makircin da akayi a wannan zabe a shekarar 2008 shi ne sai aka sanya wannan zabe ranar alhamis sabanin ranar asabar da galibi ake sanya ranakun zabe a Najeriya, wato bayan da akayi wannan zabe ranar alhamis washe gari juma’a musulmi zasu fita kwai da kwarkwata domin gudanar da ibadar sallar juma’a, a gefe guda kuma arna sun shirya tsaf da makamansu.

Bayan da aka bayar da sanarwar cewar dan kabilar Berom ne ya yi nasarar wannan zabe. Musulmi suka nuna rashin amincewarsu, inda daga nanne abubuwa suka yi kazantar da basu taba yi ba a tarihin wannan jihar ankashe dubban musulmin da basu ji ba basu gani ba, aka yanka wasu aka zuba a cikin rijiyoyi da shadda wasu kuma aka ringa banka musu wuta da ransu, duk wannan ya faru ne a idon jami’an tsaro a unguwannin Dogo na Hauwa da Unguwar Rogo da Bauci road da Rokkos da sauransu, kusan tun daga wannan lokaci akayi bankwana da zaman salama a musamman Jos ta Arewa, inda kusan kullum sai kaji ankashe mutum ko dai ta kisan kan mai uwa da wabi, ko ta kisan mummuke da ‘yan kabilar Berom ke yiwa musulmi nan da can, duk wannan gwamnatin jonah jang tana da masaniyar hakan. Wannan rayuka kenan, bayan dimbin dukiyar da Allah ne kawai ya san iyakarta wadda ta salwanta a sanadiyar wadan nan fadace-fadace.

Anci gaba da tashin hankali a wannan jiha ta Pilato tsakanin Musulmi Hausa-Fulani da kabilar Berom har kawo wannan lokaci. A shekarar da ta gabata lokacin da Musulmi suka je sallar idi a babban masallacin idi na garin Jos aka afka musu da sara da harbi da bindigogi babu kakkautawa, inda jinin al’ummar musulmi ya ringa kwarara a kasa kamar ruwa, har kawo wannan lokaci babu wani abu da gwamnatin Jonah jang tayi na kokarin binkito tare da hukunta wadan da suka kaiwa musulmi wannan mummunan harin ta’addanci, wannan shi ne cikakken rashin adalci, wanda kuma shine silar dukkan abubuwan da suke faruwa a wannan jihar, domin babu wani mahaluki da zai zauna ana kashe masa mutane a gaban idon hukuma kuma babu wani mataki da ake dauka, sannan ya zauna ya zubawa sarautar Allah ido, ya zama tilar kowa ya nemi hanyar da zai baiwa kansa kariya tunda gwamnati ta gaza.

Haka kuma, Hausa-Fulani da suke sana’ar kabu-kabu da Babura suma ankashe daruruwa daga cikinsu, domin Berom zai hau babur ya sanya a kaishi unguwannin da Berom suke, su kashe me baburdin kuma su gudu da babur din, wannan haka aka ringa yiwa ‘yan acaba irin wannan dauki dai-dai. Duk wadan nan abubuwa da suke faruwa ba wai a boye ake yinsu ba, ana yinsu ne da sanin dukkan bangarorin jami’an tsaro na wannan jihar.

Bayan haka, a kwanakin baya wasu mutane da rahotannin suka tabbatar da cewa kiristoci ne suka kai harin kunar bakin wake a cocin church dake a jihar ta pilato. Inda nanma akayi hasarar rayuka, wannan ta sanya ‘yan kabilar Berom suka dauki doka a hannu inda suka ringa kisan Hausa-Fulani Musulmi da basu san hawa ba basu san sauka ba. Bayan kuma shi wanda ya kai wannan hari ance sananne ne yana zuwa wannan coci dan yin sabis. Gwamnatin da jami’an tsaro duk suna ji suna kallo anata kashe musulmi a wannan jihar, saboda cimma boyayyar manufarsu tabice Hausa-Fulani Musulmi daga wannan jihar ta pilato.

Wani abin da zai sake tabbatar da wannan mugun nufi na kabilar Berom shi ne, a kwanakin baya rundunar ‘yan sanda ta kasa suka kama wani jami’in kwastam dan kabilar Berom da safarar makamai zuwa ga kabilarsa ta Berom don su cigaba da aikin da gwamnatin Jang ta sanya su na kisan musulmi babu kakkautawa a wannan jihar, sai gashi abin kunya kakakin gwamnatin pilato ya fito kafar watsa labarai yana kare wannan mugu azzalumin kwastam da aka kama.

Idan har duniya da gaskiya, kuma adalci ake son tsaidawa a ban kasa to ya kamata kotun duniya ta yi sammancin Gwamnan Jihar Pilato David Jonah Jang saboda ya aikata laifukan yaki. Kamar yadda tsohon mai shigar da kara na kotun duniya Lius Morino Ocampo ya bayar da sanarwar sammacin kamo shugaban kasar Sudan Umar Hasan Al-Bashir a saboda ana zarginsa da aikata laifukan yaki a yankin Darfur ga mayakan larabawan Janjaweed, to lallai Jonah jang ya yi abinda ya ya dara na el-bashir domin kuwa a karkashin umarninsa aka yiwa garuruwan Fulani rowan bama bamai.

Kamar yadda aka gurfanar da Thomas Lubanga da Tsohon Shugaban Kasar Liberia Charles Taylor shakka babu ya cancanci a gurfanar da Jang kuma a yanke masa hukuncin kisa ta hanyar rataya. Idan har kotun Duniya tana kallo za’a yankewa Marigayi Saddam Hussein tshon Shugaban Iraqi hukuncin kisa ta hanyar rataya saboda zarginsa da akayi da kisan Kurdawa 34, to kuwa babu abinda zai hana zartas da irin wannan hukunci akan Jonah Jang, domin ko Ojukwu da ya jagoranci yakin Biafara bai aikata ta’addancin da Jang ya aikata ba.

Haka kuma, suma kungiyoyin kare hakkin Bil-adama idan da gaske suke aiknsu to lallai ya kamata su shiga jihar Pilato su ceto dubban al’ummar da busu san hawaba basu san sauka ba, ake ta aikata musu kisan kai babu kakkautawa, kamar yadda aka aikata kisan kiyashi a serebranica ga musulmin Bosniya to lallai irinsa ake aikatawa ga Musulmi a jihar pilatu.

Yasir Ramadan Gwale

yasirramadangwale@gmail.com

http://yasirramadangwale.blogspot.com

www.facebook.com/yasirramadan.gwale

Kwallon Kafa: Siasia Yana Karbar Albashin Mutum 277

Kwallon Kafa: Siasia Yana Karbar Albashin Mutum 277

Najeriya a harkar kwallon kafa a shekarun baya ba kanwar lasa ba ce. Don idan muka tuna lokacin da akayi gasar cin kofin duniya a shekarar 1994 a kasar Amurka, Najeriya ta taka rawar gani sosai domin ta samu tsallakewa daga rukuni har takai matsayin kwata final, kafin a fitar da ita daga wannan gasa, irin rawar da Najeriya ta taka a wannan gasa ta 1994, ya kara mata kima da daraja a idon duniya sosai da sosai, wannan ta sanya Najeriya baza ta manta da manyan 'yan kwallon da suka yi kwallo ta kishi ba irinsu Tijjani Babangida da Garba Lawal da Emmanuel Amonike da Ikedia da Austin Eguavoen da Kanu Nwankwo da Sunday Olushe da marigayi Rasheedi Yakini da kuma tsohon mai tsaron gida wato Peter Rufai da sauransu da dama.

Sunan Najeriya bai kara daukaka ba a harkar kwallon kafa sai a gasar Atlanta 1996, inda Najeriyar ta lallasa kasar Brazil a wasan karshe, wanda wannan ya baiwa Najeriya nasarar zamowa zakara, wannan nasara da Najeriya ta samu ta bangaren dan wasan ta Kanu Nwankwo hakika babbar nasara ce da ba'a taba tsammani ba, domin kuwa kowa yasan yadda kasar Brazil take a harkar kwallon kafa, tun bayan wannan gasa ce sunayan mutane irinsu Daniyal Amokashi da Kanu Nwanko da Jay Jay Okosha suka yi suna a duniya, duk sadda dan Najeriya ya fita zuwa kasar waje sai kaji ana tambayarsa ya labarin 'yan wasan Najeriya wadan da muka lissafa.

Sannan sunan Najeriya ya buwaya a kasashen Afurka baki daya ta fannin kwallon kafa, domin duk fadin Nahiyar babu 'yan wasan da suka kai na Najeriya iya taka leda, duba da irin nasarar da suka ringa samu ta lashe gasar cin kofin Nahiyar Afurka, wannan ya karawa sunan Najeriya martaba sosai a kasashen Afurka ta fannin tamaula.

Haka kuma, a gasar cin kofin duniya na shekarar 1998 da akayi a kasar Faransa wannan ma 'yan wasan Najeriya sun yi rawar gani. Domin sun kai wasan kusa da nakusa da na karshe, kusan zamu iya cewa tundaga wannan shekara ce Najeriya ta fara komawa baya a harkar kwallon kafa, kafin daga bisani ta durkushe baki daya.

Wani abin mamaki shi ne, babu wani abu da yake hade kan 'yan Najeriya waje daya kamar kwallon kafa, hakika duk lokacin da ake yin kwallo da Najeriya zaka sha mamakin ganin yadda 'yan Najeriya ke fatan alheri ga tawagar Super Eagles, babu maganar kudu ko Arewa Musulmi ko Kirista kowa murna yake yi idan aka samu nasara, haka kuma zaka ga 'yan Najeriya cikin damuwa sosai idan aka lallasa Najeriya babu maganar Bahaushe ko Beyerabe ko Inyamuri kowa nuna damuwa yake yi.

Haka kuma, idan ka shiga gidan kallon kwallo a lokacin da ake yin kwallon kafa da Najeriya, zaka ga yadda kusan dukkan kabilun Najeriya ke haduwa ana raha da juna a gidajen kallon kwallo, babu maganar wane ba wane ne ba, idan kuwa akaci nasara kaga bahaushe ya rungume beyerabe bafulatani ya rungume inyamuri ana murna ana sowa da nasarar da wannan kasar tamau ta samu.

Harkar kwallon kafa yanzu a Najeriya kusan zamu iya cewa ta zama tarihi. Shakka babu bazai zama kuskure ba idan mutum yace kwallo ta zama tarihi a halin yanzu, sai dai a baiwa yara na baya labarin irin kokarin da 'yan kwallonmu sukayi a baya, babu batun babban kulab na kasa Super eagles ko Flying Eagles ko Super Falkons ko matasa 'yan kasa da shekaru 20 ko 18 da dai sauransu kusan gabaki daya harkar wasanni ta koma baya, kuma irin kishi da dokin da 'yan Najeriya suke dashi a harkar kwallon kafa kusan shima zamu ce ya zuwa yanzu kusan ya zogaye fiye da yadda aka sanshi; da gwamnatin Najeriya da gaske take akan hadin kan kasarar nan da batayi sake da harkar wasanni ba, domin kamar yadda muka fada babu wani abu kaf Najeriya da yake hada kan 'yan kasa kamar wasan kwallon kafa ko kuma kace Super Eagles, amma akayi sakaci da wannan dammar da gangan ta zogaye a banza.

Tsohon dan wasan Najeriya a shekarun da suka gabata Samson Siasia yanzu shi ne mai horas da 'yan wasan super Eagles kulab din da ya taba bugawa kwallo. Sai muce Najeriya bata taba samun koma baya ba a harkar kwallon kafa kamar yadda ta ke samu a yanzu karkashin kulawar Siasia wanda yana daya daga cikin Wadan da suka fito da sunan Najeriya a harkar kwallon kafa a shekarun baya, duk kuwa da irin makudan kudin da yake karba a matsayin albashi, kamar yadda majalisa tayi doka cewar mafi karancin albashi a gwamnati shi ne Naira 18,000 kusan zamu ce Siasia yana karbar sama da albashin mutum 277 don yana karbar kusan Naira Miliyan 5,000,000 a duk watan duniya da sunan mai horas da 'yan wasan Najeriya.

Haka kuma, kungiyar ta super Eagles har yanzu ta kasa tabuka wani abin kirki a karkashin kwac Siasia domin har yanzu ko kwalba basu dauko mana ba da sunan samun nasara, harkar siyasa da kabilanci kusan zamu iya cewa su ne ummul haba'isin durkushewar harkar wasanni a Najeriya, domin akwai 'yan wasa wadan da suka iya kuma suka cancanta amma saboda kabilanci sai a kyalesu a dauki wadan da basa iya tabuka komai sai kashe musu kudi da akeyi ana zagayawa da su yawan buda ido da sunan kwallo. Lallai ya kamata hukumar NFF su yi dukkan mai yuwuwa wajen kawo gyara a harkar wasanni a Najeriya.

Muna fatan watan wata rana sunan Najeriya ya sake buwaya a harkar kwallon kafa a duniya, ina burin ganin lokacin da kulab din Super Eagles zasu ciwo gasar kofin duniya su zo da shi Najeriya su zagaya da shi Najeriya gabaki daya, inama zan samu damar dazan daga wannan kofi domin nuna murna da nasarar da kasata ta samu a gasar cin kofin duniya, lallai ina fatan ganin wannan ranar, Allah ya nuna mana da alheri.

Yasir Ramadan Gwale

yasirramadangwale@gmail.com

http://yasirramadangwale.blogspot.com

Budaddiyar Wasika Zuwa Ga Mataimakin Shugaban Kasa Muhammad Namadi Sambo

Budaddiyar Wasika Zuwa Ga Mataimakin Shugaban Kasa Muhammad Namadi Sambo

Bayan sallama irin ta addinin Musulunci Assalamu Alaikum Warahmatullah, ya maigirma mataimakin Shugaban kasa ina fatan kana lafiya,ina kuma fatan wannan wasika zata riskeke cikin koshin lafiya. Ya maigirma mataimakin Shugaban kasa, hakika lokaci ya yi da zamu fito fili mu bayyana maka gaskiyar abinda yake damunmu, musamman mu al'ummarka, wato mu mutanan Arewacin Najeriya, ya maigirma, shakka babu ko munki ko munso kai ne mutumin da dokar Najeriya ta ce shi ne mataimakin shugaban kasa, ko muna sonka ko bama sonka bamu isa muce kai ba mataimakin shugaban kasa bane, kaine zaka dafawa wannan gwamnati mai ci a matsayin mataimaki kamar yadda doka ta tanada. Don haka dole mu kawo kuka inda doka ta tanadar.

Kuma ba boyayyan al'amari bane cewar mu mutanan Arewa bama tare da wannan jam'iyya taku, wannan kuma bazai rasa nasaba da kasa samar mana da abubuwan more rayuwa da jam'iyyar taku ta shafe sama da shekaru 13 tayi tundaga shekarar 1999 har ya zuwa yanzu, babu wata matsala da jam'iyyarku ta dauka daga Arewa kuma ta kawo karshenta, amma kuma wannan ba zai zama dalilin da zai sanya a kasa yi mana adalci ba, domin muma 'yan Najeriya ne kamar yadda kowa yake da hakki haka muma muke da hakki, dan haka abinda ake kira romon demokaradiyya muna da hakki a cikinsa tunda gwamnatin bata 'ya jam'iyya daya bace, gwamnati ce ta 'yan Najeriya.

Ya maigirma mataimakin Shugaban kasa, hakika idan zamu fadi gaskiya, babu wani mutum da yake da mukami mafi girma a fadin tarayyar Najeriya da ya fito daga yankinmu na Arewa face kai, duk wani wanda zai fito yayi ikirarin cewa shi ne shugabanmu a Arewa koma bayanka ne, domin kaine wanda doka ta sani, ya maigirma mataimaikin Shugaban kasa, da kai da gwamnonin Arewa 19 da sanatocin Arewa 58 da 'yan majalisun tarayya sama da 100 kune shugabanninmu a yankin Arewa, inada yakinin cewa abinda yake faruwa musamman game da yankin da ka fito wato Arewa ba boyayye bane a gareka, musamman al'amuran da suka shafi tsaro da talauci da rashin aikin yi da suka addabi galibin matasanmu da fatara da tayi mana daurin butar malan.

Ya maigirma mataimakin Shugaban kasa ina mai tunasar da kai cewar, kai ne ka saba al-qurani mai tsarki a gaban miliyoyin 'yan Najeriya a filin Eagle Square da kuma ta gaban akwatunan talabijin kasha rantsuwar kama aiki, ka rantse da Allah cewar zaka tsare gaskiya da amanar da 'yan Najeriya suka baku, kuma zaku kare tsarin mulkin tarayyar Najeriya, ina mai cike da fatan cewa baka manta da wannan ranar ba, ya mai girma mataimakin shugaban kasa, hakika kai musulmi ne dan uwanmu, kamar yadda muke yiwa kawunanmu fatan samun rahamar Allah a ranar gobe kiyama, kaima muna fatan ka samu wannan rahama tasa subahanahu wata'ala, ranar da ya kirata da sunaye daban daban kamar Taghabun da sauransu, ranar kuma da yace 'ya 'ya da dukiya bazasu amfaneka da komai ba "illa man atallahu bi kalbin saleem" wato tsarkakkiyar zuciya ta gaskiya ita zata kubutar da dukkanninmu a wannan rana, Allah ya bamu ikon samun rahamarsa damu da kai baki daya.

Kamar yadda kowa ya sani ne cewar gwamnatinku ta gaza kwarai da gaske wajen kare rayukan miliyoyin al'ummar Najeriya. Ya maigirma, wannan maganar ko wanda ba'a Najeriya yake ba, idan dai har yana bibiyar al'amuran yau da kullum da suke fitowa daga Najeriya yasan da haka, ya mai girma, hakika, tabbas, duk wanda ya rasa ransa walau ta hanyar hadarin mota ko 'yan fashi da makami ko tashin bom ko harbin sari ka noke, koma wacce irin hanya mutum ya mutu ba tare da ya cancanci mutuwa a lokacin ba, wannan alhaki ne da ya rataya a wuyanku, kai da shugaban kasa, domin duk laifin da zai dauka to sai ka kama masa wajen dauka tunda gwamnatinku ce kuma kaine mataimaki.

Ya maigirma Mataimakin Shugaban Kasa, kamar yadda ka sani tun lokacin da aka bayar da sanarwar cewar jam'iyyarku ce ta sami nasarar zaben 2011 aka fara karya kumallo da asarar rayuka musamman a yankin da ka fito, kuma abin yafi muni ainun a jihar da kayi gwamna wato Kaduna, hakika mutane da yawa sun rasa rayukansu a garin zankowa a rikicin bayan zabe, ba dan sun cancanci mutuwa a wannan lokacin ba, ankashe mutanen da basu san hawa ba basu san sauka ba, saboda kawai zalinci da nuna cewa amfi karfinsu, bayan kuma dokar kasa ta baiwa kowa damar zama a duk inda yaga dama, ya maigirma mataimakin shugaban kasa dukkanmu 'yan Najeriya musamman mu 'yan Arewa mun taya 'yan uwanmu 'yan zankowa al-hinin abinda ya same su na rasa rayuka da kuma asarar dimbin dukiya, ya maigirma, wannan abinda ya faru a jiharka ne kuma mahaifarka, amma ko kodan bamuji ka kai ziyara domin jajanta musu abinda ya shafesu ba domin su dan rage radadain abinda ya samesu.

Ya maigirma, kamar yadda ka sani, babu dadewa da kammala wannan zabe abokinka, shugaban kasa yazo har wannan jiha taka inda yakai ziyara garuruwan da ke kudancin Kaduna kuma ya bude majami'a domin nuna godiya da yadda ka taimaka musu suka samar da Gwamna na farko dan kudancin Kaduna. Ya mai girma mataimakin shugaban kasa, kasani har yanzu mutanan wannan gari na zankowa suna nan a sansanin al-hazai dake Mando a cikin garin Kaduna a matsayin 'yan gudun hijira, wannan babban abin takaici ne a garemu, kuma a gareka, ace a kasarmu 'yan uwanmu suna gudun hijira a mahaifarsu, kuma muna da dan uwanmu da yake mataimakin shugaban kasa, wallahi wannan abin tambaya ne a gareka ranar gobe kiyama.

Ya mai girma, yanzu babban abinda ya damemu musamman a Arewa shine matsalar tsaro. Mun san da cewa kuna da masaniyar yadda al'amura ke wakana, kuma kullum kalaman da suke fitowa daga bakunanku sune cewar zaku dauki mataki ko kuma kuna nan kuna daukar mataki, amma kuma har wannan lokaci da nake rubuta wannan wasika ba muda aminci acikin garuruwanmu zaman zullumi karuwa yake, bama bamai kara fashewa suke, adadin rayukan da ake rasawa kara yawa suke. Ya maigirma, shakka babu wannan nauyi ne wanda ya rataya a wuyanku, na samar mana da tsaron rayukanmu a matsayinmu na 'yan Najeriya, idan har za'ace gwamnatinku ta gaza ta kowanne fanni baku iya samar mana da komai ba, to yakamata a ce muna da kariyar rayukanmu, ya maigirma, shin wane irin zafi ko radadi ka ke ji a ranka a duk lokacin da bam ya tarwatse al'ummarka suke ta halaka? ganin yadda jinin al'ummar da ka fito daga cikinta yake kwarara kamar ruwa a kogin gurara. Lallai ne zaku amsa tuhuma agaban Allah ranar gobe kiyama akan dukkan wani dan Najeriya da ya rasa ransa a lokacin da kuke rike da ragamar shugabancin wannan kasa.

Ya maigirma mataimakin shugaban kasa muna rokon ku, da ku duba Allah, ku tuna ranar da za'a kawo ku gaban ubangiji a daure da sarka, wanda malamai suka gayamana cewar adalcin kowane shugaba shi ne zai kwance shi, ku ji tsoran wannan ranar, ku taimakawa talakawa bayanin Allah, ku taimakawa marayu, ku taimakawa kananan yara da mata da tsofaffi ku samarmana da aminci acikin garuruwanmu, hakkin kowace gwamnati ne ta samarwa da al'ummarta tsaron rayukansu da dukiyoyinsu, ya maigirma, dan Allah wane irin dadi ko akasinsa ka ke ji a lokacin da ka fita wata kasar waje kaga al'umma na zaune cikin kwanciyar hanakali da lumana idan ka tuna al'ummarka?.

Ya maigirma mataimakin Shugaban kasa, muna da bukatar samun diyyar rayukan 'yan uwanmu da suka rasa rayukansu a sanadiyar dukkan rikice rikicen da suka wakana a karkashin gwamnatinku da tashe tashen bama bamai a kusan daukacin jihohin Arewa, kamar yadda kuka bayar da diyya ga masu hidimar kasa 'yan kudu da aka kashe a Bauchi a sanadiyar rikicin bayan zabe a shekarar 2011, lallai muma muna rokon a bamu diyyar 'yan uwanmu da muka rasa a sanadiyar wadan nan tashe tashen bama bamai da sauransu ko al'ummarmu zasu samu su rage radadin abinda ya samesu, lallai idan kunyi haka watakila ku sami sassauci ranar gobe kiyama.

Ya mai girma, wani bangare da kuma yake kara cimana tuwo a kwarya shine fama da muke yi da bakin talauci da rashin aikin yi tsakanin dimbin matasanmu, da yawa suna nan sun kamala karatu babu aikin fari bare na baki, ga dimbin talakawa a kauyuka da birane wadan da basu sami dama sun yaki jahilci ba suma suna bukatar a taimaka musu ta fannin noma da sana'o'i. A kwanakin baya wata hukuma ta bayar da kididdigar cewar Arewacin Najeriya shi ne yankin da yafi kowane yanki fama da talauci a fadin Najeriya, kuma jihar Sokoto itace jiha ta farko a talauci, muna fatan gwamnatinku ta dubemu ta saukaka mana halin da muke ciki, kuma muna fatan gwamnatinku ta sauke nauyin da yake akanta na rage talauci a tsakanin 'yan Najeriya kamar yadda kukayi alkawari a lokacin da kuke fafutukar yakin neman zabe; muna da masaniyar wani shiri da wannan gwamnati taku ta fito da shi mai suna You Win saboda samarwa da dimbin matasanmu aikin yi, ya maigirma shakka babu wannan shiri mu mutanan Arewa bama amfanarsa yadda ya kamata, a matsayinka na shugabanmu ya kamata ka bincika ka gani.

Ya maigirma mataimakin Shugaban kasa, harkoki da dama sun tabarbare a wannan kasar tamu, lallai idan kuka bari lokaci ya cimmuku baku iya yin kokari wajen sauke nauyinku ba, wallahi zaku kasance masu nadama a lokacin da bazata yi muku amfani ba, kuma ku sani zaku kasance ababen tuhuma a wajen Allah ranar gobe kiyama.

Daga karshe ya maigirma mataimakin shugaban kasa, ina mai amfani da wannan damar domin mika ta'aziyata gareka ta rashin da kayi na dumbin al'ummaka na Arewa a sakamakon rikice rikice da dama da suka hada da Jos da zankowa da sauransu, ina fatan Allah yakai rahama ga wadan da suka rigamu gidan gaskiya, wadanda suke kwance kuma a asibitoci Allah ya basu lafiya, Allah ya bamu lafiya da zama lafiya a Arewa da Najeriya baki daya, wassalam, Nagode ka huta lafiya.

Yasir Ramadan Gwale

yasirramadangwale@gmail.com

http://yasirramadangwale.blogspot.com

 

Me Ya Sa Tarihi Ke Maimaita kansa?

Me Ya Sa Tarihi Ke Maimaita Kansa?

Kusan a bayyana ya ke cewar amsar wannan tamabaya gajeruwa ce. Shakka babu kamar yadda muka sani sau da dama a rayuwa tarihi kan maimaita kansa daga lokaci zuwa lokaci, muna iya cewa dalilin da ya sanya tarihi ke maimata kansa shi ne, saboda mutane basu cika daukar darasin da ke cikinsa ba, hakika Allah ya halicci dan adam mai yawan mantuwa, wasu lokutan mantuwa takan zama abin so kwarai da gaske, wani zubin kuma mantuwa takan zama abin zargi.

Hakika darasin da ke cikin tarihi, wata makaranta ce babba da kalilan daga cikin mutane ne sukan kammalata da kuma samun kyakykyawan sakamo, wasu kuma sukan fara su kasa gamawa, har mai aukuwa ta auku akansu, a lokacin da wadan da sukaci jarabarwar tarihi ke murna wasu kuma na cizon yatsa da dana sani a lokacin da ba tada amfani.

Idan muka duba tarihi shekaru 42 da Gaddafi ya yi yana mulkin kasar Libiya sunzo karshe ne a ranar 20 ga watan oktoban 2011; lokacin da guguwar sauyi ta kada kuma tayi awon gaba da shi, Gaddafi dai baiyi amfani da darasin da ke cikin tarihi ba don day a kalli wadan da suka gabaceshi da wata kila abinda ya sameshi bai sameshi ba, haka shi ma Saddam Hussein na Iraqi mulkinsa ya zo karshe ne a shekarar 2006, Husni Mubarack na Masar shima mulkinsa yazo karshe ne a shekarar 2011 da su Ben Ali na Tunisiya da Ali Abdallah Saleh na Yemen duk mulkinsu yazo karshe ne a shekarar 2011. Duka wadan nan shugabanni da suka gabata da sun kalli tarihi kuma sun yi aiki da shi da watakila basu fada cikin halin da suka fada ba, kuma abinda ya samesu babban darasi ne ga na baya.

Idan kuma muka kalli shugabanni irinsu Robert Mugabe na Zimbabwe wanda yake akan karagar mulki kusan tun shekarar 1980, da kuma Paul Biya na Kamaru wanda shima ya shafe tsawon Shekaru akan mulki kusan tun 1982 yake a karagar mulki, shima Yuwairi Musaveni na Uganda ba a barshi a bayaba wajen diban dogon lokaci akan mulki wanda shima yake akai tun daga shekarar 1985 har kawo yanzu; lallai wadan nan shugabanni ya kamata suyi karatun ta nutsu kuma su kalli tarihi su yi tunanin gobe da kuma abinda zai faru nan gaba, Shakka babu kamar shekaru uku da suka gabata, idan kace ka yi katarin haduwa da Husni Mubarack na Masar a sansanin shakatawar nan na Sham el-sheikh ka ce Muhammad Mursi shi ne magajinsa a shekarar 2012 watakila ya ce maka haka bazata taba faruwa ba, amma da yake tarihi baibar komai ba yau ga Mubarack na raye kuma yana kallon wani yana shugabancin Masar ba shi ba.

Shugaba Fidel Castro na kasar Cuba kusan shi ne ya yi katarin gamawa da mulkinsa lafiya. Hakika zaka iya cewa Castro ya taki sa'a, domin yabar karagar mulki ba dan al'ummarsa sun juya masa baya ba kamar yadda ya faru da Mubarack da Ben Ali da sauransu, hakika tsufa ya yiwa castro shigar sauri a lokacin da duniya ta ke kara komawa sabuwa kuma sabbin al'amura ke kara faruwa, tunani ke kara fadada, shakka babu da ba dan tsufa ba da Castro ana nan ana damawa da shi a harkar shugabanci da siyasa, to haka dai tarihi ke tafiya da al'amura daban daban, dukkan wadan nan abubuwa da suka faru tarihi ne yake ta maimaita kansa, sai dai wasu da yawa musamman daga cikin masu mulki sun gafala daga daukar darasin dake cikinsa.

Lallai masu Mulki su sani kuma su hankalta cewa babu wani mulki ko shugabanci da yake dawwama face mulkin ubangiji(tsarki ya tabbata a gareshi) subahanahu wata'ala, lallai duk wani mai mulki da yayi zaton zai dawwama shakka babu ya yaudaru da rudin duniya, kuma tunaninsa ya gaya masa karya, shuwagabanni da dama da suka gabata sunyi kokarin cigaba da kasancewa bisa karagar mulki amma kodai mutuwa tayi musu yankan hanzari irinsu marigayi Sani Abacha, ko kuma cutar nan da bata jin magani ta cimmusu basu shirya ba wato tsufa, ko kuma su fuskanci bore daga al'ummarsu duk kuwa da cewar sun kyautatawa al'ummar tasu wajen samar musu da abubuwan bukata kamar irinsu Gaddafi.

Mukam munyi katari a Najeriya ba mu da irin wannan matsala ta masu son tsawaita mulki. Hakika muma shugabanninmu ba dan basu da wancan tunani ne yasanya basa tsawaita mulki irin na su Mugabe ba, sai dai Najeriya ta sha bamban da sauran kasashen duniya, watakila saboda yawan kabilu da mabambanta ra'ayi da kuma yanayinmu na kudu da Arewa ko Muslmi da Kirista.

Inda Najeriya ta yiwa sauran kasashen Afurka shal shi ne muguwar sata da zamba da rubda ciki akan dukiyar al'umma da kuma cin hanci da rashawa da ya yi mana katutu. Shakka babu idan mutum yace babu wata kasa a duniya da ta ke da gungun barayi a matsayin shugabanni kamar Najeriya bai yi karya ba, irin satar da aka dibga a Najeriya bana jin akwai wata kasa a Nahiyar Afurka da za'a yi mata irin wannan satar ta kai labara. Tundaga lokacin da aka samu mulkin kai 1960 zuwa yau irin kudin da 'yan Najeriya suka sata daga aljihun gwamnati ya isa a rushe kasashen Afurka gabaki daya a sake gina sabuwar Afurka mai dauke da dukkan ababen bukata na rayuwar yau da kullum.

Hakika Allah ya albarkaci Najeriya da dumbin arziki na fitar hankali, tun daga albarkatun kasa da ma'adai babu iyaka ga man fetur da dangoginsa ga kuma albarkar jama'a sannan a gefe guda kuma ga mugayan barayi miyagu azzalumai. Cutar da ta ke damun 'yan Najeriya kusan tafi ta kowace kasa a Nahiyar Afurka, duk da cewa a Uganda da Kamaru da Zimbabwe da muka bada misali da su shugabanninsu sun tsawaita wa'adi da wakaci ka tashi amma sun wadata al'ummarsu musamman da wutar lantarki idan ka kwatatnta su da Najeriya. Abin da ake kira wutar lantarki dan Najeriya sai dai ya gani a wata kasar amma shikam ta gagareshi samarwa a kasarsa duk kuwa da arzikin da Allah ya huwa cewa wannan kasa tamu.

A kasar Brazil da kwanan nan shugaban kasa ya je, kuma tafiyar ta tayar da kura, a lokacin tsohon shugaban kasar Luis Inacio Lula De Silva sun kashe kudi kimamin dalar Amerika Biliyan Biyar ($5B) wajen samar da wutar lantarki mai karfin mega watt 120,000 a cikin shekara daya kacal, haka nan kurkusa ma kasar Afurka ta kudu sun kashe dala biliyan daya ($1B) wajen samar da wuta me karfin mega watt 5,000 acikin shekara daya suma. Idan kuma muka dawo gida Najeriya gwamnatin da ta gabata ta Cif Obasanjo ta kashe kudi dalar Amerika biliyan goma sha shida ($16B) akan samar da wutar lantarki, amma yanzu zancen da muke babu kudin kuma babu wutar lantarkin, haka nan Allah ya jarrabemu da muggan barayi a matsayin shugabannin.

Bana jin a duniya akwai wasu mutane da suke yin laftu na kudi suna kaiwa kasashen waje suna ajiyewa kamar 'yan Najeriya. Shakka babu irin yadda 'yan Najeriya suke daukar kudi niki niki abin sai wanda ya gani, ban sani ba ko gaskiya ne, ance akwai wani hamshakin attajiri a Najeriya sai da ya ciko kwantaina guda shake da daloli zuwa Najeriya daga Turai da Amerika, wannan bai bani mamaki ba, domin kuwa akwai wani yaro dan Najeriya da yaje wata jami'a a wata kasa yana neman admission suka bashi hakurin cewar sun rufe sai wata shekarar, amma da yaron nan ya tashi sai ya ce a nuna masa ofishin shugaban jami'a da yaje wajensa akwati ya dauko ya bashi cike da dalar Amerika yace masa ka dauki abinda kake so ka bani adimission, kaga kuwa duk abinda aka ce dan Najeriya zaiyi da kudi babu abin mamaki.

A irin wannan hali ne shugabanninmu suke yawo zuwa kasashen turai da Amerika karkashin tawaga mai tarin yawa da sunan neman masu zuba jari a Najeriya, kaji shugaban kasa ya kwashi mutane sama da dari (100) wai sun tafi neman 'yan kasuwar da zasu zo Najeriya don zuba jari, kudin otal din da za su kwana kwai ya isa arzikin wani kauyen a wata kasar, sai kayi mamaki shin su masu zuba jari mahaukata ne zasu kwaso kudinsu su zo su zuba a hudajjan aljihu, shugabanni a Najeriya sun kwashi dukiya sunkai kasashen Turai da Amerika saboda can yafi tsaro, amma kuma suna son wani ya kwaso dukiyarsa ya zuba a inda babu tsaro, alhali kuma duk kan kasashen da za'a nemo su zuba jari suna da ofishin jakadancinsu a Najeriya suna sanar da su irin halin da ake ciki a Najeriya na satar baki 'yan kasashen waje tare da yin garkuwa da su, idan da karar kwana akan kashe wasu daga cikinsu, shin su mahaukata ne kamar shugabanninmu zasu kwashi dukiya su zuba a cikin hudajjan aljihu?

Mafiya yawan jajayan fatar da suke kwaso kudi su zo Najeriya, idan ka bincika kodai suma barayi ne ko kuma kudin ainahi daga dukiyar 'yan Najeriya aka ranto a zo Najeriya a kara samun wata dukiyar ta banza, idan ka kalli badakalar kamfanin Halliburton zaka tabbatar da haka, galibin turawan da suke aiki a matatun man fetur suma barayi ne, ko kuma kaga bature dan tasha watakila a kasarsu shi ba komai bane, kawai ya kwaso sufanu da gajeran wandonsa yana budawa waishi injiniya yana karbar kudi a banza.

Shakka babu duk irin yadda zaka misalta barayi miyagu azzalumai to shuwagabannin Najeriya sun dara nan, har sai da ta kai tsohuwar shugabar EFCC take tuhumar hankalin shugabannin Najeriya saboda abinda ta gani ya shallake hankalin dan adam. Allah ya ce baya canzawa mutane sai mutane sun canzawa kansu kuma yana  baiwa mutane shugabanni dai dai dai da su, ba zai zama kuskure ba idan ka ce shugabannin Najeriya sunyi dai dai da 'yan Najeriya, domin dukkan irin waccan satar da muka ambata sai ka rasa waye mai gaskiya acikinmu, domin idan ka dauki kowa ka karkade shi sai kaga ashe shima wani karamin barawo ne dama ce kawai bai samu ba, duk wanda ya kalli badakalar cin hanci ta Farouk Lawan zai tabbatar da haka, domin mai dokar barci ne ya bige da gyangyadi, kuma Farouk ba shi kadai bane irinsa suna nan kamar jamfa a Jos.

Lallai 'yan Najeriya, idan muna son ganin gyara na hakika sai munji tsoron Allah mun gyara halayenmu tsakaninmu da ubangiji sannan mu sami abinda muke nema. Kullum muna kiran gyara da fatan samun shugabanni na gari masu adalci, amma akan kanmu bama yiwa juna adalci, ga zalinci tsakanin talakawa ya yi yawa ga gulma da munafurci da tsabar rashin tsoron Allah da karya da yaudara da ha'inci duk sunyi mana katutu, ga zinace zinace ga shan giya ga fyade ya karu, ga duk wani aikin badala ya karu, ga kuma uwa uba kisan kai na mutanan da basu san hawa ba basu san sauka ba, duk wannan abubuwan da suke faru sai mun gyara halayenmu sannan mu sami abin da muke nema na shugabanni adalai.

Suma a nasu bangaren shugabannin Najeriya su sani adalci shi ne zai zaunar da kasarnan lafiya, rashin adalcin da muke yiwa juna shi ne musabbabin dukkan irin halin da muke ciki, shugabanni basa jin dadi, talakawa basa jin dadi, to waye yake jin dadi a Najeriya? Lallai muna bukatar shugabannin suji tsoron Allah su yi adalci a tsakanin dukkan 'yan kasa, babu wanda ya fi karfin doka, don haka dukkan wanda ya karya doka a yi masa hukunci dai dai da abinda doka ta tanada.

Bahaushe ya ce abinda ya ci doma to fa bazai bar Awe ba, don haka misalin shugabannin da suka gabata darasi ne da dukkan wani mai hankali ya kamata ya kalla kuma yaji tsoron Allah ya gyara tsakaninsa da Allah, Masu Magana suka ce dukkan wanda yaki ji to bazai ki gani ba, gani ga wane . . .!

Yasir Ramadan Gwale

yasirramadangwale@gmail.com

http://yasirramadangwale.blogspot.com

Al-Majirai Ma 'Ya 'Ya Ne Suna Da hakkin Samun Ilimin Boko amma . . .!

Al-Majirai Ma 'Ya 'Ya Ne Suna Da Hakkin Samun Ilimin Boko amma…!

Rahotannin sun tabbar ta da cewa akwai kusan al-majirai sama da miliyan 9 a Najeriya mai mutane kimanin sama da miliyan 165, wanda wannan yake nuna al-majirai sun kai kusan kashi 1.06 a Najeriya, kimanin yawan mutanan jihar Delta da Bayelsa. Lallai wannan adadi babbar barazana ce ga tsaro da zaman lafiyar wannan kasa, kuma alamu sun nuna cewa wannan adadi yana karuwa cikin sauri. Kusan idan baka ce duka ba, to sama da kashi 8 cikin goma na wannan adadi sun fito ne daga jihohin Arewa, wanda masana ke cewa talauci yana da yawa a kusan jihohin Arewa maso gabas da kuma Arewa maso yamma, lallai wannan babban kalubale ne ga gwamnatocin wadan nan jihohi da kuma masu hannu da shuni domin ganin antashi tsaye haikan wajen yakar fatara da bakin talauci da suka mamaye wannan yanki.

Kamar yadda muka sani a yanzu kusan dalilin da yake sababba al-majiranci shi ne mawuyacin hali da galibin mutanan kauyuka ke ciki na rashin iya daukar dawainiyar iyalansu, dan haka ne wasu suke yanke shawarar turasu karatun allo inda rayuwa ta ke da dama-dama, inda galibi yanzu zaka samu almajirai suna watangaririya a kusan manyan birane, domin neman abinda zasu ci, wasu kuma suna ragaita babu karatun sai neman dari da kwabo.

A can baya ana tura yara zuwa gabas ne kamar yadda ake cewa domin neman karatun al-kurani, inda kusan duk bayan kammala noma da girbe amfanin gona ake tura yara zuwa musamman kasar Barno, domin haddar al-kurani mai tsarki, alhamdulillahi a wancan lokaci birnin Maiduguri ya ya ye dalibai da daman gaske wadan da suka hardace alkurani mai girma hadda ba ta wasa ba, wannan ta sanya birnin ya shahara da mahaddata al-kurani har ya zuwa yanzu, amma kuma zance na gaskiya yanzu abin ba haka yake ba, domin galibi yaran da ake turawa da suke da kananan shekaru daga zarar sunyi wayo sun bude ido sai su watsar da karatun al-kurani su koma aikin neman abin batarwa agun 'yan daudu masu dafe-dafe ko kuma kaji yaro yabi makida 'yan koroso ya zama yaronsu, kaga kenan wannan ita ce cikakkiyar lalacewa domin yaron da yazo neman karatun al-kurani ya bige da bin 'yan daudau ai lamari ya baci, kuma lissafi ya rushe.

Ada can yadda muka sani, al-majirai suna da wasu 'yan sana'o'I da suke yi. Da yawan al-majiran wancan lokacin da wuya ka gansu yara kanana, kamar na yanzu, zaka samu suna yin sana'ar wanki da guga ko wanki tare da d'amin hula, ko kuma sana'ar wankin takalmi da dinkinsa (shushana), ko kuma sana'ar likin robobin da suka fashe ko suka tsage, galibi wadan nan sune mafiya yawan sana'o'in da almajirai suke yi a wancan lokacin sabanin na yanzu, da yaran kusan suka koma rabi suna bara rabi kuma suna sata, wato yaki halal yaki haram, watakila wannan ya faru ne bisa yadda kudade suke da yawa a hannun mutane, da kuma, yadda abun bukatuwar yau da kullum yake kara yawa.

Kamar yadda muka sani ne, a 'yan watannin baya da suka gabata shugaban kasa ya bude katafariyar makarantar boko da kuma allo ta zamani a jihar sokoto. Bude wannan makaranta yazo ne bayan shugaban kasa ya yi wannan alkawari a lokacin da yake yakin neman zabe cewa idan yaci nasarar zai gina irin wadan nan makarantu guda 121 a fadin Arewacin Najeriya, a cewarsu kuma anware kudade kusan Naira Biliyan dari hudu (400 Billion) domin wannan aiki. A daidai wannan gabar abubuwa da yawo zasu iya tasowa, kamar yadda dukkan ninmu muka sani Najeriya kasa ce mai yawan kabilu da mabanbantan al'adu da kuma addinin musulunci da na kirista, anya kuwa kiristocin Najeriya zasu iya shiru ko su zura ido suna kallon Shugaban kasa yana narkar da irin wadan nan makudan kudade da sunan gina makarantar Allo a Arewa? Domin kamar yadda yake a bayyane yake cewa, kiristocin Najeriya sun zama kamar kishiya ga musulmin Najeriya, domin duk sadda gwamnati ta yi wani abu da ya dadadawa musulmi suma sai sunyi korafi ko kuma kirkiro wani abu da suma za'a rika basu kudade, misali, kowa yasan gwamnati tana ware makudan kudade domin hidimar aikin Hajji da musulmi suke yi a kasar saudiyya a dukkan karshen shekarar Musulunci wato a watan zul-Hajji, irin yadda gwamnati take kashewa mahajjata kudi a kasa mai tsarki ya tsonewa kiristocin Najeriya ido ainun, domin idan zamu iya tunawa Solomon Lar a lokacin da yake Gwamna a Jihar Plateau ya yi ta korafi ga gwamnatin shagari cewa da taje tana kashewa musulmi kudi suna hawan duwatsu a kasar Saudiyya me zai hana su zo Jos su ringa hawan duwatsu, ya dauka cewar kawai duwatsu ake hawa a can, wannan ta sanya kiristoci suka kasa hakuri da jurewa inda suka kirkiro wani abu wai shi aikin Hajjin kirista wanda kowa yasan babu shi a addinin kirista.

Wannan ta sanya suma yanzu gwamnati take ware makudan kudade domin wadan da zasu tafi aikin Ibada Jerusalem a kasar Israela, ba komai ya sanya suka yi wannan ba illa kawai nunkufurci da bakin cikin yadda gwamnati take yiwa musulmi hidima, amma kuma duk da haka aikin ibadar nasu yaki yin kasuwa domin da wahala kaji talakawansu suna zuwa wannan ibadar galibi sai masu hannu da shuni wanda suma suna zuwa ne kawai bude ido da yawan shakatawa, domin ibadar batada wasu rukunai da wasu muhimman al'amura da ake gabatarwa a yayin ibadar; sun manta cewa aikin Hajji da musulmi suke zuwa kasar Saudiyya rukuni ne daga cikin rukunan musulunci.

Wannan ta sanya dole mu kalli wannan gina makarantu ta wannan fuska, domin idan har ba wata makarkashiya bace ko kuma wata manakisa a cikin shirin ba, to babu yadda za'ayi kiristocin kasarnan su tsaya suna kallon gwamnati tana kashe wadan nan makudan kudade ba tare da suma sun kirkiro nasu makarantun allonba, sannan idan muka tsaya tsayin daka muka yiwa wannan lamari kallo na tsanaki da kuma cire son zuciya zamu tarar akwai illa da yawa acikin wannan shiri, domin me ya sanya aka baiwa makarantar sunan ta al-majirai kawai? idan da gaske gwamnati ta ke yi me ya sanaya bazata ce al-majiran suje makarantar boko ta gwamnati kamar yadda 'ya 'yan kowa suke zuwa ba? Me ya sanya aka ware makarantar kawai sai al-majirai? Shin al-majirai sunfi kima a wajen gwamnati ne? ko kuma sunfi zama barazana gareta shi ya sanya ta killace su yasu yasu?

Kamar kuma yadda aka ce, tsarin karantarwar zai yi dai-dai da na makarantun boko, wato yara su sanya kayan makaranta (Uniform) da litattafai da azujuwa da kuma tebur da yara suke zaune, duk wannan ya nuna shirin ba da gaske akeyinsa ba, domin me yasa za'a ce yara sai sun sanya kayan makaranta? Ba bu wanda ke kin tsafta, amma a irin yadda muka taso a can baya bamu tarar ana zuwa makarantar allo da Uniform ba, don a fakaice wannan ana nunawa yara kyamar wancan tsari na karatun allo da ake yi da malami a zaune a kasa, kuma shi kansa zama akan tebur wannan ma wata matsala ce, domin ya ci karo da tsarin tarbiyyar da aka taso da karatun allo a kasar Hausa, ba laifi bane a shigo da sabbin tsare-tsare a dukkan harkar ilimi, amma yana da kyau a yi la'akari da irin yanayin zamantakewarmu da kuma al'adunmu. Shin su kuma makarantun Islamiyya na zamani da 'ya 'yan kowa da kowa suke zuwa me ce makomarsu?

Sannan a wannan sabon tsari na makarantu, yara zasu shiga aji kamar yadda tsarin makarantun boko yake inda malami zaizo yana koyar da su harshen turanci da lissafai kamar yadda aka tsara da safe sannan kuma da yamma suyi karatun allo tare da alaramma kamar yadda aka saba, nanma akwai illa mai yawan gaske, domin, da alaramman da yake karantar da yara tare da bulala a hannunsa yana zune akan buzu, da kuma malamin da yake karantar da yaran suna zaune akan kujeru yana basu karatu watakila har yana hadamusu da wake-wake irin wadan da akeyi a galibin makarantu, wa ka ke jin wadan nan yara zasu fi kauna? Wane darasi kake zaton yaran zasu fi sha'awa tsakanin karatun allo da kuma na makarantar Boko? Ba muki a koyar da al-majirai karatun boko ba, amma shakka babu game shi da akayi da karatun allo wannan akwai makarkashiya a ciki, domin a hankali za'a zarewa yaran son karatun al-qurani da kin duk wani darasi da yake da alaka da Al-qurani ko addini, kamar yadda a yanzu haka acikin makarantunmu na sakandare zaka samu galibin yaranmu basa son darasin Islamic Studies saboda duk makarantar da ka shiga zaka samu galibi malamin da yake koyar da darasin addini na Islamic shi ne mai horo(displine Master) wanda ga duk mai hankali yasan da gayya acikin wannan shiri, yara sun tsani malamin saboda irin yadda yake dukansu wannan ta basu damar tsanar darasin da yake koyarwa, bayan kuma ankai darasin karshen lokaci ta yadda duk yara sun gaji kowa alla-alla yake a kada karaurawa ya kama gabansa ya tafi, kaga duk wannan mun san akwai manufa a cikinsa.

Don haka wannan sabon shiri na gwamnatin tarayya na game makarantun Allo da na Boko ba shi ne alfanu ga almajirai ba, idan har da gaske gwamnatin ta ke son gyara harkar almajiranci da al-majirai. Idan har da gaske gyaran ake son yi kuma al-majiran ake son taimakawa domin su samu wannan ilimi na zamani, to wajibine gwamnati ta taimakawa da iyayansu ta hanyar yakar cinhanci da rashawa da kuma bijiro da ayyukan da mutane zasu samu aikin yi, da kuma inganta harkar noma ta wannan hanya kowane yaro sai ya koma gaban iyayansa ya yi karatun boko a gabansu, suna bashi kyakykyawar kulawa kamar yadda kowane uba ya ke lura da dansa, domin suma al-majirai 'ya 'ya ne kamar kowa.

Ko kuma, gwamnati ta inganta tsarin da muke da shi na karatun tsangaya ta hanyar zamanantar da tsangayar a gina musu bandakuna da dakunan kwana da famfunan samun ruwa da baiwa alarammomin abinda zasu ringa daukar dawaniyiyar yaran da kuma iyalansu, da kuma shirya musu bita akai-akai, sannan kuma gwamnati ta sanya su, su ringa zuwa makarantun boko na inda suke suna haduwa da sauran yaran al'umma suna karatu tare, duk wannan karkashin kulawar gwamnati da kuma alarammomin, sannan da koyar da su sana'o'in hannu da kuma basu dan abinda zasu juya, wannan ita ce hanyar da gwamnati zata ceci al-majirai amma ba ta hanyar game makarantun allo da na boko ba, Bahaushe ya ce ayi dai mu gani . . .!

Yasir Ramadan Gwale

yasirramadangwale@gmail.com

http://yasirramadangwale.blogspot.com

AREWA: Kowa Ya Kwana Lafiya Shi Ya So!!!

AREWA: Kowa Ya Kwana Lafiya Shi Ya So!!!

Sa nin kowa ne cewa zama lafiya ya fi zama dan sarki inji masu iya Magana, ni kuma nace yafi zama sarkinma. Kamar yadda dukkanmu muka sa ni ne cewa yanzu kusan Arewa ta shiga wani irin mawuyacin lokaci da bata taba samun kamta a ciki ba a lokutan da suka gabata, kusan a kullum safiyar Allah babu wasu rahotanni da ake karya kumallo da su daga Arewa face harbe-harben bindigogi da tashin Bama Bamai da kisan mummuke da kuma harbin kanmai uwa da wabi da jami'an tsaro karkashin rundunar JTF suke yi a kusan galibin jihohin Arewa, a kullum safiyar Allah.

Hakika wannan tashin hankali ba karamin durkusar da yankin Arewa ya yi ba  ta fannin zaman lafiya, kasuwanci da tattaln arziki. Tun bayan harin boma bomai na ranar 20 ga Janairun wannan shekara ta 2012 da aka kai cikin birnin kano ya dagula al'amuran kasuwanci a wannan birni da ke da tsohon tarihin saye da sayarwa a Yammaci da Arewacin Afurka, kamar yadda muka sa ni kusan gabaki dayan kan iyakokin Najeriya da ke yankin Arewa sun cigaba da kasancewa garkame bayan da gwamnati tayi zargin cewa ana shigo da makamai ta wadannan iyakoki da suka hada da Jimhuriyyar Nijar da Chadi da kuma Kamaru, dubunnan 'yan kasuwa ne suke ratso wadan nan iyakoki domin harkar tijara a Najeriya musamman yankin Arewa, amma yanzu sun durkushe saboda wannan dalili na tsaro da tashin bam da ya addabi Arewa.

Shakka babu, wannan hali na rashin tabbas da kuma tashin boma bomai ya wuce dukkan lissafinmu, domin irin yadda ake kai hare-hare babu kakkautawa ya firgitar da kuma razanar da duk wani mutumin Arewa danta ne ko mazauninta, kasancewar babu wanda yake da masaniyar inda wadan nan miyagu azzalumai zasu kai wadan nan hara-hare na su a kowace rana.

kamar yadda abin ya samo asali, inda muke jin ana kaiwa jami'an tsaro wadannan hare-hare tare da halaka su da jikkata wadan da suke da sauran kwanaki. Yanzu kusan zamu iya cewa abin ya sauya salo, domin daga hare-haren da ake kaiwa jami'an tsaro ankoma hari kan majami'u wato wajen ibadar kiristoci, kusan duk karshen mako sai mun wayi gari da harin kunar bakin wake da ake kaiwa irin wadan can guraren ibada na kirista, tare da hasarar rayukan wadan da basu jiba basu gani ba.

Su wadan nan, wadan da suke kai irin wannan mugun harin, har yanzu kamar yadda hukumomi suke cewa ba'a san ko su waye ba, shakka babu abin zai zama me daure kai da kuma ban mamaki ace duk da irin kwarewa ta jami'an tsaronmu da iya bankado mai laifi amma ankasa sanin su waye hakikanin wadan da suke kai irin wadan nan hare-hare babu kakkautawa, sai dai kawai wata kungiya da ke ikirarin kai wadannan hare-haren ta hanyar amfani da yanar gizo ko intanet suce su ne ke da alhakin kai hari waje kaza da kaza, wanda a zahirin gaskiya babu wata kwakwkwarar shaida da zata nuna maka cewa su ne suke kai irin wadan nan hare hare. Kuma babu yadda Magana a internet zata iya zama hujja domin kowa na iya amfani da internet yana cikin dakinsa ya yi dukkan abinda ya ke so, don haka babu yadda zamu yarda da maganar cewa wasu sun watsa a internet cewa sune suke da alhakin kai gari waje kaza da kaza.

Domin ta ya akayi suke fakar idon jami'an tsaro duk kuwa da suna nan a jibge akan manya da kananan hanyoyinmu, lallai wannan babban abin tuhuma ne ga jami'an tsaro, wani abu da yake bawa mutane mamaki shi ne irin yadda gwamnati ta ke yin karyar cewa suna nan suna aiki tukuru wajen samar da kwanciyar hankali, shin wane irin aiki akeyi wanda har yanzu zaman zullumi karuwa yake mai makon raguwa? ko kuwa irin aikin baban giwa ake yi ta hanyar tufka ta re da warwara, kuma abinda da yake faruwa yau da kullum ya tabbatarwa da al'ummar Najeriya cewa babu wani abu da gwamnati ta ke yi   na kawo karshen wannan tashin hankali, illama amfani da wannan damar wajen dibga mahaukaciyar sata da yashe asusun gwamnati da sunan aikin tsaro.

Sau da dama, jami'an tsaron Najeriya kan kafa hujja da cewar su basu saba da irin wadan nan hare-hare na sari ka noke ba ko harin ta'addanci, anan sai mu ce duk jami'in tsaron da ya yi wannan Magana ya tabbatarwa da duniya cewa lallai basu san aikinsu ba, domin a har kullum shi mai laifi yana amfani ne da hanyar da zai kaucewa fadawa hannun jami'an tsaro, don haka yaushe jami'an tsaro zasu zauna su shanta ke a cikin ofisoshi suna hira suyi zaton masu aikata laifi zasu yi amfani da dabarun da jama'an tsaro suka sa ni, lallai wannan babbar kasawa ce jami'an tsaro suce wai yadda ake kai wadan nan hare haren ya saba da tunaninsu ko masaniyarsu, idan har wanda ba jami'in tsaro ba zai yi amfani da tunani da kwarewarsa wajen shirya shegantaka kuma yaci nasara, ina amfanin jami'in tsaron da ya koyi dabaru kala-kala akan abin da ya shafi harkar tsaro da kama tare da gurfanar da mai laifi.

Kamar yadda ya faru, ankai hare hare akan coci coci a jihohin Plateau da Kaduna da Maiduguri da Bauchi da Neja da sauransu. Abin ya fara kazanta ne bayan da kiristoci suka fara daukar fansa akan musulmi a Jos, inda suke kashe mutanen ba babu ruwansu kuma suke kona dukiyarsu, dukkuwa da bayanan da suke nuna cewa galibi wadan da ake kamawa da kokarin dasawa ko tayar da bom kiristoti ake kamawa da wannan laifi ko yunkuri a galibin inda akaci nasarar kamasu, domin rahotanni sun tabbatar da cewar wanda ya kai harin Cocin Church a Jos da Miyabarkate a Bauchi duk kiristocine, haka kuma ankama kiristocin da suke yunkurin tayar da bom a coci a Bauchi mutum bakwai, banda faston da aka taba kamawa da tarin makamai a Jos da kuma wata mata mai suna Lucy Danga kirista da ta ke safarar makamai zuwa kasarnan, sai gashi baya bayan nan ankama jami'in kwastam da samarwa da kabilarsa ta Berom da miyagun makamai, kuma abin haushi gwamnatin Jos ta fito tana kokarin kareshi, dukkansu babu wani musulmi da aka taba kamawa, amma kuma abin haushi da wadan nan tsagerun kiristoci sai su huce haushi akan Musulmi. Lallai rashin adalcin da hukumomi suke yi ya sake rura wutar wannan lamari, don haryanzu bamuji hukuncin da aka yankewa wadan da muka zayyana ba.

Ya kamata kiristocin Arewa su fahimta, sune mutanan da suka fi kowa cin albarkacin zaman lafiya a Arewa. Shakka babu wannan maganar haka ta ke, cewa kiristocin Arewa sune suka fi amfana da zaman lafiya tsakanin musulmi da kirista, domin galibinsu talakawa ne, don haka irin sana'o'in da suke yi musamman a cikin garin Kaduna zaka samu musulmi ne suke saye, misali masu soya kosai da doya a gefen titi da masu gasa masara da masu tallar ruwan leda na pure water da masu tallar burodi a kan danja da tashoshin mota da masu gidan abinci da masu kananan kantuna zaka samu duk Hausawa Musulmi sune kasuwarsu, da su suka dogara wajen samun dari da kwabo, kaga kuwa da suna da hange da tunani, da su zasu fi kowa son azauna lafiya da juna.

Wani abin mamaki shi ne, Shugaban kasa Kirista, Shugaban sojojin Najeriya kirista, me baiwa shugaban kasa shawara ta fuskar tsaro kirista, babban daraktan 'yan sandan farin kaya na kasa SSS kirista, shugaban majalisar dattawa kirista, gwamnan Kaduna kirista, gwamnan Plateau kirista amma duk da haka sun gaza samar da tsaro ga guraren ibadar 'yan uwansu kirista, to inaga mu musulmi da muke addini daban da nasu? Don haka muna zargin dukkan wadan can bangarori da kitsa wutar wannan tashin hankali domin cimma wata boyayyar manufa da suke da ita, wanda ya zuwa yanzu ta bayyana cewa Gwamnatin Jos tana da hannu a galibin rikice-rikicen da ke faruwa a jihar.

Kuma tun daga fadar paparoma dake Vatican da kungiyar CAN dake Najeriya, babu wanda ya yi kira da a hukunta kiristocin da ake kamawa da yunkurin tayar da boma bomai ko dasa su, ko kuma masu safarar makamai; haka kuma, ankaiwa Musulmi hari ranar sallar a Jos babu wani kirista da ya ke da fada a ji a kungiyar CAN da ya fito ya bukaci lallai ayi bincike don gano wadan da suka kaiwa musulmi hari domin a hukuntasu, haka kuma, irin kisan kiyashin da akayiwa musulmi ana zubawa a rijiya da shadda a zankwa a lokacin rikicin bayan zabe babu wani kirista tundaga fadar paparoma da ya zargi kiristoci da aikata ba dai-dai ba. Amma wai har shuagab CAN Oritsejafor yake cewa wai musulmi basu fito sunyi allawadai dinda ta kamata ba da harin da aka kai a Madalla ta jihar Neja ba.

Amma tunda yake suna ganin wannan hanyar da suka biyo suna ganin itace mafita, muna tabbatar musu duk da musulmi suna cewa a zauna lafiya, su sa ni wallahi mu ba matsorata bane, kuma daga yanzu duk wanda ya kwana lafiya shi ya ga dama, kuma munce CAS ga duk wanda ya ce mana kule, mu daura zare da su, muga su wa zasu kasa, tunda yake jami'an tsaro sun gaza samar da tsaro a tsakanin 'yan Najeriya mu Musulmi wallahi zamu iya baiwa kanmu tsaron rayukanmu da dukiyoyinmu da taimakon Allah da kuma kwazon da muke da shi, kamar yadda duk  muka sani ankaddamar da aiki da shari'ah a Arewa kuma akwai 'yan Hizba a jihohinmu, dukkanmu mazanmu da matanmu sai mu zama 'yan Hisba domin baiwa garuruwanmu aminci.

Kuma wallahi kiristocin Arewa su sa ni, ta re matafiya musulmi da suke yi a kauyen gwanin gora akan hanyar Kaduna zuwa Abuja, wannan su zata kwabewa, domin kauyen nawa yake, daga yanzu sai mu ringa tahowa cikin ayari duk karshen mako daga Abuja zuwa Kaduna zuwa da komawa, kuma kowa ya yi guzurin gora don kare kansa, muga idan da akwai dan iskan da ya isa ya tare mana hanya, kamar yadda yake a dokar kasa kare kai ba laifi bane, to wallahi zamu yi dukkan mai yuwuwa wajen muga mun kare kanmu har Allah ya maidamu gidajenmu Lafiya.

Idan kuwa sun zabi zaman lafiya, su sa ni wallahi mu Musulmi munfi kowa kaunar ganin a zauna lafiya, domin munyi imani da Allah da Manzon Allah kuma munyi imani da littafin Allah al-qur'ani, Allah baice ka kashe mutum don ba addininku daya ba, don haka duk wannan abin da yake faruwa al-qurani ya riga ya bamu mafita. Don haka wanda yake fatan a zauna lafiya muna maraba domin mu musulmi ba masu son tashin hankali bane, duk kuma wanda yake tunanin mu matsorata ne to ya tabbatarwa da kansa cewa ya yi kuskure a shirye muke mu fuskanci duk wani dan iska mara kaunar zaman lafiya.

Yasir Ramadan Gwale

yasirramadangwale@yahoo.com

http://yasirramadangwale.blogspot.com